Emma Lennert sapaatip akunnerani matumani ataatsimeersuarnermi ICC Kalaallit Nunaanni præsidentitut qinerneqarpoq. Siulersuisut piffissamut 2026-miit 2030-mut atuuttussat aamma qinerneqarput.
Siulersuisut atuuffiat aallartissaaq 25. juli 2026, maannamut siulersuisuusut siulittaasuuffimmik ICC Canadamut tunniussippata, tamannalu pissaaq Iqalunni ICC-p ataatsimeersuarnerani ulluni 22.-25. juli 2026 pisussami.
ICC tusagassiutitigut nalunaarummi taama allappoq.
Emma Lennertip qinerneqarneratigut maannakkut præsidentiusoq Hjalmar Dahl inuulluaqquneqarpoq.
- Politikkikkut aqutsineq sukkasuumik allanngorarfiusoq
Oqarpoq siulersuisut nutaat piukkunnartut ilerasuuteqarnatik eqqissisimallutillu aqutsisussanngortikkumallugit:
- Sulinermi pissanganartumi peqataasimavunga, piffissami pissanganartumi nunarsuatsinni pissutsinik politikkikkullu aqutsinermik sukkasuumik allanngorarfiusumi, aammalu ICC-p annertuumik sunniuteqarfigisimasaani sulilu sunniuteqarfigisaani Issittoq nunallu tamalaat akornanni politikkikkut pisut eqqarsaatigalugit, Hjalmar Dahl oqarpoq.
ICC Kalaallit Nunaata piffissami 2022-mit 2026-mut ICC-mi siulittaasuusimanera tulluusimaarutigeqaa, Sara Olsvigillu nunani tamalaani aqutsisutut akisussaaffeqarsimanera pillugu qutsavigaa.
Emma Lennert ukiuni sisamani kingullerni siulersuisunut ilaasortaasimavoq, taamaammallu suliassani nalunngilluinnarpaa:
- Nuannaarutigeqaara tulluussimaarutigalugulu ICC Kalaallit Nunaannut siulittaasutut qinigaanera taamalu aamma ICC-p tamarmiusup siulittaasuanut tullersortinngornissara, Emma Lennert oqarpoq.
Sara Olsvig siulersuisuniiginnassasoq
ICC Internationalimi maanna siulittaasuusoq, Sara Olsvig, siulittaasuuffik Canadap juulimi tiguppagu ICC Kalaallit Nunaanni siulersuisunut ilaasortatut ingerlaannassaaq.
Nunarsuarmi allanngoriartortumi ukiut sisamat pissanganartut ulapaarfiusullu nunani tamalaani siulersuisutut atorsimasani kingumut eqqarsaatigalugit ima oqarpoq:
- ICC-p sulinera ukiuni makkunanerpiaq pingaaruteqarpoq, Nunat Inoqaavisa pisinnaatitaaffimminnik sorsuuteqarnerminni annerusumik sukataarnerusariaqarnerannik malitseqartumik.
- Aamma pingaaruteqarpoq nukiit nutaat kivitsinissaat, assorujussuarlu tulluussimaarutigaara toqqissisimanaralugulu Emma aamma Nivi ICC Kalaallit Nunaannut siuttunngortussanngormata. Siulittaasuuffipput aasamut naammassippat tamatuma kingorna siulersuisunut ilaasortatut ICC Kalaallit Nunaannullu aallartitatut siuttunik tapersersuinera ingerlateqqissallugu qilanaarpunga, Sara Osvig oqarpoq.
ICC Kalaallit Nunaanni 2026-miit 2030-mut siulersuisunngortussat
Siulittaasoq, ICC-llu tamarmiusup siuittaasuanut tullersorti: Emma Lennert, SORLAK
Siulittaasup tullia, ICC-llu tamarmiusup siulersuisuunerinut ilaasortaq: Nivi Rosing, Inatsisartut
Siulersuisunut ilaasortaq Sara Olsvig, ICC Kalaallit Nunaat
Siulersuisunut ilaasortaq Qulutannguaq Berthelsen, SIK
Siulersuisunut ilaasortaq Jens Danielsen, Avannaata Kommunia (Inughuit)
Sinniisut tassaapput Stina Svær, MIO, Ellen Frederiksen, SPS (Savaatillit Peqatigiit Suleqatigiissut), aamma Mikkel Jeremiassen, KNQPK
