Ilisimannittut suliariumannittussarsiuussineq akerleriissutaasoq kommunillu timmisartumut bilitsisiaq pillugu nassuiaapput

Eqqartuussiveqarfik Sermersuumi pingasunngornermi ullaap tungaani suliami ilisimannittut arlallit, ilaat Danmarkimit videokkut, sassartaalerput. Kommunimi pisortaasimasoq peqquserlunnermut oqartussaatitaanermillu atornerluinermut unnerluutigineqartoq pillugu eqqartuussivimmi paasissutissiissapput.

Angut taanna ilaatigut piffissami 2020-mit 2021-mut pisortatut atorfini atornerlullugu suliffeqarfik aalajangersimasoq, qatanngutiminit ningaaminillu pigineqartoq, kommunimi eqqiaanermik suliassinnittoq, unnerluutigineqarpoq.

Suliffeqarfimmi tassani sulisimasup oqaluttuaraa suliamut atatillugu neqeroorutigineqartut "oqaatigilluaannarlugu tamaasa“ allassimallugit, unnerluutigineqartullu tamatumunnga tunngatillugu inissisimaffia ima nassuiarpaa:

- Neqeroorusiaq taanna akuersiteqqaartinnangu nassiussinnaasimanngilara. Neqeroorut tamarmi tassannga nakkutigineqarpoq.

Takunnissimasorli taanna suli suliaq naammassinngitsoq atorfimminit soraarpoq.

Eqqiaanermi pisortaq nalunaajaasoq

Eqqiaanermi ingerlatsivimmi pisortaq, kommunip suliassaanik suliarinninneranik peqquserluffigineqarsimasoq, oqaluttuarpoq: Suliffeqarfik taanna akigitinneqartuni pitsaanerpaamik neqerooruteqarpoq.

Ilisimasaminik nassuiaanermini oqaluttuarpoq kommunip suliassaq suliariumannittussarsiuussissutigigaa, kingornali iluarsaassinermut atortut atortussiallu ilanngullugit imaluunniit ilanngunnagit akiligassanngortinneqarnersoq pillugu isummani allanngortikkaa.

- Tamanna naammagiunnaarpara, taamatulli pisoqarsimanngisaannarpoq. Atortorissaarutinik nassartariaqarutta soorunami akivut allanngortittariaqarpagut, ilisimannittoq oqarpoq.

Eqqiaasuni pisortaq oqaluttuarpoq, suliffeqarfia kingusinnerusukkut neqeroorummik nutaamik nassiussisimasoq, taavalu ilaannakortumik isumaqatigiissummik ajugaasimalluni. Sinneri atsiunneqarsimapput suliffeqarfimmut, pineqartup arnaata angutaa pigisaannut. 

Ilisimannittoq oqarpoq ilisimallugu kommunimi pisortaq suliffeqarfiullu piginnittui qanigisariitsut, taamaattumik aamma nammineq ajugaanissaq naatsorsuutigisimanngilaa.

- Pissarsiarput nuannaarutigaarput, takusinnaasara naapertorlugu neqeroorut eqqortumik suliarineqarsimavoq, oqarpoq.

Unnerluussisoq aperivoq ilisimanittup ilisimaneraa kikkut suliassanik taakkuninnga tunineqartassanersut aalajangerniaraanni aningaasaqarniarneq eqqarsaatigineqarsimanngimmat. Taanna naaggaarpoq.

Nalunaajaasut akimik qularuteqartut

Aamma unnerluutigineqartup qatanngutaa alla eqqartuussivimmi ilisimasaminik nassuiaavoq, taassumalu uppernarsarpaa 2021-mi anaanamik toquneranut ilisaaneranilu atatillugu Danmarkimit Kalaallit Nunaannut timmisartumut billetisineqarsimalluni.

- Qatanngutima Nuummut billetimik pissarsissuppaanga, sapaatillu-akunnerata tulliani angerlamut nammineq biletisillunga. Aperingannilu akiliutigisimasai qanoq taarsissanerikka, akivaanga tamanna paasiniarsiumaartoq.

Unnerluussisup unnerluussaasup kommunip akiligassaanik inatsisinik unioqqutitsilluni akilersimanani akiliisimanerarpaa, tamannali unnerluussummilu allassimasut allat tamaasa unnerluussaasup ilumuunnginnerarpai.

Qatanngutaasoq oqaluttuarpoq nalugini kiap akiligassani akilersimaneraa, unnerluussaasimasulli kommunimi suleqatiminut allakkamini allappoq qatanngummi utimut nammineq angalanini akilerumaaraa.

Pingasunngornermi ualikkut siornatigut sulisorineqartoq suliamut tunngasut arlallit oqaluttuarai, pissutsillu paasinarsisillugit uppernarsaatit allat takusinnaavavut.

Sisamanngornermi ilisimannittut kingulliit sassartinneqarnissaat ilimagineqarpoq. Ilimagineqarlunilu pineqaatissiisoqassasoq.