- Sakkut isumannaatsumut inissinneqartarnissaat pingaarnerpaavoq, taannalu isumaqatigineqartoq tusaasinnaavara, tamannalu Naalakkersuisuniit nuannaarutigalutigu.
Sakkut pillugit inatsimmut 1992-imeersumut allannguutit sivisuumik utaqqineqartut politikkerinit pingasunngonermi aappassaaneerneqarmat aalisarnermut, piniarnermut nunalerinermut imminullu pilersornermut naalakkersuisoq Peter Borg (D) Inatsisartut ataatsimiittarfianni oqaluttarfimmiit oqarpoq.
Inatsisartunut siunnersuut 2025-mi ukiakkut ataatsimiinnermi siullermeerneqarpoq, tamatumalu kingorna Inatsisinut Ataatsimiititaliamit suliarineqarluni.
Siullermeernerani ataatsimiititaliallu isumaliutissiissutaani partiit inatsisip nutaap ilaa ernumassutigaat paasinarsivoq, tassa sakkoqarsinnaanermut ukiut minnerpaaffissalerneqarnissaat.
Aallaaseqarsinnaanermut 15-ileeqqaartoqartariaqartoq inatsimmi allannguutigineqartumi allassimavoq. Meeqqalli aqqaneq-marlunnik ukioqalereersut inersimasumik ilagineqarlutik piniariaqatigineqarsinnaasassapput.
Tamanna kalaallit kulturiannut ileqquinullu ajoqusiisinnaasoq ernumagineqaraluartoq, ataatsimiititaliap inatsisissatut siunnersuut akueriniarlugu innersuussivoq.
Inuusuttut pinerluttunngussappat?
Sakkut pillugit inatsimmi nutaami allanik aamma allannguuteqartoqarpoq, soorlu aallaasit isumannaatsumut inissinneqartalernissaat ilanngunneqarluni. Tassa aallaasit imassallu immikkut inissinneqartarlerlutillu meeqqaanut allanullu tiguneqariaannaanngitsumut ilineqartalissapput. Sillimaniarnermullu tunngasortaa partiit tamarmik isumaqatigaat.
Aappassaaneerneqarnerani taamaammat ukiut killigititat pillugit oqallinneq annertuneruvoq, inammik Siumumiit Naleqqamiillu ernummatigineqarpoq.
Erik Jensenip (S) ukiut killilerneqarnerat inuusuttuaqqat suli ukiukippallaartut piniariarunik pinerluttutut isigineqalersinnaanerat oqaluttarfimmiit isornartorsiorpaa.
Taamaattariaqanngitsorli Peter Borg oqarpoq.
- Siullermeerneqarnerani ermmutigineqartut amerlapput, ataatsimiititaliamilu suliarineqarnerani isumakuluuterpassuit saqqummiunneqarput, ilaqutariittullu ileqqutsinnut kulturitsinnullu tunngasut samminerusimavakka.
- Inatsisit atuuttut ilaat tamatumunnga akornutaasinnaapput, meeqqallu perngartarnerannut kulturitsinnut ileqqutsinnullu naapertuuttumik qanoq allannguisinnaanerlunga naleqqussaasinnaanerlungalu misissorniarpara, aalisarnermut, piniarnermut nunalerinermut imminullu pilersornermut naalakkersuisoq oqarpoq.
Meeqqat aqqaneq-marluk inorlugit ukiullit inersimasumik ilagisaqarlutik aallaammik ulorianartumik atuisinnaanerat inerteqqutaanavianngitsoq erseqqissarpaa.
Folketingimi akuerineqassasoq
Partiit oqaaseqarusuttut oqaaseqareermata inatsisissatut siunnersuut Inatsisartuni taasissutigineqarpoq.
18-it akuersipput, arfineq-marlullu taaseqataanatik. Taasinerit agguataaraanni naalakkersuisooqatigiit Demokraatit, Inuit Ataqatigiit aamma Atassut taaseqataapput, Siumut Nalerarlu taaseqataanatik.
Tassa Kalaallit Nunaanni sakkut pillugit inatsit aatsaat taama allanngortinneqartiginissaa Inatsisartuni akuerineqarpoq. Sakkut pillugit inatsit 1992-imili atuuttoq.
Ingerlaannarli atuutilissanngilaq. Sakkut pillugit susassaqarfik angerlaanneqarnikuunngilaq, taamaammallu naalagaaffiup ataaniilluni. Inatsisit allanngortinniarneqarnerat Folketingimut saqqummiunneqaqqaarlunilu akuersissutigineqaqqaartussaavoq.
Sakkut pillugit inatsit nutaaq Naalakkersuisut Inatsisinullu Atuutsitsinermut Ministereqarfiup qanimut suleqatigiillutik suliaraat. Inatsisinik Atuutsitsinermut Ministereqarfiup allannguutissatut siunnersuut siulleq 2019-imi saqqummiuppaa. Siunnersuut 2024-mi aasakkut tusarniaassutigineqarpoq. Maannalu Inatsisartuni akuerineqarluni.
