Maniitsumi inissiarsuit ilaat marlunngornermi ikuallappoq.
- Politiit ikuallattoqarneranik marlunngornermi ualikkut nalunaarfigineqarput. Politiit qatserisartullu ornigussimasut pigaartut pisortaat Poul Kreutzmann oqaluttuarpoq.
- Inissiarsuarmi ikuallattoqangaatsiarpoq.
- Qujanartumik inuit tamarmik annissorneqareersimapput, inunnillu ajoqusertoqanngilaq,
Poul Kreutzmann taama oqarpoq.
Inissiarsuaq arfineq-pingasunik inissialik ikuallanneq pissutigalugu ajoquserpoq, najugaqartuilu allamut inissinneqarput.
- Suliaq soorunami malinnaaffigiuarparput, misissuinerillu suli ingerlapput, Poul Kreutzmann oqarpoq.
Nuummi anorersuarnissaanik aarlerisaarut
Politiit Ikuallattoqarnerata saniatigut Nuummi kommunep allaffianut tillinniartoqarneranut aamma ornigupput.
Inuit marluk qimaapput, politiinilli kingusinnerusukkut tigusarineqarput.
Pingasunngornermi ullaap tungaani Nuummi anorersuarnissaa aarlerisaarutigineqarmat, pigaartut pisortaat illoqarfimmi biilertunut ima kajumissaarivoq:
- Biilip qulliisa qaalloritsinissaa eqqaamajuk, anorersuarneranilu mianersornerusariaqarputit, Poul Kreutzmann oqarpoq.
Kommuneqarfik Sermersooq Facebookimi quppernermini ilisimatitsivoq Nuummi atuarfiit meeqqeriviillu anorersuarnissaa ilimagineqaraluartoq ammajuassasut.
Angajoqqaat kajumissaarneqarput anorersuup ingerlanera namminneq malinnaaffigineqaqqullugu, kommuni allappoq.
