Amerikap Avannaani nunarsuarmi pissartanngorniunnerit ingerlanneqarpata Iranip Italiamik taarserneqarnissaa Italiamiut politikerii nuimasut siunnersuut itigartippaat.
Isumassarsiaq Paolo Zampollip, USA-p nunarsuaq tamakkerlugu suleqatigiinneq pillugu immikkut aallartitaata, isumassarsiaraa. Naleqqutinngilaq, timersornermut ministeri Andrea Abodi oqarpoq.
- Unammisarfimmi anngunniuttoqartarpoq. Aningaasaqarnermut ministerip Giancarlo Giorgettip siunnersuut ’kanngunartutut’ taavaa., Nutaarsiassaqartitsivik Reuters naapertorlugu Abodi oqarpoq:
Luciano Buonfiglio, Italiami OL-imut ataatsimiititaliap siulittaasua, aamma oqallinnermut akuliuppoq.
- Siullertut taamaaliortoqarsinnaanera upperinngilara, aappaattut ajuallatsinneqartutut misigissaanga. VM-imut peqataassagaanni anngussimasariaqarpoq, oqarpoq.
Nunani tamalaani arsaattartut kattuffiat FIFA taarsiisoqarnissaanik immikkut qinnuigisimallugu, immikkut aallartitaq Zampolli aviisimut Financial Timesimut oqarpoq
Tamanna FIFA-p præsidentianut, Gianni Infantinomut, USA-llu præsidentianut Donald Trumpimut siunnersuutigisimavaa.
- Italiami inunngorpunga, USA-milu unammiuaarnermi Italiamiut nunanut allanut unammisartuisa peqataanissaat takorluugarigaluarlugu, Zampolli aviisimut oqarpoq.
Italiamiut nunarsuarmi pissartanngorniunnissamut anngunniunnermi Bosnia-Hercegovinamut ajorsarujussuaramik, VM-imut marsip naanerani anngussinnaasimanngillat.
Italiami ajorsarneq isornartorsiorneqangaarpoq, Italiamilu arsaattartut kattuffianni siulittaasoq naggataatigut tunuarpoq.
USA-p Israelillu februaarip naanerani Iran saassuppaat.
Kingusinnerusukkut Iranimi arsaattartut kattuffianni siulittaasoq, Mehdi Taj, oqarpoq Iranip USA peqataaffiginngikkaat, VM-ili peqataaffigissallugu.
Taamaattumik Iranip peqataajunnaarnissaa imaluunniit unammersuarnernit anisitaanissaa ilimanaateqanngilaq.
Kinaassutsiminik isertuussisut aallaavigalugit Iran Italiamit taarserneqarnissaa ilimanaateqanngitsoq, BBC-p allaatigaa.
Fifap Zampollip siunnersuutaa toqqaannartumik oqaaseqarfigerusunngilaa, Infantinolli siusinnerusukkut oqaaserisimasai innersuussutigisimavai.
- Iranimiut nunanut allanut unammisartut tikissapput, tamanna qularnanngilluinnarpoq, Infantino oqarpoq.
Det Hvide Husip Paolo Zampollip siunnersuutaa pingasunngormat oqaaseqarfigerusunngilaa.
/ritzau/
