Kommune Kujallermi borgmesteri Malene Vahl Rasmussen (D) aamma utoqqaat oqaaseqartartuat Kiista P. Isaksen ataasinngornermi februaarip 23-anni suleqatigiinnissamut isumaqatigiissummik atsioqatigiipput. Suleqatigiinnissamut isumaqatigiissummi kommunip utoqqaallu oqaaseqartartuat Kiista P. Isaksenip digitalikkut attaveqaatinik atuinissaq pineqarpoq.
- Kommunip ataatsimiittarfiisa taamatut atorneqarsinnaanngornerini neriuutigivara Kommune Kujallermi utoqqaat tusarnaarneqarnerulernissaat annertusissasoq, taamatullu aamma aaliangigassani utoqqarnut tunngasuni utoqqaat peqataatinneqarnerulernissaannik kinguneqarumaartoq, Malene Vahl Rasmussen oqarpoq.
Utoqqaat oqaaseqartartuata Kommune Kujalliullu isumaqatigiissutaat nutaaq digitalimik atortorissaarutinik atuinerulernermik saniatigut utoqqarnut tunngasutigut suleqatigiinnerup annertusarnissaanut iluaqutaassaaq.
- Ataatsimiinnerni eqqartorneqartut utoqqaat oqaaseqartartuannit kommunimut apuunneqartassapput, kommuniminngaanniillu utoqqarnut aamma utooqqaat oqaaseqartartuannut attaveqaataasussamik inuttaliissaagut. Taamatut isumaqatigiissuteqarnerput nuannaarutigaara, suleqatigiilluarnissamillu neriuuteqarfugalugu, Malene Vahl Rasmussen oqarpoq.
