Borgmesterip tullia siulleq Gideon Lyberth ukiorpassuarni kommunimi politikeriuvoq pimoorussisoq, taamaattumillu borgmesterip Malik Berthelsenip taassuma kommunalbestyrelsimi suleqataanerminit tunuarniarluni aalajangernera uggoraa.
- Kisianni aninerminut tunngavilersuutigisaa, tassa inuttussuseq aallaavigalugu sanaartugassanut aningaasaliissutinik agguaasalernissamut aalajangernerput tunngavilersuutigimmagu paasiuminaatsippara, Qeqqata Kommuniani borgmesteri Malik Berthelsen (S) oqarpoq.
Aamma maluginiarpaa partiit illuatungiliuttut suleqatigiinnissamik isumaqatigiissummi ukiuni pingasuni atuuttussami aalajangernertik allanngortinniarlugu oqaatigisimanngikkaat.
Kommunalbestyrelsip februaarip 26-ani ataatsimiinnermini aalajangerpaa sanaartornermut aningaasaliissutit innuttaasut amerlassusaat naapertorlugit agguataarneqartalissasut. Suliassap saqqummiunneqarnerani allassimasutut Itilleq aamma Napasoq ukioq manna aningaasaliiffigineqarsimanngillat.
Nunaqarfinnik inuerussaaneraaneq isumaqatiginngikkaa
Gideon Lyberthip kommunalbestyrelsimi aalajangiineq nunaqarfiit minnerit ineriartornissamut periarfissaasa ajornerulernerannik kinguneqarumaartoq Sermitsiamut nassuiaatigaa.
Borgmesterip tamanna isumaqatiginngilaa.
Aalajangiisoqarnissaa sioqqullugu kommuni pisariaqartitsisoqaleraangat aningaasaliisarpoq. Inuttussuseq aallaavigalugu sanaartugassanik agguaasalerneq nunaqarfinni siunissami pisariaqartitsisoqalernissaanut aningaasaliisoqarnerusalissaaq:
- Inuttussuseq aallaavigalugu sanaartugassanik agguaasalernerup inoqarfiit tamaasa aningaasaliivigineqartalernissaannik qulakkeerinninneruvoq. Nunaqarfinni annertunerusumik pisariaqartitsisoqartillugu annertunerusumik aningaasaliisoqartarnissaa suli periarfissaajuaannaasoq isumaqatigiissutiginikuuarput, Malik Berthelsen oqarpoq, nangipporlu:
- Inuttussuseq aallaavigalugu sanaartugassanut aningaasaliissutinik agguaasalernissamut aalajangernerput tunngavilersuutigimmagu paasiuminaatsippara. Pissutigalugu aalajangiinermut tassunga massakkut suleqatigiligai inuttussuseq aallaavigalugu agguaasalernissamut uagutsituulli isumaqataallutik aamma akuerseqataanikuummata, oqarpoq.
Partiit tamarmik suli isumaqatiginiarneqartut
Gideon Lyberthip suleqatigiinniikkunnaarnera Malik Berthelsenip, Siumup Inuit Ataqatigiit suleqatigiittut ikinnerussuteqalernerannik kinguneqarpoq, partiillu illuatungiliuttut Naleraq, Demokraatit aamma Atassut kiisalu attaviitsoq amerlanerussuteqalerlutik.
Malik Berthelsenilli kommunalbestyrelsimi sulineq ernumaginngilaa:
- Tamatta kommunitta pitsaasumik ingerlanissaa soqutigisarivarput. Kommunalbestyrelsemilu suliavut amerlanerpaat tamatigut partiit tamattaalluta isumaqatigiissutigalugit sulineq ingerlanneqartarmat naatsorsuutigaara tamatuma ingerlaannarnissaa. Uannulli pingaarnerpaavoq kommunitta toqqissisimasumik, akisussaassusilimmillu aammalu missingersuutit akuerisimasagut aallaavigalugit sulinerup ingerlanneqarnissaa, Malik Berthelsen oqarpoq.
Kommunalbestyrelsimi partiimik suleqateqarumanngikkaanni partiimi ilaasortaaginnartoqarsinnaanngitsoq aamma oqaatigaa.
Gideon Lyberthip kommunalbestyrelsimi Naleraq, Demokraatit aamma Atassut suleqatigiumallugit isumaqatigiissuteqarfigai.
