Danmarkimi naalakkersuisut napparsimasut Nunatsinnit Danmarkiliartinneqartartut akilertalernissaannik isumaqatigiissuteqarput.
Inatsisartut Aningaasaqarnermut Akileraartarnermullu Ataatsimiititaliaata allagaani takuneqarsinnaavoq, Naalakkersuisut isumaqatigiissuteqarnermikkut aningaasanik qanoq amerlatigisunik sipaarniarnissartik naatsorsuutigigaat, aamma Naalakkersuisut aningaasat taakku sunut allanut atorniarneraat ilanngullugit.
Siullermik sipaarniutissat misissoraanni, Naalakkersuisut timikkut nappaatillit nunani allani katsorsarneqartarnerannut aningaasaliissutit 132,7 millionit koruuninik ikilisinniaraat allakkani takuneqarsinnaavoq.
Tarnikkut nappaatillit nunani allani katsorsarneqartarnerat 24,3 millionit koruuninik ikilineqassapput pinerluttulerinermullu inatsit naapertorlugu tarnikkut nappaatilinnut inissiisarfinnut aningaasaliissutit 26 millionit koruuninik ikilineqassallutik.
Tassa 2026-mi katillugit 183 millionit koruuninik sipaaruteqartoqassaaq.
Suliniutinut assigiinngitsunut sipaarniuteqartoqarnissaa siunnersuutigineqartoq
Sipaarniutissat amerlasuut suliniutinut allanut arlalinnut agguataarneqarnissaat siunnersuutigineqarpoq:
Taarsiissutissanut 35 millionit koruunit
Soorlu qulaani takuneqarsinnaasoq, naartunaveersaasersuinermik suliamut, aamma spiralilersuinermik suliatut ilisimaneqartumut, 35 millionit koruunit immikkoortinneqarnissaat siunnersuutigineqarpoq.
Naalakkersuisut 4,5 millionit koruuninik siornatigut immikkoortitsisimapput, tassa arnanut peqqinnissamik isumaginninnerup 1992-imi angerlaanneqarnerata kingornagut, akuersitinneqaqqaaratik naartunaveersaaserneqarsimasut taarsiiffigineqarnissaannut atugassatut.
Ajornartorsiutaallunili arnat ilimagisamit amerlanerujussuit taarsiiffigineqarnissaminnik qinnuteqarsimammata – taarsiissutissanik qinnuteqaatit 111-t suliarineqartut, Naalakkersuisut siusinnerusukkut nalunaarutigaat.
Arnat 111-t tamarmik immikkut 300.000 koruuninik taarsiiffigineqassappata, nunap karsianit katillugit 33,3 millionit koruunit aaneqartariaqassapput.
Naalakkersuisut siunnersuutaat qulaani taaneqartut akuerineqarpata, aningaasat taarsiissutissat qulakkeerneqarsinnaassapput.
Ataatsimiititaliap apeqqutai akuersinissaminullu utaqqimaarnera
Aningaasaqarnermut Akileraartarnermullu Ataatsimiititaliap allagaani atuarneqarsinnaasutut, Naalakkersuisut siunnersuutaat ataatsimiititaliap ingerlaannartumik akuerinngilai.
Ataatsimiititaliarli Naalakkersuisunut apeqqutinik arlalissuarnik nassiussivoq, akuersinnginnerminilu akissutisinissaminut utaqqilluni.
Danmarkip tapiissutinik taama tunniussinerani aningaasanut inatsimmi ukiumut aningaasartuutit qaffannissaannut killigititaasut eqquutinneqarnissaat, Naalakkersuisut qanoq qulakkeerniarneraat ataatsimiititaliap ilaatigut paaserusuppaa.
Danmark qanoq sivisutigisumik tapiissuteqartassanersoq, allakkani erseqqissumik allassimanngilaq, aningaasalli ukiunut sisamanut aningaasaliissutinit pissarsiarineqarlutik.
Aningaasaqarnermut naalakkersuisoq Múte B. Egede (IA) ukioq manna februaarip qulingiluaanni nalunaarpoq, Danmarkimi aningaasaqarnermut ministerip isumaqatigiissuteqarfigineratigut, napparsimasunut Nunatsinnit Danmarkimut katsorsartikkiartortariaqartunut aningaasartuutaasartut tunngaviusut, Danmarkip siunissami akilertalissagai.
