Aasaanerani nalunaaquttap atorunnaarsinneqarnissaaa kiisalu maannakkut nalunaaquttap atuuffiata attatiinnarneqarnissaa siunnersuutigineqareertorlu akerliussutsimik takutitsinisamut kajumissaarivoq.
Inatsisartut Inatsisinut Ataatsimiititaliaata siunnersuutigaa aasaanerani nalunaaqutaq atorunnaarsillugu maannakkutut nalunaaqutaqartarneq ingerlaannassasoq. Ataatsimiisitaliap siunnersuutaa pillugu siornatigut politikkeriusimasoq Qupanuk Olsen akilerliussutsimik takutitsisoqarnissaanut aggersaavoq.
Sapaatip akunnerani matumani marlunngornermi Inatsisartut piffissap allanngortinneqarnissaanut siunnersuut, tassa UTC-3-mut, 2023-mi marsimi allannguisoqartinnagu atorneqartumut, uternissamut siunnersuut oqaluuserissavaat.
Siunnersuut Inatsisinut Ataatsimiititaliamit suliarineqarpoq, maannalu ataatsimiititaliaq maannakkut piffissaq atorneqartoq attatiinnarneqassasoq inassuteqaateqarpoq, akerlianik amerlanerussuteqartut kissaatigaat aasaanerani nalunaaqutaq atorunnaarsinneqassasoq.
Ataatsimiititaliami amerlanerussuteqartut isumaliutissiissumminni allapput aasaanerani nalunaaqutaq januaarip aallaqqaataanit 2027-mi imaluunniit kingusinnerpaamik januaarip aallaqqaataannit 2028-mi atorunnaarsinneqarnissaa kissaatigineqartoq.
Ataatsimiititaliami amerlanerussuteqartut tassaapput partiit naalakkersuisooqatigiit Demokraatit, Inuit Ataqatigiit aamma Atassut.
Partii illuatungiliuttut Naleraq ataatsimiititaliami ilaasortaavoq amerlanerussuteqartullu tapersersornagit.
Politikeriusimasoq akerliussutsimik takutitsiniarpoq
Ataatsimiititaliap isumaliutissiissutaa pissutigalugu politikeriusimasoq Qupanuk Olsen marlunngornermi Inatsisartuni oqaluuserineqartinnagu ataasinngornermi ullup-qeqqanut akerliussutsimik takutitsinissamik kajumissaaruteqarpoq,
- Nalunaaqutap UTC -3-mut utertinneqarnissaa nikisissaarneqarnissaalu amerlaqisugut kissaatigigipput Inatsisartunut takutinniarlugu, Qupanuk Olsen Facebookimi allappoq
Facebookikkut allaaserisaa 393-eriarluni siammarterneqarpoq, tamatumanngalu erserpoq piffissaq pillugu oqallinneq inuppassuarnit soqutigineqartoq.
Ataatsimiititaliap niuertut akerlilersuinerat maluginiarpaa
Ataatsimiititaliap maluginiarpaa inunnut ataasiakkaanut nalunaaquttap allanngortinneqarneranut aasaaneranilu ukiuuneranilu nalunaaquttamik atuinermut tunngatillugu malunnaateqarsinnaasut qanoq annertutiginersut nammineq aalajangiiffigineqangaatsiartartoq, Ataatsimiititaliap isumaliutissiissutaani allassimavoq.
Aammattaaq ataatsimiititaliap maluginiarpaa tusarniaanermut akissutit ilaanni erseqqissarneqartoq tamanna aningaasaqarnikkut kingunerlutsitsissasoq, assersuutigalugu inuussutissarsiortunut takornariaqarnermullu.
- Minnerunngitsumik Air Greenland, nunammi tamalaat akornanni aqqutinut attaviit ajornerulissammata. Tamatuma Kalaallit Nunaat takornarianut inuussutissarsiortunullu orniginannginnerulersissinnaavaa, tamannalu isertittakkanik annikillisitsisinnaalluni., Inatsisinik Ataatsimiititaliaq isumaliutissiissummini allappoq.
UTC-3-mut uternissamik aasaaneranilu nalunaaqutaq atorunnaarsinniarlugu siunnersuutit piviusunngortinneqarpata, Europa Danmarkilu aasaanerani nalunaaquttap akunnerinik tallimanik nikingassusilissapput. Tamanna Kalaallit Nunaata Europami Danmarkimilu niuerfiunerpaanut toqqaannartumik ajoqusiissasoq, Sulisitsisut isumaqartut, isumaliutissiissummi allassimavoq.
Naleraq akerliliivoq
Partiip illuatungiliuttup Naleqqap ikinnerussuteqarluni oqaaseqaammi ataatsimiititaliami amerlanerussuteqartut aalajangiinerat akerlilerpaa.
Air Greenlandip nassuiaataa, tassa nalunaaquttap allanngortinneqarnerata billetsit akisunerulissutigissagaat, Naleqqap akueriumanngilaa:
"Naleqqap maluginiarpaa, inatsisissatut siunnersuummi, amerlanerussuteqartut itigartitiniarnerminnik ilaatigut tunngavilersuutigigaat, Air Greenlandip oqariartuutigigaa nal UTC-3-mut utertinneqassappat aningaasanik annaasaqartussaallutik, uffa Air Greenlandip uppernarsarsimanngikkaaa UTC-2-mut ikaarsaarnermi isertitaqarnerulersimallutik. Timmisartornermik angallassinikkut billetit takuunnaraanni, nalunaaqutap allanngornerani akikillinngillat. Taamaakkaluartoq suliffeqarfiup UTC-3-imut uternerup kingunerisaanik isertitassanik annaasaqarsinnaaneranik oqariartuuteqarnera ataatsimiititaliami amerlanerussuteqartuniit itigartitinissaminnik annertuumik tunngavilersuutigineqarpoq," Naleraq allappoq nangillunilu:
"Atlantikoq qulaallugugooq timmisartuussinermi sulisut pilersaarusiornerlu Danmarkimi najugaqarusummata - allaannginnami
nunatsinni innuttaasut tamarmik, Air Greenlandip aaqqissuussineranut naleqqussassagut, uffa suliffeqarfik kalaallit aallaavigalugit aaqqissuussaanini naleqqussartussaagaa."
