Naalakkersuisup Naaja H. Nathanielsenip (IA) immikkut ilisimasallit, ilaatigut spiralilersuisimaneq inuiannik toqoraanertut taaneqarsinnaaneranik naliliisussat, nalunaarusiartik tunniussimagaat februaarip tallimaani nalunaarutigaa. Taannalu tamanut saqqummiunneqartinnagu nalunaarusiaq nutserneqarlunilu suliffiup iluani ingerlanneqaqqaassalluni.
Naalakkersuisup nalunaarut allarluinnaq sisamanngornermi maanna saqqummiuppaa, tassa immikkut ilisimasallit suliatigut aaqqiagiinngissuteqarlutik marlunnut avissimasut, nalunaarusiarlu ataaseq tunniunnagu marluk tunniunneqarsimallutik.
Misissueqatigiit sisamaasunit marluk decembarimi januaarimilu suleqatigiinnit anipput, taakkulu namminneq nalunaarusiartik qallunaatut allataq tunniussinnaagaat akuerineqarlutik.
Nathanielsenip nalunaarusiat taakku marluk pillugit sooq oqaaseqanngila?
Sermitsiap naalakkersuisoq Naaja H. Nathanielsen (IA) nalunaarusiat taakku marluk pillugit paasissutissaq tamanut sooq saqqummiussimannginneraa aperaa:
- Qanoq iliornissarput naalakkersuisoqarfimmi oqaloqatigiissutigeqqaarnissaa pisariaqartissimavarput. Ilisimatusartut nalunaarusiamik naliliiffigineqarnissaat ajorinnginneraat aamma inisseqqaartariaqarsimallugu, Naaja H. Nathanielsen oqarpoq.
Nalunaarusiat taakku marluk ilisimatusartunit allanit nalilersorneqassasut aalajangersimallugu aamma oqarpoq.
Nalunaaruteqapallannermiit erseqqissumik pilersaarusioqqaarusussimanerarpoq:
- Ilisimatusartut taamaliornissarput ajorinnginneraat oqaloqatigeqqaarpavut, taavalu allanik misissuisussanik pissarsioqqaartariaqarluta.
- Maannakkut nassaareerpugut, taamaattumik toqqissimallunga nassuiaateqarsinnaanngorlungalu qaqugu saqqummiussinissatsinnut naatsorsuuteqarnerput nalunaarutigisinnaanngorpara. Maajimi pinissaa naatsorsuutigaarput, Naaja H. Nathanielsen oqarpoq.
Naalakkersuisut aalajangigassarinngikkaat
APEQQUT: Naalakkersuisunut qaqinneqarpara, imaluunniit illit nammineq aalajangingaraajuk?
- Taamatut iliuuseqarfiginissaa uanga aalajangingaraara, taamaattorli Naalakkersuisuni suleqatinnut oqaloqatigiissutigeqqaarpara.
- Aalajangiineq pillugu allagaatinik soqanngilaq, kisianni suliaq ingerlateqqittarpara paasissutissittarlugillu. Inatsisartut ataatsimiititaliaat ullaaq manna aamma paasissutissinneqarput, taamaalillutik taakkua suliaq pillugu aamma ilisimatinneqarput, Naaja H. Nathanielsen oqarpoq, nangillunilu:
- Nalunaarusiat pillugit oqallinnermi nalunaarusiat tunngavigineqartut apeqquserneqarsinnaanersut apeqqutaatinnagu, kisianni taakkua imarisaat oqallisigineqarnissaat qulakkeerniarpara.
Nalunaarusiat assigiinngissutaat
Naaja H. Nathanielsenip nalunaarusiani marlunni inerniliussat assigiinngilluinnarnersut oqaaseqarfigerusunngilaa, imatulli oqarpoq:
- Ilisimasat isertuukkusunngilakka. Oqaluuserineqarnissaa kissaatigilluinnarpara, isumaqarpungali kukkusoqarsimanera imaluunniit periaatsit ilaannikkut eqqunngitsuunerat oqallisigineqassappat iluaqutaanavianngitsoq.
- Soorunami assigiinngillat, isumaqatigiikkunnaarsimappummi. Suliatigut aaqqiagiinngissuteqarunik soorunami taamaassagami.
Qinersinissaq sioqqullugu aalajangertoqartoq
APEQQUT: Qinersineq pissutigalugu nalunaarusianik saqqummiusserusunnginnerarneqarpusi. Qanoq taanna isumaqarfigaajuk?
- Periutsit aamma suliat naliliiffigineqarlutik nalunaarusiat marluutillugit ilisimatuunit allanit naliliiffigineqarnissaat qinersinissaq suli suaarutigineqanngitsoq aalajangerneqarpoq.
- Decembarip qaammataaniili unammilligassaq piusoq nalunngilarput, tassami immikkut ilisimasallit ilaat tunuarmat taanna immikkut ittumik ilanngussaqarsinnaasoq isumaqatigiissutigisimavarput. Tassami arlaannaataluunniit naliliinera ilanngussineralu mattukkusunnginnatsigu.
- Januaarimi tullia tunuarpoq, taava marluullutik ilanngussaqarusussinnaanersut oqaloqatigiissutigaarput, Naaja H. Nathanielsen oqarpoq, nangillunilu:
- Qinersinissap suaarutigineqarnissaa sioqquterujussuarlugu suliaq tamanna aallartippoq, taamaammallu qinersinissamut nunallu assigiinngitsut akornanni politikimut aamma USA-llu Kalaallit Nunaannik soqutiginninneranut attuumassuteqanngilaq.
- Uannut tassaaginnarpoq immikkut ilisimasallit sisamat tamarmik suliaannik akornutaanngitsumik isumaqatigiinnginneq aaqqinniarsarinissaa.
