Nukarlernut ullut atuarfiusut akunnerillu ikinnerit

Naalakkersuisut atuarfik pillugu inatsimmi annertuumik allannguinissap partiit naalakkersuisooqatigiinnissamut isumaqatigiissutiginikuusaat piviusunngortinnialeruttorpaat.

Meeqqat atuarfiini nukarlerni aaqqissuussineq nutaaq atuutilersinniarneqalersaarpoq, tamatumalu saniatigut 9. aamma 10. klassimi atuartut inuussutissarsiutinut sammisumik ingerlataqarnissamut neqeroorfigineqartalissallutik.

- Inatsisip allanngortinnerani siunertaq tassaavoq tamakkiinerusumik sammisumik sulinermullu qaninnerusumik atuarfimmik qulakkeerinissaq, atuartut nukarlerni oqaatsitigut matematikkimilu piginnaasaat nukittorsarneqarlutik peqatigisaanillu angajullerni piviusorsiortumik kajumissaasumillu ilinniartitsinissamik neqeroortoqarluni, Naalakkersuisut allapput.

Atuartut nukarliit

Atuartut nukarliit malunnaatilimmik allannguiffigineqassapput.

Atuartitsinermi nalunaaquttap akunneri 700-nit 560-inut ikilisinneqassapput, ullunut 180-inut agguataarneqassallutik. Ullumikkut nalunaaquttap akunneri 700-t ulluni 200-niit 240-nut agguataarneqartarput. Ullut atuarfiusut atuartunut akullernut angajullernullu atuutiinnartinneqassapput, taakku ulluni 200-niit 240-nut atuartussaatitaapput.

Atuarfimmi nalunaaquttap akunneri ikilisinneqarnerat atuartitsissutigineqartut amerlassusaannut allannguuteqassapput, imatullu agguataarneqarlutik:

Ilinniartitsissutigineqartut uku atorunnaarsinneqarput

Tamanna isumaqarpoq meeqqat atuarfianni nukarlerni "oqaatsit“ kalaallisut kisiartaallutik atuartitsissutaasalissapput.

Aamma "kulturi inuiaqatigiilerinerlu“, tassaasut inuiaqatigiilerineq, oqaluttuarisaaneq, upperisarsiorneq isumaliutersortarnerlu, atuarunnaarsinneqarsimapput.

Atuartitsissutit pingajuat, "matematikki pinngortitalerinerlu“, aamma allannguuteqarpoq matematikki kisimi atuartitsissutigineqalissalluni.

Inatsisissatut siunnersuutip oqaaseqaataani erseqqissarneqarpoq tuluit oqaasiisa pingaaruteqannginnerulernissaat siunertarineqanngitsoq, aamma "kisiannili periusissiornikkut atuartitsissutip nukittorsarnissaanut atatinneqarluni".

- Siunertaq tassaavoq atuartut tuluit oqaasiinik atuartinneqarnissaat sioqqullugu atuartut atuarnermi, allannermi kisitsinermilu kiisalu kalaallit oqaasiini matematikkimilu tunngaviisa nukittunerulersinnissaat. Tamatuma peqatigisaanik qulakkeerneqassaaq tuluit oqaasii oqaatsit sukkasuumik siuariartorsinnaaneri pissutigalugu kalaallit oqaasiinik inangiinnginnissaat.

Kinaassutsimik ilisimaarinninneruneq

Naalakkersuisut inatsisissatut siunnersuutip nutaap suliarineqarneranut atatillugu meeqqat atuarfiat qanoq iliorluni kalaallit kinaassusianik, kulturiannik ataatsimoornerannillu ineriartortitsinissamut sunniuteqarsinnaanersoq "nunap inuisalu pilersikkiartornerannut" peqataasinnaanersoq nalilersorpaat. Taanna naalakkersuisoqatigiit isumaqatigiissutaanni aamma ilaavoq.

Nunap inuisalu pilersikkiartornerannut immikkut ilinniutissatut uku tunngavigalugit taamaatinneqartut:

- Naliliisoqarpoq nunap inuisalu pilersikkiartornerat atuartitsissutitut immikkoortutut pilersinneqarnera atuartut ulluinnaanni ilinniarnerannilu piviusumik tunngavilerneqanngitsumik piumasarineqartutut iluseqalersinnaanera. Atuartitsissummi immikkoortut soorlu kulturikkut oqaluttuarisaaneq, oqaluttuat, oqaluttuatoqqat, kinaassuseq, tarnikkut peqqinneq akisussaassuseqarnerlu atuarfiup siunertaanut annertuumik attuumassuteqartutut nalilerneqarmata, taamaattumik taakku iluaqutaasumik atuartitsissutini assigiinngitsutigut ilaatinneqartariaqarlutik.

- Taamaaliornikkut sammineqartut tamakkiisumik sammitinneqartumut ataqatigiissumik ilanngunneqarsinnaapput, kalaallit pingaartitaat, oqaluttuarisaanerat, oqaasii inuiaqatigiinnillu paasinninneq kinaassutsimik, nammineq naleqarnermik qajannaatsuunermillu atuartut inerikkiartornerinut atassuserneqarsinnaallutik. Tamanna tunngavigalugu nunap inuisalu pilersikkiartornerat atuartitsissutini tamani atuartitsinermi ilaalluni immikkoortutut ilaassasoq siunnersuutigineqarpoq.

2030-p aallartitsinnangu allannguutit atulersinneqarnissaat siunertarineqarpoq.

Angajullerni atuartut inuussutissarsiutinillu klassi

Meeqqat atuarfianni angajullerni (9. aamma 10. klassini) ilinniartitsissutip inuussutissarsiornermut tunngasuusup atulersinneqarnissaa sivitsortumik kissaatigineqarpoq, atuarfimmi ilinniartitsineq nalinginnaasumik ingerlanneqartartoq suliffimmik misiliilluni ilinniartitsinermik taarserneqassalluni.

Kommunit – oqartussaasunut pineqartunut qinnuteqareerunik – inuussutissarsiornermut tunngasunik ilinniartitsissutinik neqeroorfigineqarsinnaapput, ilinniartut suliffimmi misilittagaqartinniarlugit.

- Peqatigisaanik aaqqissuussinerni siunertaavoq angajullerni atuartut atugarissaarnerat kajumissusiilu nukittorsarneqassasut, annertunerusumik allanngorarnermik pilersitsillutik aamma atuarfiup suliffeqarfiillu akornanni ikaartarfiliisoqarluni. Aaqqissuussinerit imatut aaqqissuunneqarsinnaassapput atuartut sapaatip akunneranut ulluni ataatsimi, marlunni suliffeqarfimmiissinnaallutik, inuussutissarsiornermut ilinniarfimmiissinnaallutik imaluunniit atuartup atuarfiani aaqqissuunneqartumi suliffimmi sungiusarsinnaallutik.

Kajumissutsimik nukitsorsaaneq

Inuussutissarsiutit pillugit klassit siunertaraat ilinniartut nalinginnaasumik atuarfimmi ingerlalluanngitsut kajumissuseqalersinneqarnissaat, aamma inuusuttut amerlanerusut inuussutissarsiornermik ilinniagaqarnissaannik kajumilersissinnaanissaat.

Tassani allassimavoq uku atuutissasut:

Kommunip inuussutissarsiummik aalajangersimasumik ilinniartitsisoqarnissaanut akuersissuteqartinnani, kommunalbestyrelsip ilinniagaqarfiit assigiinngitsut imaluunniit allamik ilinniagaqarfinnik inuussutissarsiornermut tunngasunik neqerooruteqartoq isumaqatigiissuteqarfigereersimasariaqarpaa. Aammattaaq kommunip pisussaaffigaa suliffimmi ilinniarfinniluunniit ilinniartitsineq nakkutigissallugu.

Siunnersuutinut tusarniaaneq 2026-mi februaarip qulingat tikillugu ingerlanneqassapput.