Kalaallit meerartaat qallunaatut ilikkartigatik tuluttut oqalussinnaalissappat?
Inatsisartut taama isumaqarput.
Jens Napãtôp (N) meeqqat atuarfianni allamiut oqaasiinik atuartitsinermi tuluttut oqaatsit salliunneqalernissaannut Inatsisartunut siunnersuutaa ullumi oqaluuserineqarpoq.
Naalakkersuisullu allannguutissatut siunnersuuteqaraluartut akuersissutigineqartumik, atuartitsinermi tuluttut minnerunngitsumillu kalaallisut atuartitsinerit nukittorsarneqarnissaat isumaqatigiissutigineqangaatsiarpoq.
Naalakkersuisut kalaallit oqaasiisa inissisimaffiata atorneqarneratalu nukittorsarneqarnissaat attatiinnarnissaallu siunertaralugu meeqqat atuarfianni kalaallisut tuluttullu atuartitsinerup nukittorsarneqarnissaanik iliuusissatut pilersaarusiornissaat allannguutissatut siunnersuutigineqarpoq.
Iliuusissatut pilersaarut kingusinnerpaamik 2027-mi upernaakkut ataatsimiinnermi saqqummiunneqassaaq.
”Danskit oqaasii atuartitsinermi pingaartutut inissisimanerminnit annikinnerulerumaartussaasut"
Siunnersuut oktobarimi 2025-mi siullermeerneqarmat ilinniartitaanermut, kultureqarnermut, timersornermut ilageeqarnermullu naalakkersuisoq Nivi Olsen (D) Ilinniartitaanermut Naalakkersuisoqarfik Ilinniartitaanermullu Aqutsisoqarfik meeqqat atuarfianni kalaallisut tuluttullu atuartitsineq qanoq nukittorsarneqarsinnaanersoq misissuleruttoraat oqarpoq.
- Tamannalu aamma isumaqarpoq danskit oqaasii atuartitsinermi pingaartutut inissisimanerminnit annikinnerulerumaartussaasut, oqarpoq.
Nivi Olsenip Oqaasileriffiup kalaallit oqaasiisa inuiaqatigiinni kulturikkullu immikkut tunngaviunerisa attatiinnarneqarnissaannut mianersorfissaq pingaaruteqartoq tikkuarnikuugaa oqaatigaa.
- Oqaasileriffiup ilaatigut erseqqissaatigaa, tuaviuussamik allanngortiterineq, tassa tuluit oqaasiisa nunami allamiut oqaasiisut ingerlaannartumik atuutsilerneqarnerat tamatumunngalu peqatigitillugu danskit oqaasinik atorunnaarsitsineq, kalaallit oqaasiisa inissisimanerannik atugaanerannillu sanngiillitsisinnaasoq, oqarpoq.
Isumaqatigiilluni akuerineqartoq
Partiit ullumi ataatsimiinnermi nuannersumik nipeqarput, apeqquteqartullu Jens Napãtôp siunnersuutaa pillugu nersualaarpaat akuersissutigineqarneranilu pilluaqqullugu.
- Siunnersuuteqartutut pilluangaarit, taamaalilluta Inatsisartut ataatsimoorfigaarput.
- Alloriaqqinnissarput piffissanngorpoq, Nivi Olsen oqarpoq.
21-t allannguutissatut siunnersuut akueraat. Akerliusoqaranilu taaseqataasoqanngitsoqanngimmat allannguutissatut siunnersuut akuerineqarpoq, taamaalilluni aalajangiiffigisassatut siunnersuut allanngortinneqarsimasoq akuerineqarluni, Inatsisartut siulittaasuata tullia Mimi Karlsen oqallinnermi aqutsisoq oqarpoq.
Naleqqamiit siunnersuutigineqartup iliuusissatut pilersaarummi ilanngunneqassasut qularutiginnginnamikku Naalakkersuisut allannguutissatut siunnersuutaat aamma akuerineqarpoq.
