Angutip Amerikamiuusorisap minnerpaamik innuttaasut marluk Nunatta USA-mut ilanngunneqarnissaanut 200.000 dollarinik akilerlugit atsiortikkumagai Sermitsiami pingasunngornermi unnukkut allaaseraarput.
Politiit pingasunngornermi unnukkut pisimasoq oqaaseqarfigerusunngilaat, pigaartulli pisortaata Poul Kreutzmannip misissuisoqartoq sisamanngornermi ullaakkut uppernarsarpaa.
- Suliamut atatillugu nalunaarutiginnittoqarsimanera uppernarsarsinnaavarput, tamannalu politikkikkut pissutsinut maanna atuuttunut tunngassuteqarsinnaannginnerarsinnaanngilarput, Poul Kreutzmann oqarpoq.
Politiit pisoq misissuiffigineqartoq taanna oqarpoq.
Pisoq pillugu itisiliisinnaanngilaq, erseqqissarpaali politiit politikkikkut pissutsinut maanna atuuttunut attuumassuteqarsimagaluarpataluunniit nalunaarutigineqartut tamaasa assigiimmik suliarisaraat.
Pigaartut pisortat suliaq pillugu allamik ilassutissaqanngilaq.
Inuit marluk aningaasanik neqeroorfigineqartut
Innuttaasut ilaata Amerikamiumut tunngatillugu misigisani Facebookimi allaaserisaa pingasunngornermi unnukkut saqqummertoq uissuumissutigineqarpoq.
Tamatuma kinguninngua Sermitsiap innuttaasoq alla, aamma taamatut oqaluttuaqartoq, attaveqarfigaa. Taassuma Kalaallit Nunaata USA-mut ilanngunnissaa pillugu atsioruni 200.000 dollarsinik akileraarutitaqanngitsunik januaarimi tunniunneqartussanik neqeroorfigineqarsimanini oqaluttuaraa.
Angutip aappaanut USA-meersuunini oqaatigisimavaa.
Angutip suliai USA-p Nuummi sinniisoqarfiani ilisimaneqarnersut paasiniarlugit Sermitsiamit attaveqarfigaarput, Amerikamilu oqartussani sulisuunersoq apeqqutigalugu. Maannamut suli akissutisinngilagut.
