Savalimmiut inatsisartuinut Lgtingemut qinersinermi parti ileqqutoqqanik attassinissamut kissaateqartoq Fólkaflokkurin ajugaapput.
Parti 26,7 procentinit taaneqarluni qulingiluanik ilaasortaatitaqalerpoq, taamaalillunilu partiini anginersanngorluni.
Taamaasilluni 29-nik ukiulik, Beinir Johannesen, naalakkersuisunngortussanik nutaanik isumaqatiginninniarnerni siuttuusussatut inissippasippoq.
Lagmandinngussaagaluarpat Savalimmiuni lagmandit inuusunnersarissavaat.
Qineqqusaarutit
Inuussutissarsiornermik ineriartortitsinissaq aamma inissianik tuniniaanermi akit qaffakkiartorneranni ajornartorsiutit aaqqiiviginissaat, qineqqusaarnermini partiip Fólkaflokkurinip pingaarnertut anguniagarisimasaasa ilagaat.
Parti talerperliusoq Sambandsflokkurin-ip, qinersinermi 21,5 procentinik taaneqarnermigut arfineq marlunnik ilaasortaatitaqarnini attatiinnarpaa, taakkualu naalakkersuisooqatigiinnissamut isumaqatigiissusiorfiginissaat Beinir Johannesenimut pissusissamisuuginnarpoq.
- Partiit marluulluta assigiinngitsutigut isumaqatigiissuteqarsinnaavugut, ilaatigut inuussutissarsiornermut isumaginninnermullu politikkimut, Beinir Johannesen oqarpoq nangillunilu:
- Periarfissat tamaasa misissorniarpavut politikkerpullu sapinngisamik annertunerusumik akuutinneqarnissaa anguniasallugu.
Siornatigut illuatungiliuttuusut
Partiit taakku marluk naalakkersuisoqatigiilernissaat, Sambandsflokkurinip siulittaasuata Bárður á Steig Nielsenip aaqqiissutissatut isigaa.
Fólkaflokkurin aamma Sambandsflokkurin, 2022-mi qinersisoqarneraniilli illuatungiliuttut, ataatsimut isigalugit 16-inik ilaasortaatitaqarput.
Naalakkersuisunngortitsinissaq anguniarlugu Lagtingimi ilaasortanit 33-usunit amerlanerussuteqartut minnerpaamik 17-iusariaqarput.
Taamaattumik partiit taakku marluk kisimiillutik naalakkersuisunngortitsisinnaanngillat.
Parti socialdemokraatiusoq Javnaðarflokkurin, maannamut Savalimmiuni naalakkersuisuni siuttuusoq, pingasunik ilaasortaatitaqarunnaarpoq qinersisartunillu 18,9 procentinit qinerneqarpoq.
Partiip siulittaasuata lagmanditullu tunuartup Aksel V. Johannesenip Fólkaflokkurin Sambandsflokkurinilu naalakkersuisooqatigiinnissamut isumaqatigiissuteqarfigissanerlugit suli oqaatigiumanngilaa.
- Partiit aamma partiinni ilaasortaatitaqatikka nutaat maanna oqaloqatigisariaqarpakka, qinersinerup naammassinerata kinguninngua oqarpoq.
Periarfissaq alla
Aamma Tjóðveldi saamerleq naalakkersuisooqatigiinnissamut isumaqatigiissusiorfigineqarnissaat periarfissaavoq.
Savalimmiut namminersulivinnissaat partiip kissaatigaa, soorluttaaq Fólkaflokkurin aamma Javnaðarflokkurin taama kissaateqartut.
Sambandsflokkurinili akerliuvoq.
- Tjóðveldi Sambandsflokkurinilu imminnut akerleriipput, taamaattumik Tjóðveldip naalakkersuisooqatigiinneq peqataaffigisaa salliullugu sulissutigineqanngilaq, Bárður á Steig Nielsen Sambandsflokkurinimeersoq oqarpoq.
Aamma partiit mikinerit pingasut ilaat naalakkersuisunngortitsisinnaavoq — tassalu socialliberalit Framsókn, kristumiut Miðflokkurin aamma namminersorlutik oqartussat namminersorlutillu oqartussanik partii illersuisoq Sjálvstýr .
Savalimmiuni qinersinermi qinersisinnaasut 39.000-init amerlanerusut 89,5 procentii taasiartorput.
/ritzau/
