USA-p præsidentiata sisamanngornerup unnuaani Kalaallit Nunaat eqqaaqqippaa, tamatumuuna inuit attaveqaqatigiittarfianni Truth Socialimi.
Allaaserisami naatsumi angisuunillu naqinnilersukkami Nato isornartorsiorpaa.
- Pisariaqartitsigatta Nato najuutinngilaq, pisariaqartitseqqileruttalu aamma najuunnavianngilaq.
- Kalaallit Nunaat eqqaamajuk, sikuinnaq aqunnerlunneqartoq, Donald Trump allappoq.
Trump USA-p Iranilu sakkussiaarutsitsigallarnissamik isumaqatigiissuteqarsimanerisa kingorna pingasunngormat Washington D.C-mi NATO-p generalsekretæria Mark Rutte ataatsimeeqatigigamiuk taama oqarpoq.
Ritzau naapertorlugu Rutte Natomi nunat ilaat Kangiani Qiterlermi pissutsinut tunngatillugu kukkusimasut isumaqarluni kingusinnerusukkut tusagassiorfimmut CNN-imut oqarpoq.
Sapaatip-akunnerani matumani aappassaanik oqaaseqartoq
Donald Trumpip Natomik sakkortuumik isornartorsiuinermini Sapaatip-akunnerani matumani Kalaallit Nunaat aappassaanik ilannguppaa.
Ataasinngornermi tusagassiortunik katersortitsinermi, Iranimut sorsunneq pillugu pisussaagaluartumi, aamma taama pisoqarpoq.
Trumpip NATO USA-mik ikiuinnginnerarlugu tusagassiorfinnik katersortitsinerup naalernerani isornartorsiorpaa, imalu nangilluni:
- Ilumoortoq tusarusukkussiuk tamakku tamarmik Kalaallit Nunaannut tunngassuteqarput. Kalaallit Nunaat piumavarput. Tunniukkumanngilaat, uangalu inuulluaqqusivunga, Trump ataasinngornermi oqarpoq.
Ajornartoortoqaleqqissava?
Trumpip taamatut oqarnera Kalaallit Nunaanni immikkut aallartitani Jeff Landry suleqatigalugu “umiatsiamik napparsimmavilimmik” napparsimasunik katsorsaasartussamik Kalaallit Nunaannut aallartitsiniarluni februaarip 22-anni nalunaareerluni piffissap ilaani Kalaallit Nunaat pillugu oqaaseqanngereersoq pivoq.
Trump Kalaallit Nunaat Issittorlu pillugit, sivisuumik Kalaallit Nunaat piumasarigaluarlugu Nato-p generalsekretæria Mark Rutte isumaqatigiissuteqarfigereerlugu siusinnerusukkut januaarimi nalunaarpoq.
Tamatuma kingorna USA-p Kalaallit Nunaanni sakkutooqarnera pillugu USA-p aamma Kalaallit Nunaata/Danmarkip akornanni atorfilittat qaffasinnerpaaffianni isumaqatigiinniartoqarsimavoq.
Ilisimatooq: USA-p nunataa allissinniaraa
Tamannali naammaginngikkaa Trumpip oqaasiinit kingulliunerusunit erserpoq.
Trumpip Kalaallit Nunaat Amerikap nunataanut ilanngukkusukkaa ersarissiartuinnartoq Dansk Institut for Internationale Studierimi (DIIS) ilisimatooq seniori Rasmus Sinding Søndergaard pingasunngornermi Sermitsiamut oqarpoq:
– Trumpip sakkutooqarfiit aatsitassarsiornerlu soqutiginngilai. USA-p nunataata allilernissaa soqutigivaa, periaasiilu iluatsinngitsoorsimapput, tamannalu pakatsissutigisimavaa, Rasmus Sinding Søndergaard naliliivoq.
