Qaqortup mittarfiata nutaap ammarneqarnerata kinguneranik Narsarsuaq timmisartunut suluusalinnut mittarfittut Kujataanilu angallannermut qitiusutut ukiorpassuarni atorneqarsimasoq inuulluaqquneqarpoq.
Ukiuni qulikkuutaani nunaqarfiup inuisa mittarfik sorsunnersuup aappaata nalaani Amerikamiut sanasimasaat 1958-imilu sakkutuujunngitsunut atortussatut tunniunneqartoq inuussutissarsiutigaat.
Taamaattumik pingasunngornermi nunaqarfimmi timmisartoqarfiusumi ulloq alianarlunilu nalliuttorsiutaavoq. Inuit angalasut mittarfiup saani naapinneranni allanngortoqarnera malunnartillugu oqalugiartoqarpoq, kaffillertoqarlunilu qullilisoqarpoq. Oqalugiartut najuuttullu tussunngunerat takuneqarsinnaavoq.
Naalakkersuisoq: Narsarsuaq immikkorluinnaq ittuuvoq
Ineqarnermut attaveqaasersuutinullu naalakkersuisunngorlaaq Iddimanngiiu Jensen Bianco (IA) oqalugiaqqaarpoq.
- Qaqortumi mittarfiup ammarneqarnera Narsarsuup naggatigissarinngilaa. Qaqortumi mittarfik attaveqaasersuutit aaqqissuunneqaqqinnerisa kinguneraa. Narsarsuaq immikkorluinnaq ittuuvoq, ukiunilu qulikkuutaani mittarfik qitiutillugu ineriartorsimalluni.
- Narsarsuaq qulimiguulinnut mittarfittut atortussanngortinneqaraluartoq Narsarsuup oqaluttuarisaanerata ingerlaqqinnissaa nuannaarutigaara. Angallassinerit Narsarsuarmiit Qaqortumut nuunneqarnerisa iluatsilluarnerat nuannaarutigaara, Iddimanngiiu Jensen Bianco oqarpoq.
Borgmesteri: Narsarsuarmi periarfissat suli misissorpavut
Kommune Kujallermi borgmesteri Malene Vahl Rasmussen (D) tulliulluni oqalugiarpoq. Oqalugiarnermini qullilisinnaanini siulliullugu oqaatigaa.
- Matumi nutaamik ammaavugut, taamaasiornitsinnilu matumik aamma matusivugut. Narsarsuup oqaluttuarisaanera allanngorsimagaluartoq kommunimi suli Narsarsuaq pillugu suliaqarnissarput pisussaaffigaarput. Narsarsuup qanoq ineriartortinneqartuarsinnaanersoq suli nalorninarpoq, innuttaasullu periarfissat suli misissorivut nalussanngilaat.
Allanngussaaq allatulli ikkumaarluni
Naja Lund Narsarsummiut sinnerlugit oqalugiarpoq, Air Greenlandip siulersuisuini siulittaasumit pisortamillu aamma Greenland Airportsimi pisortamit Jens Lauridsenimit oqaaseqartoqarluni.
- Ulloq aliasuffiusoq qularutissaanngilaq, taamaappoq — aalajangiisoqarnikuugami.
– Kisianni aamma maani siunissaqarpoq. Narsarsuaq ukiorpassuit qaangiuppata suli maaniissasoq qularinngilara. Aqqut atorneqartoq allanngussaaq, allatulli ikkumaarluni, Jens Lauridsen oqarpoq.
Qulimiguulimmut suli mittarfiussasoq aamma oqaatigaa.
Oqalugiaatit kingorna Air Greenlandip timmisartuutaa Narsarsuarmiit naggammik aallarpoq. Inuppassuit silataanukarput tassanilu pisarneq malillugu Dash-8-p nalunaaqutaq 16.35 kingulliup qangattarnissaannut mittarfimmi biiliit isumannaallisaanermut atorneqartartut kalerrisaarutaat nipiliortinneqarput.
Najuuttut assilisaaripput, timmisartorlu aappalaartoq Narsarsuarmiit aallartoq kingulleq nuissat tungaanut qangattarmat peqataasut nipaangaarput.
