Unnerluussisoq: Kommune Kujalleq suliassaminut naleqqutinngilaq

Kommune Kujallermi akileraarutinik A-nik piffissaq eqqorlugu akiliisimannginneq “piaarinerunersoq annertuumilluunniit mianersuaalliornerunersoq” piillugu suliaq marlunngornermi ualikkut nanginneqarpoq.

Ilisimannittut tallimat kommuni aningaasaqarnikkut ajornartorsiortoq, aqutsinerluttoq akileraartartullu Kommune Kujalliup qaammatini qulini akileraarutinik A-nik kingusinaarluni akiliisimaneranik namminneq paasisaqarsimannginnertik pillugu ullup-qeqqannginnerani nassuiaapput.

Kalaallit Nunaanni Eqqartuussivik katersuuteqqimmat unnerluussisussaatitaasoq illersuisorlu suliami uppernarsaatinik saqqummiussipput.

Unnerluussisup Kristian Buskov Nierhoffip Kommune Kujalliup Akileraartarnermullu Aqutsisoqarfiup akileraarutinik akiliisimannginnermut akiligassiissutigineqartussat pillugit attaveqatigiinnerat saqqummiuppaa.

Tamatuma kingorna inaarutaasumik saqqummiipput, unnerluussisullu Kommune Kujalliup kingusinaarluni akiliisimanerminik ilisimanninnginnera upperinagu erseqqissarpaa.

Ingasappallaaqaaq

Kristian Buskov Nierhoffip Kommune Kujalleq suliffeqarfimmut innuttaasumulluunniit assersuuppaa. Kommunimi suliffeqarfiugaluarpat kommuni pisuusoq inuit tamarmik isumaqatigiissutigissagaat qularutiginngilaa.

Kommuni suliami tamatumani ingasattumik mianersuaalliorsimasoqoq taanna isumaqarpoq.

- Kommune Kujallermi ajornartorsiut siusinnerusukkut paasineqarsimanngimmat ingasappallaaqaaq. Suliassartik naammassisimanngilaat, taanna oqarpoq.

Unnerluussisup Kommune Kujallermi pisortaasimasup Tine Parsip nassuiaataa innersuussutigaa, tassani 2022-mi ataatsimiinneq Akileraartarnermut Aqutsisoqarfimmit kommunip akileraarutinik A-nik akiliinissamik eqqaamanninnissaanik oqarfigineqarsimanerminik eqqaasitsissutaasoq eqqaavaa.

Taava ullumikkut nalunerarlugu oqassanngillat,

Kommunip aningaasaateqarpallaarluni paasisariaqaraluaraa siunnersorti alla eqqartuussivimmi oqarsimasoq maluginiarpaa.

- Kim Rosendahlip piffissaq eqqorlugu akileraarutinik akiliinnginnertik ilisimalluarsimannginneraa upperiuminaatsippara, unnerluussisoq oqarpoq, kommunimilu aningaasaqarnermut pisortaasimasoq ullormi tamatumani siusinnerusukkut nassuiaasimasoq innersuussutigaa.

Kommunip, naalagaaffiunngitsoq, suliami aningaasartuutit akilertariaqarai Kristian Buskov Nierhoff naggasiivoq.

- Ukiorpassuarni sianilluanngitsumik iliorsimapput, maannalu akisussaaffimmik tigusiumanatik inuiaqatigiit aningaasaataat suli amerlanerusut atorlugit eqqartuussivimmut suliassanngortitsiput, taanna naggasiilluni oqarpoq.

Inatsit tamanut assigiissasoq

Kommune Kujallermi illersuisoq Charlotte Pedersen aperigaanni, allaanerulluinnartumik akivoq. Mianersuaalliorneq pineqartoq taanna isumaqarpoq.

Kommuni akileraarutinik akiliinngitsoorniarluni qaqugukkulluunniit pilersaaruteqarsimanngitsoq taanna nassuiaavoq. Tamannalu paasigamikku Akileraartarnermut Aqutsisoqarfik ingerlaannaq saaffigaat.

- Kommunip piffissaq eqqorlugu akileraarutinik A-nik akiliisimannginnerminnik ilisimanninneranut uppernarsaatissaqanngilagut, Charlotte Pedersen oqarpoq.

Kim Rosendahlip ilisimannittutut nassuiaataata ilisimannittut allat oqaasiinut naapertuutinngimmat sumiginnarneqarnissaa eqqartuussisumut qinnutigaa. Suliat sorliit pineqarnersut paatsiveerusimaarnera ernumassutigaa, aamma oqaluttuaa suliamut attuumassuteqanngitsoq isumaqarpoq.

Illersuisuttaaq Akileraartarnermut Aqutsisoqarfiup, ilisimannittut naapertorlugit, kommunip kingusinaarluni akiliisimanera pillugu kommunip nammineerluni saaffigimmani aatsaat paasigaa erseqqissarpaa.

- Akileraartarnermut Aqutsisoqarfimmut saaffiginninniarluni aalajangertoqarsimanngitsuuppat misissuiffigineqartudssanngortinneqarsimanaviannginnamik immaqa akiligassinneqarsinnaanngikkaluarput. Unneqqarissimagamilli akiligassinneqaput. Tamanna naapertuutinngitsoq isumaqarpunga.

Akileraartarnermut Aqutsisoqarfimmi sulisup kikkut kingusinaarlutik akileraarutinik akiliisartut Akileraartarnermut Aqutsisoqarfiup takusinnaanngikkai ullup ingerlanerani nassuiaatigimmagu, taamaattumillu kikkut akiligassinneqartarnersut nalaatsornerinnakkut aalajangerneqartarmat, illersuisup tamanna eqquiniaanermut assersuuppaa.

- Inatsit kikkunnut tamanut assigiissuteqartariaqarpoq. Kommuni akiligassinneqassappat piffissaq eqqorlugu akiliinngitsut tamarmik akiligassinneqassapput. Taamaattoqanngilarli, Charlotte Pedersen oqarpoq.

Akiligassiissutit qanoq naatsorsorneqartarnerat kukkummat akiligassiissutigineqartut annerpaamik 1,5 millionit koruuniussasut illersuisoq isumaqarpoq.

Kalaallit Nunaanni Eqqartuussivik tamatuma kingorna tunuarpoq. Suliarlu pillugu marlunngornermi apriilip 28-anni nalunaaqutaq qulinut eqqartuussut saqqummiunneqassaaq.