- Aalisarnermut akuersissutit suliarineqarnerat pitsanngorsarneqassaaq

Inatsisartuni Aalisarnermut, Piniarnermut Nunalerinermullu Ataatsimiititaliami ilaasortaq, Jens Napãtôᴋ', Naleraq, sinerissap qanittuani aalisarsinnaanermut akuersissutinik tunniussisarneq pillugu, Inatsisartut suleriaasianni paragraf 37 naapertorlugu Naalakkersuisunut apeqquteqarpoq. 

Aalisarsinnaanermut akuersissutinik qinnuteqaatit ilai sivisuallaartumik suliarineqartartut, taamaattumillu allaffissornikkut sulineq pitsanngorsaavigineqartariaqartoq, taanna isumaqarpoq. 

Ulrik Inuusuttoq Attumi umiatsiaararsortuuvoq. Taassuma aalisarnermut akuersissut nutaaq suli tigunngilaa, taamaattumillu ulloq manna tikillugu aningaasarsiorsinnaani, taassuma oqaatigaa.

Aalisarnermut, Piniarnermut, Nunalerinermut lmminullu Pilersornermut Naalakkersuisoqarfik piffissami kingullermi nappaalanermit eqqugaasimasoq, qinnuteqaatillu suliarineqarnerannut tamanna pissutaasinnaasoq, Nunalerinermut, lmminut Pilersornermut Avatangiisinillu Naalakkersuisoq, Peter Borg, Demokraatit, akissuteqarluni ilaatigut allappoq. 

Aammali qinnuteqaatit suliarineqartarnerat pitsanngorsaaviginiarlugu suliniutit ingerlanneqartut, taassuma erseqqissaatigaa.

Suliassaq marlunnut avinneqartartoq

Peter Borgip paasissutissiinera naapertorlugu, sinerissap qanittuani aalisarsinnaanermut akuersissutinik tunniussisarnermik suliassaq kommuninit aamma Aalisarnermut, Piniarnermut, Nunalerinermut lmminullu Pilersornermut Naalakkersuisoqarfiup akornanni avinneqartarpoq.

- Aalisartut tamarmik akuersissut ukioq kingulleq pigisamik assinga pissarsiariniarunikku, kommunip allaffianukarsinnaapput akuersissullu ingerlaannartumik pissarsiaralugu. Kommunit sulinerat imaluunniit suliap suliarineqarnerani piffissap sooq sivisunerusinnaanera Naalakkersuisoqarfiup paasisaqarfiginikuunngilaa, taanna oqarpoq.

lngerlatsisunut nutaanut, tassa siusinnerusukkut aalisarnermut akuersissummik peqarnikuunngitsunut, kiisalu 6 meteri sinnerlugit angallataatillit, qinnuteqaataat Aalisarnermut, Piniarnermut, Nunalerinermut Naalakkersuisoqarfimmit suliarineqassasoq, Aalisarnermut Naalakkersuisoq paasissutissiivoq.

Nappaalanermit eqqugaasoq

Sumiiffiit ilaanni aalisarnermut akuersissutit qinnutigineqartut sivisuumik suliarineqarsimasut, tamannalu sumik peqquteqarnersoq Jens Napãtôp ilanngullugu paaserusuppaa. Naalakkersuisoqarfik piffissami kingullermi nappaalanermit eqqugaasimasoq, qinnuteqaatillu naliginnaasumit sivisunerusumik suliarineqarnerannut tamanna peqqutaasinnaasoq, Peter Borg nassuiaavoq.

- Tamannali annerusumik sunniuteqartussaanngikkaluarpoq. Mailit pisoqaanerit takkuttut siulliullugit qinnuteqaatit suliarineqartarput.

- Saaffiginnissutit tamarmik akuersissummik qinnuteqaatitut suliarineqartanngimmata, qinnuteqaatit qassit suliarineqarnissaminnut utaqqinersut oqaatigisinnaanngilarput, Aalisarnermut Naalakkersuisoq akissuteqarluni oqarpoq.

Saaffiginnissutilli tamarmik Naalakkersuisoqarfimmiit suliarineqartarneri, taassuma erseqqissaatigaa.

Sapinngisamik sukkasuumik suliarineqartartut

Tunumi Kitaanilu aalisarnermut akuersissutinut qinnuteqaatit agguaqatigiissillugu qanoq sivisutigisumik suliarineqartarnersut, Jens Napãtôp ilanngullugu paaserusuppaa.

- Paasissutissat uppernarsaatillu tamarmik ingerlaannartumik nassiunneqarpata, pisarnertut ullut pingasut sisamallu iluanni qinnuteqaatit suliarineqartarput. Sulinerli immikkut tamaviaarfiutillugu, ullut qulit angusinnaasarpai. Tamanna suliassat suliarineqartarnerat pillugit inatsisimmi tunngaviusut iluaniippoq.

- Paasissutissat uppernarsaatillu piffissami qinnuteqarfiusumi tamarmik tiguneqarsimanngippata, akuttunngitsumik allaqatigeeqattaartoqassaaq, aatsaallu tamarmik tiguneqaraangata suliamik suliarinninneq aallartinneqarsinnaalersarpoq. Taamaattumik ullunik qulinik sivisusinnaanerunera pinngitsoorneqarsinnaanngilaq, Peter Borg naqissusiivoq.

Qinnuteqaatit nunap immikkoortuiniit suminngaanneerneri apeqqutaatinnagu assigiimmik suliarineqartartut akissummi erserpoq.

Assigiinngitsunik peqquteqarsinnaasoq

Aalisarnermut akuersissutinik qinnuteqaatit ilaasa kinguaattoornerat, soorlu angallatip nalunaarsorsimalernissaanik, CVR-ip amigaataanera, paasissutissanilluunniit pisariaqartinneqartunik nassiussinngitsoorsimaneq peqqutaalluni, suliap suliarineqarnera sunnerneqarsimasinnaasoq, Peter Borg paasissutissiivoq.

- Saaffiginnissutit tamarmik sukkanerpaamik suliarineqarnissaat Naalakkersuisoqarfiup tamatigut eqeersimaartumik anguniarpaa.

- Kisiannili aamma erseqqissassallugu pingaaruteqarpoq, aalisartut piffissami qinnuteqarfiusumi paasissutissat uppernarsaatillu tamaasa piareersimatissallugit qulakkiissagaat, kiisalu aalisarnissamik aallartinnginnerani sapinngisamik piffissaalluarnerani qinnuteqarlutik, naalakkersuisoq oqarpoq.

Pitsaanerulernissaa sulissutigineqartoq

Aalisarnermut akuersissutit suliarineqartarnerat pitsanngorsaaviginiarlugu Aalisarnermut, Piniarnermut, Nunalerinermut lmminullu Pilersornermut Naalakkersuisoqarfiup sulissutigiuarai, Peter Borg erseqqissaavoq.

- 2026-mi IT-mik pilersaarutitut suliniut annertooq ilaatigut pilersaarusiorneqarpoq, inernerissavaalu aalisartut amerlanerusut akuersissutinik erngiinnaartumik tunineqarsinnaanerat. Neriuutigineqarpoq allannguutit taakkua aalisartut 2027-mut akuersissummik qinnuteqannginnerini atuutilissasut, taanna oqarpoq.

Januaarip aallaqqaataa 2026 nallertinnagu aalisartut aalisarnermut akuersissutinik qinnuteqarnissaat, siorna decemberi qiteqquttoq Naalakkersuisuniit eqqaasitsissutigineqarpoq.

Suli aalisarsinnaanngitsoq

Attumi umiatsiaararsortup Ulrik Inuusuttup saarullinniarluni aalisarnermut akuersissummik qinnuteqaataa suli naammassineqanngimmat, aningaasarsiornera maannakkumut uninngavoq.

- CVR-issara suli iluatsissimanngitsoq paasitinneqarpunga, taamaattumik aalisarsinnaanermut allagartassara suli tigunngilara. Saarullinnut qassusereernikuugaluarpunga. Pisaqalaartaraluarpunga kisianni suli tunisisinnaanngilanga.

- Aalisarnermut inatsisip nutaap atuutilernerata kingorna aalisarnermut allagartap pissarsiariniarnera amerlasuunit nalorsaatigineqarpoq. Taamaattumik allaffissornikkut sullissineq maannakkornit pitsaanerusariartoq isumaqarpunga, taanna oqarpoq.

Royal Greenlandip Attumi aalisakkanut tunitsivianut Ulrik Inuusuttoq siorna saarullinnik tunisinerpaasimavoq.

Aalisarnermut akuersissutinik qinnuteqaatit sivisuallaamik suliarineqartarnerat Jens Napãtôp sakkortuumik isornartorsiorpaa, piaartumillu aaqqiisoqarnissaa, taassuma piumasaraa.