Saudi-Arabiap aatsitassani pingaarutilinni pingaarutilimmik inissisimalerumanerminut periusissiaminut atatillugu Kalaallit Nunaanni aatsitassat ilaanik aamma piumavoq.
Taama danskit tusagassiorfiat Danwatch allappoq.
Amerikamiut aatsitassarsiortitseqatigiiffiat Critical Metals Corp. januaarimi suliffeqarferujussuarmik Saudi-Arabiameersumik suleqatigiinnermik pilersitsinissaq pillugu isumaqatigiissutaagallartumik atsiorpoq.
Critical Metals Corp-ip Kalaallit Nunaanni Tanbreezimi suliniutaani aatsitassat qallorneqartut 25 procentiisa Saudi-Arabiamut assartorlugit tassani akuiaavimmi nutaami, illuatungeriit sanaartugassaani suliarineqartarnissaat, isumaqatigiissutip kinguneraa.
Sakkutuut atortuinik sanaartornermi atugassat
Aatsitassat akuiarneqareerunik USA-mut ingerlateqqinneqassapput, tassanilu sakkutuut atortuinik sanaartornermi atorneqassallutik.
Suliffeqarferujussuaq Abdel Hadi A. Al-Qahtani & Sons (AHQ) Saudi-Arabiamit suleqatigineqartussaavoq.
Critical Metals Corp-imik suliniummut 1,5 milliard dollars angullugit aningaasaliinissaq ilimagineqartoq, AHQ inuinnaat naapeqatigiittarfianni LinkedIn-imi allappoq.
Aaqqissuusseqqinnermik pilersaarut Vision 2030-kkut Saudi-Arabia ukiuni makkunani nunami aningaasarsiornerup uuliamit isertitamit pinngitsuuisinnaannginnera annikillisinniarlugu assigiinngiiaartunngortitsinermik ingerlatsivoq.
Saudi-Arabia pingaarutilimmik inissisimalerumasoq
Vision 2030-mi aatsitassarsiorneq Saudi-Arabiap nunap aningaasaqarnerani ingerlatsiviit pingaarnersaasa ilaattut erseqqissarneqarpoq, “aatsitassarsiornermillu ingerlatsinermi nalilinnik annertunerpaanik ineriartortitsinissaq iluaquteqarnissarlu” anguniagaavoq.
“Aatsitassat pingaarutillit ukiuni kingullerni nunarsuaq tamakkerlugu aningaasaliisarnerni aallunneqarput, Saudi-Arabiallu pilersuinermi aqqutini nutaani pingaarutilittut inissisimalernissani kissaatigigaa”, Robert Mogielnicki, Washingtonimi tænketankimi Arab Gulf States Institutemi analytikeri oqarpoq.
“Peqatigisaanik Saudi-Arabiap aatsitassani pingaarutilinni pilersuinermi aqqutini peqataanini inuussutissarsiutit soorlu illersornissap AI-llu ineriartortillugulu ikorfartornissaanut pingaaruteqartutut isigai. Atortussiassanik pisariaqartunik pissarsisinnaaneq nunamik aningaasaqarnikkut pilersaarusiornikkullu ungasinnerusoq isigalugu iluaqutsiivoq”.
Danwatch Kalaallit Nunaanni suliat pillugit suliffeqarfinnut marlunnut saaffiginnippoq, taakkuli utimut akissuteqanngillat.
