Tinderimi kinaassutsini qulingiluani sorliuit?

Tinderimut assit sorleq ikkutissanerlugu nalornisimavit?

Ajornanngippasikkaluaqisoq aalajangiisuusinnaavoq: Assit peqqutigalugu kaffisoqateqartussanngorpit, imaluunniit assimi angutingavit nerisassanik mamartunik nuannarisalik pisuttuarusaarnermillu?

Taamaattumik immikkuullarissuuniartarputit. Alpini sisorariarnermi assit toqqarpat. Seqinersiutitit qaanut inissillugit isigisarlu tamarmi aputaannaalluni. Ikinngutillu isumaqataavoq: »Taava kikkorpassuunerput assigissanngilatit.«

Immaqali isumaqarnittut taama immikkuullaritsiginngilatit.

Spaniami ilisimatusaammi nutaami paasineqarpoq Tinderimiittorpassuit ilisimasatsinniit assigiiaarnerujussuusut.

Ilisarnaatit qulingiluat

Qarasaasiaq Tinderimi assini tusindilikkaani misissuitinneqarmat ilisimatuut ilisimatusarfimmi Oberta de Catalunyameersut paasilerpaat ilumut naatsorsuutigisatsinniit nutaaliullaqqitsiginngitsugut. Immikkuullarinneq pinnagu amerlanerusugut ilisimanngisatsinnik immikkoortunut ilisarnartunut inissittarpugut:

Immikkoortut siulliit pingasut Tinderimiittut tamarmik 67 procenteraat. Imaappoq, Tinderimi atuisut misissuinermi ilaasut pingajorarterutai marluk immikkoortut sisamat arlaat toqqartarpaat.

Københavnip ilisimatusarfiani tarnip pissusaanik ilisimatuup Jesper Dammeyerip ingammik immikkoortuni annikinnerni marluk maluginiarpai: Seqinersiuteqartartut timillu ilaanik assitallit kiinartaqanngitsut.

- Immikkoortuni marlunni takoqquneq imminullu illersorneq noqqoruupput, nassuiaavoq.

Tamanna nalaatsornerinnaasorinngilaa, periusissiaavorlu ilisimaaralugu takuneqarlunilu imminut illersornerup akornanni oqimaaqatigiissitsiniarnertut.

- Seqinersiuseraanni imaluunniit taamaallaat timip ilaannaa takutillugu, tamanna pissangasaarineruvoq immaqalu soqutiginnilersitsilluni. Soorlu oqarniarluni: ’Takusinga, ingasaannaguli.’

Sooruna arnat angutillu assigiinneq ajortut?

Ilisimatusaammi immikkooqqissaartunik qulingiluanik sassartoqaannanngilaq, aammali assigiinngissutsinik annertuumik kikkut sumut inissinnerannut tunngasumik. Ingammik suiaassuseq aalajangiisuuvoq. Angutit arnanoortut pinngortitami assilisat toqqarusunnerusarpaat, pimoorusserpalaarlutik assiliivimullu isiginatik. Arnat angutinoortut qungujullutik assiliivik toqqarlugu isiginiartarpaat, timertik tamaat saqqumisoq assilisittarlutik timertillu takutinnerullugu.

Ilisimatuut misissuinermik suliaqartut tikkuarpaat taamatut pissuseqarneq ineriartornermik teorimik nassuiarneqarsinnaasoq: Itsarsuaq qaratsavut suli susoqarnissaanik aqutsisut. Isumaavoq angutit ilisimaarinngisaminnik inuiaqatigiinni inissisimanertik takutinniartaraat kiisalu toqqissisimaneq (pinngortitami pimoorusserpalaarlutik assilisinnerminni, arnalli meeqqiorsinnaaneq kajungerineqarnissarlu nittarsaanniartarlugu (qungujulanikkut timimillu sammineratigut).

Malthe Ryelli tamanna isumaqatiginngilaa. Københavnip ilisimatusarfiani angutaatissarsiorluni/arnaatissarsiorluni nittartakkat – dating apps - ilisimatusaatigisimavai, isumaqarlunilu kulturi uumassusilerinermit pineqarnerusoq.

- Soorunami uumassusilerineq pineqarpoq, soorunamilu ineriartorneq pineqarpoq. Tamannali dating appsimi assimik qanoq ittumik toqqaanermut annikitsuararsuarmik aalajangiisuusartoq isumaqarpoq.

Isumaqarpoq kulturi peroriartorfigisarput pingaarnertut aalajangiisuusartoq.

- Inuiaqatigiit, tusagassiuutit inuillu ileqqulersuutaanni ilinniartarparput qanoq dating appini imminut ilisaritittariaqarnersugut, nassuiaavoq.

Ukiutit aalajangiisuunerpaasarput

Taamaallaat suiaassutsivit kinaanersutit takutinneq ajorpaa. Ukiutit aamma pingaartupilussuupput.

Tarnip pissusaanik ilisimatooq Jesper Dammeyer naapertorlugu paasiuminarpoq qanoq ukioqarnersugut assini paasiuminarmat.

Taamaattoqarnerata takutippaa utoqqaliartortutut inuunerput qanoq imminut ilisaritinnitsinnut sunniuteqartiginersoq. Assimik toqqaanerput tassaanerulluni qanoq ukioqarnermik aqutsiniarsarineq, ilisimaarinngikkaluarlugu inuit attaveqaqatigeeriaasiannut naleqqussarluta, ukiutsinnut ’tulluartumik’ isigineqarsinnaasumik.

Ajattugaanissamik ernumaneq

Sooruna Tinderimi karseeqqani katersuuttartugut? Ilisimatooq Jesper Dammeyer naapertorlugu tamanna nassuiaruminarpoq: Assigiiaartoqarnissaa pisariaqartipparput. Asserpassuit qupperarneranni assit sukkasuumik aalajangiinissamut aqqutissaapput, paasillugu suniarnersut kikkuunersullu.

Uagut inuit suut tamaasa immikkoortiteqqissaartarpavut. Uiverfimmi inuunerput oqinneroqqullugu, ilisimatooq nassuiaavoq.

Aaqqissuussiniaannarlutali copy-pasterneq ajorpugut. Ernumassuteqarneq peqqutaavoq.

- Nalilersorneqarnissaq ernumagisarparput, Malthe Rye oqarpoq.

Nassuiaavoq dating appit peqqarniitsutut misinnarsinnaasut. Piaarinaatsoorlutit kukkusumik oqariartuuteqartooruit ajattugeelersinnaavutit. Taamaattumik inoqatit pissusaannut naleqqussarnissaq ilikkapallattarparput.

- Allaanerunissaq pinaveersaartarparput kukkusumik inissilluni allaanerusutut takuneqaqqunata.

Assersuutigaa anguterpassuit misillertarnermikkut ilikkarsimagaat assimik ilisimaneqarluartumik ikkussinnginnissaq, soorlu aalisagaq nammineq pisaartik tigumiarlugu tulluussimaarlutik assertik.

- Angut aalisakkamik nittarsaasoq takullugu allaanngilaq meeraq arnaminut unnersiortoq: ’Takuuk, kakkangaarama’, nassuiaavoq.

Ilisimatuut siunnersuutaat:

Taavami qanoq iliortoqassava Tinderimi assi nakkullugu eqqarsaraanni: ’Una ajunnginnerpoq?’ Inuit allat assiginiarsarineqassappat imaluunniit allaaneruniarsaraluni?

Ilisimatooq Jesper Dammeyer naapertorlugu taakku marluk taputartuukkaanni pitsaasuusinnaasoq.

Innersuussutigaa immikkoortuni qulingiluani sorliusinnaanerit paasiniaqqaassagit. Tassanilu maniguullutit inissillutit. Taamaaliornikkut allat kinaanersutit paasiuminartinnerussavaat tulluarnersutillu.

- Imminnut assingusut tulluarnerusarput, oqarpoq.

Aammali arlaatigut alutornartoqartariaqarpoq, nangilluni oqarpoq. Arlaanik allanik assiliiginnannginnernik takutitsisoq.

Pingaarnerpaavorli ingasattumik qujageqqusaannginnissaq. Sisorarumatuutut misigisassarsiullaqqissutut takuneqarniarsaralutit tassaanerullutilli angerlarsimaffimmi nalaasaarusunnerusoq, taava onlinemi kinaassutsit kinaassusivinnut tulluarunnaassaaq.

Tarnip pissusaanut tunngatillugu tamanna namminiussutsimut ungasinnertut taaneqartarpoq – ilisimatusarnermilu ersarissumik takutinneqarpoq assigiinngissut tamanna atugarliornissamut toraaginnavissoq, datinut nuanniitsunut pakatsinissamullu, piviusumik naapinnermi.

Naatsumik oqaatigalugu: Illiugit, piffissap ingerlanerani akilersinnaavoq.