Arnaata itigartitsinera tamanik allannguisoq: Pilersuisumi ukiut 50-it

Siimuup Aappilattumi 1950-ikkunni qiianersuaq nerisassaaleqisarnerlu peroriartornermini atugarai.

Illuikkiami anginngitsumi arni najugaqatigalugu peroriartorpoq. Arnaq ajaarigaluarpaa, taassumali naalungiarsuusorli nammineq pimisut tigullugu perorsarpaa.

Uimi piniartilluni ajunaarnerata kingorna akisussaaffik kisermaatilernikuuaa. Inuuneq imaannaanngilaq, kiassarneq nerisassallu naammanngillat.

Siimuulli maqaasineq kisiat eqqaamanngilaa. Arni malartitassaanngitsutut nukittuutut, uteriitsutut asanninnerujussualittullu ukiuni imaannanngitsuni napatitsisutut eqqaamavaa.

Nukittunera inuuneranut tunngaviliivoq. Illuikkiami qiianaqisumiit pisiniarfimmut kissalaartumut. Pilersuisumut matu ammaqattaarpoq, pisiniat ilassiorput pisiniartitsisullu nipaa ilisarnarluni. Simon Peterseniuna. Ukiut 50-it matuma siorna sulileqqaaramili suli tassani atorfeqarpoq - nunaqarfeerannguup pisiniarfiani ukiut 100-t affaat.

Simon Petersen Upernavimmi 1957-imi inunngorpoq.

- Sisamanik qaammateqarlunga kuisinnerma kingorna ajama maanna anaanattut isigisama meeravissiartaarimmanga Aappilattumut nuuppunga, Simon Petersen oqaluttuarpoq.

Siimuut taamanili Aappilattumi najugaqalerpoq, Upernavimmiit avannaata tungaanut 20 kilomerit missaannik ungasitsigisumi. Nunaqarfik ukiup aallartinnerani 158-inik innuttaqarpoq.

Siimuup Aappilattoq qaatuuppaa. Qimussit aputikkut ingerlaarnerisa nipaat eqqaamasaani siulliit ilaanniippoq. Angunni qimusseqatigaa, angut isikkuatigut eqqaamanngisaa, ilusiali eqqaamallugu. Qimusseq qimmillu eqqaamalluarpai.

- Mikisuararsuuvunga. 1959-imioqqooqaaq toquvoq, taava anaanagalu kiserngoruppugut, oqaluttuarpoq.

Aanaa illuata sanianni najugaqarpoq, Siimuullu angerlarsimaffiit taakku marluk paarlakaallugit uteqattaartarpoq. Angajoqqaaviminiik arfineq-pingasunik qatannguteqarpoq.

Anaanaa pinngorsaasua Dorthe Petersenimik ateqarpoq, Dorthennguarmillu taaneqartarluni. Katikkami Dorthennguaq Gabrielseninngorpoq. Maanna peerutereernikuuvoq.

Sannavimmi atualeqqaarneq

Simon Petersen Aappilattumi atuartuuvoq, taamanilu oqaluffimmi atuartitsisoqartarluni. Oqaluffiulli ikuallannerata kingorna sungiusimasat allanngorput.

Atuartitsineq allamut nuunneqartariaqalerpoq.

- Sannavimmi atualeqqaarpunga. 1965-imi, eqqaamavaralu nuannaralugu, oqarpoq.

Atuarfiusoq allaanerugaluarpoq, Siimuulli nunaqarfimmi atuartitaanera taamatut aallartippoq.

Taamani nunaqarfimmi atuartunut periuseq malillugu 4. klassit Danmarkimut atuariartortinneqartarput, taassumalu aamma atuariartornissaa piukkunneqarluni siunnersuutigineqarpoq. Arnaali killiliilluni itigartitsivoq.

- Sulissasunga oqarpoq, Simon Petersen oqarpoq.

Siimuup atuarnera sivikippoq, 4. klassimuinnarmi killippoq. Siimuut 1971-imi apersortippoq, kommunimilu siullerpaamik suliffittaarluni. Piniartunngornissaanut suut tamarmik aqqutissiuussigaluarput. Kommuunip piniutissaanik qaannamillu tunivaa. Arnaali allatut kaammattuivoq: Piniartunngussanngilaq.

- Ataataga pissutaavoq. Ataatama tumii atuaqqunngilai, oqarpoq.

Siimuup kommunimi ukiukkut nilattartunngorneranik kinguneqarpoq. Taamani imeqarniarneq ajornakusoorpoq, taamaammat ukiukkut nilattartoqarluni angerlarsimaffinnukaassuisoqartarpoq.

- Aasarmat Pilersuisoq inuusuttunik sulisussarsiortoq eqqaamavara, tassanilu sulilerlunga, Simon Petersen oqaluttuarpoq.

Aasaanerani suliffittut aallartitaq arriitsumik ineriartorusaarpoq. Aasakkut pisiniarfimmi taamani KGH-mi sulisarpoq, ukiukkullu kommunimi nilattartuusarluni.

1976-imi ukiuugaa allamik ingerlaffissaanik pisoqarpoq.

- Pisarnittut nilattarusaartunga nunaqarfimmi niuertorutsip ornillunga aperaanga KGH-mi aalajangersimasumik sulisunngorusunnersunga, oqaluttuarpoq.

Siimuut nuannaaqisoq arpaannaq anaanaminut oqariartorpoq.

- Suliffiga paarilluassaginga oqarfigaanga, ullaakkullu itiaartaqqullunga. Ajornanngippallu sulisartutut inooqquaanga, Simon Petersen oqarpoq.

Oqaasii puigukkiuppai. Ulloq taanna akisussaaffimmik tigusilluni pimoorussilerpoq, imminut anaanilu pilersorniarlugit.

Niuertutut ilinnialertoq

1970-ikkunni sulisartuuneq maannamiit allaaneruvoq. Atortunik sulinermi ikiortissanik soqanngilaq - pisiassat nammineq kiveriarlugit assartuunneqartarput. Nukinnik atuinissaq pisariaqarpoq, ullullu suliffiit timimut sunniuteqartarlutik.

- Suut tamarmik nukersorfiupput. Inuusulluni ajunngilaq, qungujulluni oqarpoq.

Siimuut suliffimminut takkutiaartarpoq sulininilu pimoorullugu. Ittuata takusinnaavaa. Aalaakkaappoq, sulilluarpoq naatsorsuutigineqarsinnaajuaannarlunilu.

Arriitsumik akisussaaffii amerliartuaarusaarput. Suliassai annerulerput, tatigineqarneruleriartorpoq suliffimmilu qaffakkiartorusaarluni. 1999-imi niuertutut ilinnialerpoq, ukiullu marluk qaangiummata naammassilluni.

- Pisiniarfimmi niuertutut ukioq manna 25-nngortorsiorpunga, Simon Petersen oqarpoq.

Niuertutut ukiorpassuarni sulinermini ajortut ajunngitsullu aqqusaarnikuuai. Ullut tamarmik oqitsuinnaaneq ajorput. Pisiniat naammagittaalliuutissaqarlutik takkuttarput, tassungalu tutsitsisarlutik.

- Niuertup kamaffiginissaa ilaatigut oqinnerusarsimagami, oqarpoq.

Kingumulli qiviaraangami taakku inituallaarneq ajorput. Pisut ilungersunartut akornanni nuannersut ipput, pisiniarfimmi illaqatigiinnerit, oqaluutilaarnerit, pisiniat sulisullu akornanni ataqatigiinneq sulinermi eqqaamasassaapput.

Siimuut sulisartuunini tamaat nioqqutissanik tuniniaasuinnaanngilaq. Aappilattumut ineriartortitseqataavoq, nunaqarfiullu ukiut ingerlanerini allanngoriartornera qanimut malinnaaffigalugu. Inuuneranut ilaasoq, ilusilersueqataaffigisaa.

- Inuusuttuullunga peqatigiiffinni aamma suleqataasarnikooqaanga. Nunaqarfiup kallerup inneqalernissaa 80-ikkunni suleqataaffigaara. Iluatsippoq. Piffissaq nuannersoq, oqarpoq.

Simon Petersen KNI A/S-imi ukiut qulit matuma siorna ukiuni 40-nngortorsiormat Dronningip nersornaasiuttagaanik sølvimik saqqarmiulerneqarpoq.

Anguniagassaata tullia

- Pilersuisuimi ukiuni 50-ini sulinikuunera ukioq manna januaarip 31-ani nalliuttorsiutigisinnaalerakku angorusutara anguara. Aappilattumi allamik taamatut angusaqartoqarnikuugunanngilaq, oqarpoq.

Ukiuni 50-ini sulinikuuneranut kommunip diplomi tunniummagu piffissaq unittuusivoq.

Inuuneranut ilusilersuisuunikut eqqarsaataani qaffakaapput. Ataaserlu eqqarsaataani qitiuvoq: anaanaa. Arnaq meeraanerani ulluni nipaatsuni unnuaannarmilu qiianartorsarni toqqissisimatitsisua.

Tamanik tunisisua. Qujamasunneq maqaasinermik akulik nipaatsumik misigaa, arni nukittoqisoq uteriitsuusimasorlu qamaniitippaa.

Siimuut nutaamik maanna anguniagaqalerpoq. Aappaagu 70-iliissaaq. Immaqa sulisartuujunnaarluni soraarninngussaaq, peqqissusaali apeqqutaajumaartoq nipikitsumik oqaatigaa.

Taamanikkussamut ulluinnai sungiusimasai ingerlarusaassapput. Ullaakkut arfineq-marlunut suliartortuaannarpoq, sisamallu missaani - ilaatigut kingusinnerusukkut - ullormi pisussaaffii naammassisarput. Sungiusimasaa allanngortiinnagassaanngilaq, soorlu piffissami sivisuumi taamaasimasoq ilimagisaaniilli sukkanaarsimaqisaa.

Ukiorpassuit sulisartuunikuunera timaani maanna malugineqarsinnaalernikuuvoq. Tassanngaannaq taamaalinngilaq, inuusukkunnaarnini timimini malugisinnaavaa.

Suliunnaaruni ilaqutai inuunerani qitiulissapput. Inooqatinilu Mina marlunnik qitornaqarput, maannalu ernutaqarlutillu ernutaqqiuteqarput inuunerannik kissalaamik asanninnermillu imaqartitsisunik.