Panini marluk qilalugaqatigigai

Paninnguup panini marluk, Petra aamma Naja Vena, Uummannap kangerluani angalaqatigai.

Niviarsiaqqat anaanartik piniaqatigerusukkamikku nuannaaqaat.Weekendiuvoq, meeqqallu atuartussaanngimmata Paninnguup piniaqatiginissai ajorinngilluinnarpaa. Taamaattumik eqqissiivillutik qilalugarniarsinnaapput.

Umiatsiat allat qimallugit ingerlaarput, qilalugarniartillunimi umiatsiat amerlasuut ataatsikkut aallaasaaleraangata navianarsinnaavoq.

Nillataarlunilu silaannarinnerata Paninnguup uluaanut qasilialaarpoq. Issinnera meeraaneranut angunni malillugu sikumi malerusaartarneranut eqqaanarpoq. Taamanikkut qimusseqatigiittarlutillu aalisartarput, aputip qeraarpalunnera qimmillu miaggoornerat suli eqqaamavai.

Qilalugaq tassanngaannaq puivoq, arnallu sukkaannaq tungaanut aallarput. Silaannaq tarajorsunnillunilu pissanganermik ulikkaarpoq. Umiatsiat allat amerlanngitsut qilalugaq aamma takuaat.

Qilalukkap sumut ingerlassanersoq Paninnguup naatsorsorniarsaraa. Umiatsiaq malinnit aalavallaarmat naalissinnaanngikkallarpaa, mallit taassuma naammagittarsinnaassusaanut soorlulusooq misileraasut. Tassanngaannaq qilalugaq umiatsiap siuninnguani nueriasaarpoq. Paninnguup tuugaava qanoq takitigalunilu kusanartiginersoq takusinnaavaa. Aallaavaa. Imarlu ingerlaannaq aappillerpoq – arferup eqqorsimaneranut takussutissaq.

Misigissuseq Paninnguarmut nuanneqisoq. Qilalugarniarneq nalunngereerpaa, uiminulli ikiortaasarnermigut. Ukioq manna siullerpaamik nammineq piniarpoq, taamaammallu qilalugarniarnera immikkuullarinnerulluni. Qilalugarujussuarmik pissaqalerlutik, ilaqutariillu tamarmik nerisassaqarnissaat kaffillernermilu mattallersinnaanissaat qulakkeerlugu angerlamukaarput.

Aalisartutut namminersortoq

Paninnguaq A. Qvist 37-nik ukioqarpoq, uini meeqqatillu Uummannarmiuullutik.

- 2017-imili ataannaavittumik aalisarnikuugaluarlunga ukiut apeqqutaallutik, 30-leereernikunut ajornalermat, akuersissutitaarneq ajulernikuugaluarama, Paninnguaq A. Qvist AG-mut oqarpoq.

Paninnguaq assigiinngitsuni sulisareerluni, ukiunilu arlalinni utaqqereerluni aalisartutut namminersortutut ukioq manna imminut taasinnaanngorpoq.

- Iluatsikkakku assorujuk aalisarniarsariinnaavippunga nuannaarujussuarlunga, oqarpoq.

Paninnguaq A. Qvist aalisartoorusukkami. Allanik suliffeqartareernikuuvoq, pisariaqarmalli taamaalluni.

- Meerartaajaarnikuugama qimattaqattaarpallaassanngikkukku nunami sulisariaqarnikuuvunga, oqarpoq.

Illup iluaniiginnarnissarli ajornakusoortippaa, ingammik aasarisseruttornerani silagitsillugu.

- Upernaakkut alianaattarnermik isersimalluni sulinissaq ajornakusoortittarpara. Silamiiginnarusunneq angalarusunnerlu akiugassaanngingajattarput. Illup iluani suliinnarluni itinngunarpallaarluni, Paninnguaq A. Qvist oqarpoq. Taanna aamma umimmanniartarpoq, puisinniartarpoq upernaakkullu uuttorniartarluni.

- Aalisarnerli pingaarnerutippara. Taamaallunga aamma qaqqamut pisorujussuarlunga tuttunniarusuppunga, suli misilinnikuunnginnakku, oqarpoq.

Sukataaneq tunniutiinnajuitsuunerlu angorusutamik piviusunngortitsissutaasinnaanerat Paninnguaq A. Qvistip takutippaa.

- Piniallaqqinnerpaanngilanga. Ullut tamaasa ilikkangaqartarlunga isumassarsiorfeqartarpunga. Pissanganartuaannarpoq, oqarpoq.

Qilalukkamik pernarnera

2019-iuvoq.

- Ukioq taanna pisaqaqqaarpiaratta uima aallaasaa tuugaartoorsuaq kapivara, Paninnguaq A. Qvist oqarpoq.

Qilalukkat qanoq amerlatigisut pisaqaqataaffiginikuunerlugit oqaatigisinnaanngilaa.

Qilalukkamik nammineq aallaallugu pisaqarsinnaaneq oqaasinngoruminaatsippaa, tulluusimaarutigisaqaali.

- Nammineq aallaallugu qilalugartaq, pilariarlugu angerlaassaq, meeqqat nererusutaat imaluunniit kaffillernermi sassaalliutigisinnaanera… misigissuseq nassuiaruminaappoq, Paninnguaq A. Qvist oqaluttuarpoq.

Pisaqarsimanerluni susaarsimanerluniluunniit angerlarnissaq siumut oqaatigereerneqarsinnaaneq ajorpoq.

- Nalunartuaannarpoq ukiumiit ukiumut qanoq pisaqarnissaq. Ilaanni uniuaanerpassuit. Iluatsitsinngitsoornerit, ilaannilu iluatsitassaanngitsoq iluatseriataarlugu. 2019-imiilli taamaallaat pisaqanngitsoorfituara siornaak pivoq, oqarpoq.

- Tulluusimaarneq. Arnat aamma qilalugarniarsinnaasut amerlannginnamik, taakkua ilagimmannga nuannaarutigaara, oqarpoq.

Piniarneq ulorianarsinnaammat qularneq isumakulunnerlu ilaatigut takkuttarpoq.

- Qilalugarniarfissanngoraangat eqqarsaatikka aallasalaarsinnaasarput. Ingammik meeraqarluni. Immaqa ukioq manna aallanngiinnaruma, meerannguakka, ajutoorumami? Kisianni ajunngitsumut saatinniartuaannarpara, Paninnguaq A. Qvist oqarpoq.

Mattak suaasat

Mattalaat, mattak suaasalik, mattaat mikisunik aggorlugit neqitalerlugit. Bacon, uanitsut naatsiiat, siaasarlugit uanitsulerlugit miseqqerlugit allanik akoorlugit. Tassa Paninnguup ilaquttanilu mattammik nerisassiarisartagaasa ilaat.

- Inalui mattannik immerlugit. Qilalugaq assigiinngitsunik sanasarparput. Aamma nikkulisarpugut, Paninnguaq A. Qvist oqarpoq.

Mattaap qanoq nerisassiarineqarsinnaanera killeqanngilaq. Inuussutissaqarluartuuvoq kaffillernermilu mamarsaataajuaannartuulluni, qaarsillarnarluni nalliuttorsiortoqarneranilu nerrivimmiinnera takussutissaqartarluni.

Mattaat tamarmik allat mamarsaatiginiassammassuk piniartunik – immaqa inuunertik ulorianartorsiortillugu – piniarneqartarput. Paninnguaq A. Qvistilu taakku ilagaat. Taanna inuussutissarsiummik angutaanerusunit aallunneqartumi arnaqatiminut nammineerusussulinnut maligassiuivoq.