Angerlarsimaffeqanngitsut kisinneqaqqilersut: Amerlisimanissaat ilimagaat

Suleqatigiit arfineq-pingasut angerlarsimaffeqanngitsunik qaammatip tulliani kisitsinissarsuarmut ulluni makkunani piareersaleruttorput. Kisitsineq nunatsinni illoqarfinni 17-iusuni pissaaq, angerlarsimaffeqanngitsullu maannakkorpiaq qanoq amerlatiginerinik takutitsissalluni.

Steven Arnfjord Ilisimatusarfiup issittumi atugarissaarneq pillugu ilisimatusarfiani pisortaavoq. Kisitsineq ilisimatusarfiup taassuma suliarissavaa, angerlarsimaffeqanngitsullu kingullermi kisitsinermit amerleriarsimanissaat ilimagaa.

- Amerlisimanissaat ilimagaarput, taanna oqarpoq.

Angerlarsimaffeqanngitsut pillugit periusissiamut 2023-meersumut aningaasanik amerlanerusunik malitsitseqartitsinikuunnginneq, kialaarfinnullu aamma  angerlarsimaffittaarnissamut sungiusarfinnut tunngatillugu inatsisiliortoqarnikuunnginnera amerlisimanissaannut ilimasunnerminnut peqqutaaqataasoq nassuiaatigaa.

- Nuna tamakkerlugu angerlarsimaffeqanngitsunngornissap pinaveersaartinnissaanut politikkikkut iluamik suliniuteqartoqanngilaq. Alloriarnerit annersaat qiviassagutsigu, suliffissarsiortunut ikiorsiissutit pillugit inatsisiliortoqarnikuuvoq inuit aningaasaateqarnerulernerannik kinguneqartumik. Kisianni angerlarsimaffissaannik tunineqanngillat, Arnfjord oqarpoq.

Kisitsinermit kingullermit misilittagarilikkat

Angerlarsimaffeqanngitsunik kisitsineq siulleq misiliineruvoq. Ersinngitsumik ersittumillu angerlarsimaffeqanngitsut kisinnissaannut pikkorinnerulersimallutik ilisimatusartut isumaqarput.

- Kisitsinissamut pikkorinnerulernitta saniatigut politikkikkut ataatsimoortumik iliuuseqartoqarnikuunngimmat amerlisimanissaat ilimagaarput, Steven Arnfjord oqarpoq. 

Nuummi ersinngitsumik angerlarsimaffeqanngitsut amerlanerunissaat ilimagineqarpoq. Nuummiinnarmimi 200-t 300-llu akornanni ersinngitsumik angerlarsimaffeqanngitsuusut Arnfjordip ilimagaa. Ersinngitsumik angerlarsimaffeqanngisut ikinngutiminni ilaquttaminnilu utaqqiisaasumik najugaqanngikkunik inissiani inuppassuarnit najugarineqartuni sinnumasarput, imaluunniit nuttartuusarlutik. 

Naalakkersuisoqarfik tapersersuivoq – Folketingi aningaasaliisoq

Suleqatigiit kisitsisussat ilisimatusartunik, ilisimatusarnermi ikiortinik ilinniarnermillu saniatigut sulillutik ikiortinik ilaqartut nunatsinni illoqarfiit tamaasa tikissavaat. Naalakkersuisoqarfimmik suleqateqarneq pingaarutilerujussuusoq ilisimatuup naqissuserpaa.

- Naalakkersuisoqarfik pingaarnertut suleqatigaarput, taakkumi kisitsinissami tapersersorpaatigut. Naalakkersuisoq kisitsinissamik kissaateqartuuvoq, taamaanngippammi kisitsisineq pisinnaanngilaq.

Kisitsineq siulleq 2022-mi pisoq Ineqarnermut Naalakkersuisoqarfimmit aningaasaliiffigineqarnikuuvoq, kisitsinissarli qanittukkut pisussaq Folketingimiit 1 mio. koruuninik aningaasaliiffigineqarpoq. 

- Taamaammat (aningaasaliineq aaqq.) Kalaallit Nunaanniinngilaq. Ima paasillugu naalakkersuisoqatigiit imaluunniit oqartussaaffimmut pineqartumut naalakkersuisoq aningaasaliinikuunngilaq, Steven Arnfjord oqarpoq.

Nalunaarusiaq ukiamut saqqummissasoq naatsorsuutigineqarpoq

Kisitsineq Isumaginninnermut Naalakkersuisoqarfik suleqatigalugu pissaaq. Ilisimatusartut angerlarsimaffeqanngitsut pillugit paasissutissat ilanngullugit nalunaarsussavaat, soorlu: Ukiui, suiaassusaat, qanoq sivisutigisumik angerlarsimaffeqanngitsuusimaneri aamma aalajangersimasumik adresseqanngitsunut nalunaarsuiffik ilanngullugu kisitsinermi atorneqassapput. Angerlarsimaffeqanngitsut unnuisarfii kialaarfiilu ornittassavaat, aamma unnukkut.

- Illoqarfinni anginerusuni majuartarfeqarfiit kiassakkat allallu kialaarfiusinnaasut unnuakkut takusartartussaavagut, Steven Arnfjord oqarpoq.

Inuusuttut arnallu angutinit ukioqqortunerusunit nassaarissallugit ajornarnerusarpoq. Taakkumi unnuisarfinniikkusunneq ajukkajupput. 

- Inuusuttut arnallu kisitsinermi ilanngunnissaat ajornarnerusartoq oqaatigineqakkajuttarpoq. Angerlarsimaffeqanngitsuunertik suna tamaat atorlugu toqqorterniartarpaat. Angutinut ukioqqortunerusunut sanilliukkaanni unnuisarfinnukakulannginnerusarput. Tassa angutit ersarinnerusarput, Arnfjord oqarpoq.

Angerlarsimaffeqanngitsuuneq iliuuseqarfiginngikkaanni ajornartorsiut alligaluttuinnartartoq taassuma erseqqissaatigaa.

- Ernumanarpoq, angerlarsimaffeqanngitsuunermi pinaveersaartinniarlugu suliniuteqanngikkaanni ajornartorsiut alligaluttuinnartarpoq, Steven Arnfjord oqarpoq.

Taamaammat nalunaarusiaq politikerit iliuuseqarnerannik kinguneqassasoq neriuutigaa.

- Neriuppunga kisitsinissaq politikerit iliuuseqarnissaannut ilisimasaqarnerulersitsissasoq, Arnfjord oqarpoq.