Assaat marrarasaartillugit mobiilerujoornissaq ajornakusoorpoq: – Eqqarsaatinut unikaallatsitsisarpoq

Paornánguaq Berthelsen Kangillinnguit Atuarfianni assassortarfimmut iserpoq.

Kavaajani ukiorsiut qinngortartulik suli atorlugu marrianik uutsitsiviup tungaanukarpoq. Inimeeqatimi sanioqqutami ilaat ilassiorpai.

Uunnaavik ammaramiuk illuaraq ’type 16’ marrarmik sanaaq uunnaaviup iluaniittut allat saniannut inissippaa. Illuaraq uunnaanissap tulliani uunnaqataatikkusuppaa.

- Narsamiit inniminnerneqarpoq, Paornánguaq Berthelsen nassuiaavoq uunnaavillu mianersorluni matuaa.

- Ajunngilaq, oqiliallalluni oqarpoq.

Paornánguaq Berthelsen ulluinnarni atuarfimmi assassorfigisaminni ilinniartitsisuuvoq. Pingasunngornerilli tamaasa unnukkut atuartuerukkaangat eqqiaasullu nateq asaleraangassuk, allat 17-it ilagalugit „Solfridas keramik“-ip marriortitsinerani marriortarput.

Kommunip neqeroorutaani 2016-imi aallartittumi inersimasut 100 koruuninik akiliillutik qaammatini pingasuni sisamaniluunniit marriornermik, kaavisitseriaatsinik kiisalu marranik qalipaatinillu assigiinngitsunik misiliinissamut periarfissaqartarput.

- Ikinngutima misiliinissamut peqataanissannut sivitsortumi aperisarpaanga. Naggataatigullu akuersivunga, Paornánguaq Berthelsen oqarpoq illarlunilu.

Sivitsunngitsoq nuannarilluinnalerpaa. Maanna ukiut sisamat qaangiussimalerput.

- Peqqissaatitut misinnartaqaaq. Atuakkamik nuannersumik atuarnertut ippoq — allaanerulluinnartumik eqqarsarfiusarpoq, Paornánguaq Berthelsen oqaluttuarpoq.

Eqqarsaatinik aniatitsisinnaasut nuannaarnermillu kinguneqarsinnaasut sammineqartassasut politikerit, ilisimatuut peqatigiiffiillu kajumissaaripput. Ingammik nunatta USA-llu akornanni qaammatini kingullerni pissutsit eqqarsaatigalugit.

Nutaarsiassat malinnaavigiinnaavinnagit, inuit nittartakkatigut attaveqatigiittarfii malinnaavigiunnaarallarlugit pisuttuaritsi,“ Anna Wangenheim (D) Nivi Olsenilu (D) januaarimi nunatta nalorninartorsiornerpaaffiani tusagassiortunik katersortitsinermi oqarput.

Allat ulluinnarni eqqasuutitik unitsikkallarniarlugit oqarasuaatitik qaminngatikkaat, yogartartut qaqqasiortulluunniit Paornánguaq Berthelsen marriornermillu suliaqartut allallu eqqarsaatitik allanngortilaarlugit pinngorartitsillutik marriorfimmiittarput.

'Allamik isumagisaqarani' anaanaanermit marriornermut

Nina Heilmann, Paornánguaq Berthelsen assiginagu, marriornermik aallarteqqammerpoq.

- Misilikkusuttuaannarnikuuarali, taanna oqarpoq.

Marramit siaarsarsimasaminit iluseq mianersorluni avippaa. Assani kukinilu qalipatat takisuut atorlugit saveeraq ipittoq qisummik ipulik marrakkut qasertukkoortippaa.

Pinnersaatinut ilisivinngussaaq, taanna oqaluttuarpoq.

Nina Heilmann aatsaat sisamassaa maaniippoq. Suliani siulleq takutippaa: kalaallit erfalasuat uunnaavimmeereernermi kingorna equngangaarami napasinnaanngitsoq.

- Tamatta erfalasumik equngasumik sananikuusugut isumaqarpunga, ilaa? nerrivimmiittut ilaat oqarpoq, Nina Heilmannilu illarpoq.

Nina Heilmannip marriortalerneranut Donald Trump pissutaanngilaq. Marriorneq 'Allanik isumagisaqarani anaanaanermik' taasaminit aniguisinnaajumalluni misilippaa. Taanna ukioq ataaseq sinnilaarlugu matuma siorna meerartaarpoq.

- Angerlarsimaffik qimalaartarniassagakku taamaaliorpunga. Aallutakka allat tamarmik angerlarsimaffinni aallunneqarsinnaapput, taanna oqarpoq.

Nuersaasarlunilu, mersortarlunilu iverusiortarpoq – assassortuaannartuullunilu.

- Eqqarsaatinut unikaallatsitsisarpoq - immaqalu aamma ulluinnarni pisartunik eqqarsaateqarunnaarsitsisarluni. Suliakka kisiisa aallutiinnassavakka. Ajornakusuulaarpatalu aallussineruinnassaanga, taanna oqarpoq nangillunilu:

- Tassa ulapikkunnaajallanniaraangama taamaaliortarpunga.

Ditte Hartmann Kristensen, ukiup ataatsip sinnilaarlugu marriortarsimasoq, assingusumik oqaluttuarpoq. Taassuma marraq — aap, arlaannik - ilusilersorniarlugu issiavoq.

- Maani issiagaangama allanik eqqarsaateqarpallaarneq ajorpunga. Nutaarsiassammi tamakkualu tamaasa atuarneq ajorpakka, taanna oqarpoq.

Amerlanerilli marrarmik kaavisitsiniarlutik siaarsaanermillu sungiusarniarlutik orniguttaraluartut ilaannikkut nunarsuarmi pisut aamma assassortarfimmut annguttarput.

Olivia Nygaard Nielsen, ukiualunni Solfridap marrerisitsisarnerani peqataasartoq, taama oqaluttuarpoq.

- Ilaannikkut pisut initugaangata eqqartortarpagut, taanna oqarpoq.

Nina Heilmannip aamma Trump USA-lu malinnaavigisimavai - pingaartumik inuit avatangiisiminiittut amerlasuut sunnerneqarsimanerat pissutigalugu. Ilaatigut aappaata tatineqarneq akiorniarlugu nittartakkatigut attaveqatigiittarfiit tamaasa peerniarlugit aalajangersimavoq, taanna oqaluttuarpoq.

- Nittartakkatigut inuit attaveqatigiittarfiini paasissutissat amerlaqaat. Nutaarsiassallu atuarlugit ilaannikkut sakkortusinnaapput, taanna oqarpoq.

Sunngiffimmi sammisartakkatit iluaqutigalugit tusagassiuutini avatangiisinnilu pisunit sunnertinngitsoorsinnaasarlutit isumaqarpit?

- Taamaaratarsinnaavoq — avaqqunneqarsinnaagunanngilaq, Nina Heilmann akivoq.

- Tuigut apparteqqippagut

Marriorneq aallartereerpoq. Inuit nerriviit nalaanni issiallutik marriaminnik ilusilersuiutigalutik qalipaajutigalutilluunniit assigiinngitsunik eqqartuipput. Sukkut tamaana nipituumik illartoqartarpoq.

Unnuk manna USA-p præsidentiata aqqa nerrivimmiittunit kaavisitsisuniilluunniit eqqaaneqanngilaq.

- Maannakkut malunnartumik tuigut apparteqqissimagigut isumaqarpunga, Paornánguaq Berthelsen oqarpoq.

- Sapaatillu-akunnialuisa matuma siorna ajorluinnarpoq, taanna oqarpoq.

Suli ukiorsiutini atorlugit aniartoqqippoq. Illuaraliani type 16-iusoq uunnaavimmut iliniaannarlugu takkussimavoq.

Paornánguaq Berthelsenip mobilini tigoriarlugu marrarmik illuaraliani qalipaatigissut assigiinngitsut, ilaannikkut inunnut soqutiginnittunut tunisartakkani, assilisimasani takutippai.

- Katersuiuaannartoqarsinnaanngilarmi. Marriortaleraanni imaaliallaannaq katersuipallattoqarsinnaavoq. Taava sikaaviit sukujunnik ulikkaarpallaalertarput, taanna oqarpoq illarlunilu.

Ditte Hartmann Kristensen suli angerlalinngilaq, marrarmilli nutaamik qaarajuttunngorlugu ilusilersuivoq.

Marrarmik sanaani isamissimasoq siunerminiittoq takutippaa.

- Taanna patitiinnarnikuuara. Qulliugaluarpoq, ilaali uppikkiartulerpoq - taava aallaqqaataaneerlunga allamik misiliiginnarpunga, taanna oqarpoq.

- Sunngussanersoq takujumaarparput.

- Marriornermimi taamaappoq, taanna oqaluttuarpoq.

- Ullut ilaanni nuannertaqaaq. Ullunili allani patiteqqiinnartarpara.