Nuka Fleischerip, Mælkebøttecenterimi pisortaasup, meeraaqqanut angerlarsimaffik nutaaq ukiuni arlalinni suliarineqarsimasoq kiisami atorneqarnissaminut piareertoq nuannaarutigalugu nalunaarutigisinnaanngorpaa.
Mælkebøttecenterip, suliffeqarfiup namminersortuusup, ineqarfissaq nutaaq Aili, meeqqanut arfineq-pingasunut, pingasuniit qulingiluamut ukiulinnut inissaqartitsisoq oingasunngornermi februaarip sisamaani atoqqaarfissiussavaa.
Meeqqat tassani nalilersorneqarsinnaapput – aamma angajoqqaaminniissinnaanngikkunik imaluunniit angajoqqaarsianiinnissaat periarfissaanngippat piffissami sivisuumi tassani najugaqarsinnaatitaapput, Mælkebøttecenter nittartakkamini allappoq.
Mælkebøttenip Værestedellu ineqarfitoqaat pmælkeingasunngornermi nalunaaqutaq 14.00-mit 17.00-ip tungaanut iluarsaanneqarsimasut takuniarneqarsinnaapput.
- Ammaanersiornissaq pingaarutilimmik angusaqarfiuvoq. Meeqqat inuusuttullu inuunerminni atugarissaarnerulernissaat siunertaralugu sivisuumik anguniagaqarnitta inerneraa, Mælkebøttecenterimi pisortaq Nuka Fleischer tamatumunnga atatillugu oqarpoq.
Meeqqat pillugit suliat kingusinaartumik iliuuseqarfigineqartarnerat naqissuserpaa.
- Kingusissukkut iliuuseqartoqarnera meeqqamut, ilaqutariinnut inuiaqatigiinnullu tamanut sunniuteqartarpoq. Meeqqanut angerlarsimaffimmik nutaamik peqalernitsinni siusinnerusukkut iliuuseqarnitsigut sumiginnaaneq kingunerluuteqarsinnaanerillu pinngitsoortinniarpavut, oqarpoq.
Sivisuumik pilersaarusiorneqartoq
Ineqarfiup Ailip illuutaata iluarsaannera piffissami sivisuumi pilersaarusiorneqarpoq.
Mælkebøtten Værestedillu 2006-imiillu inissisimaffigisimasaat 2024 nutarsarlugit suliarineqalerput.
Meeraaqqat ineqarfiat nutaaq siorna septembarimi ammarneqartussatut pilersaarutigineqaraluarpoq, sanaartornerli kinguaattoorfiusoq, KNR allappoq.
Maannakkulli tamakkiisumik naammassisimalerpoq.
- Nutaanik inissaateqalernertigut ikiuigasuartarnerput paaqqutarinnittarnerpullu nukittorsarsinnaavagut. Siusissukkut iliuuseqarnikkut, pinaveersaartitsinerit ilaqutariittullu suleqatigiinneq immikkut ukkatariniarpavut, pisortaq Nuka Fleischer oqarpoq.
Inissiaq Aili aamma paaqqinnittarfik Mælkebøtten katillugit ukioqanngitsuniit aqqaneq-marluk tikillugit ukiullit 16-it najugaqartinneqarsinnaapput.
Aammattaaq aqqusinermi tassani meeqqat pingasuniit 17-inut ukiullit Værstedimi suli najugaqarsinnaapput.
