Unammiuaarnissap aallartinnissaanut, apriilip aappaanni pingajuannilu, sapaatit-akunnialuinnanngortut qamuteralannik unammersuarnissamik „Greenland Hill Climb Championship“-imik aaqqissuussisut taamaatitsiinnarput.
Quassussuup Qooruani, aaqqissuussamik ingerlatsiviusussami, naammattumik aputeqanngilaq.
Aaqqissuisut apinissaa neriuutigigaluarpaat, taamaanngilarli, qamuteralattussallu isumannaatsuunissaat pingaarnerpaavoq, aaqqissuisut oqaaseqartartuat Larseeraq Egede oqarpoq
– Sumiiffimmi aputeqarpallaanngilaq. Ammut ingerlasut ujaqqanut aporatarsinnaapput aamma qummut apuuttussaammata aputeqarpat aput anorimit tinnguttarpoq. Allaat siorna aputeqarujussuarmat aputip nuutiterneranut ingerlaarfissaasalu piareersarneranut sapaatip akunnera ataaseq atortariaqartarsimavarput, Larseeraq Egede oqarpoq.
USA-mit isumassarsiaasoq
Kalaallit Nunaanni Greenland Hill Climb Championship siorna siullermeerluni ingerlanneqarpoq, taannalu Amerikami unammisitsinermit „Jackson Hole Snow Devils Hill Climb“-imit, 1975-imi Wyomingimi aallartinneqartumit, ullumikkullu Canadami USA-milu qamuteralannik ingerlaartartut pitsaanerit 300-nit amerlanerusut peqataaffigisagaannit, isumassarsiaavoq.
Siorna unamminermi inersimasut meeqqallu tatsimit qaqqap qaavani isaaffinnut nappakkanut apuunnissaminnut sukkaniupput. Unammineq angutit utoqqasaat arnallu unammeqataanissaannik ukioq manna ilaneqartussaagaluarpoq.
Tapersersorneqarluartoq
Aaqqissuisut siorna Grønlands Bådcenter/Orsiivik pingaarnertut aningaasaliilluni 50.000-inik tapiisimammat aningaasaliisoqarluarput.
Tamatuma saniatigut Kommuneqarfik Sermersooq, Nuuk Transport, Bolt Lamar, Nuuk Handymand Aps, Arctic Auto og Detailing, Qiviut, Sarfalerisut og VVS, Bifrost Motors, Permagreen, Autonord, Grønlands Kontorforsyning, Arctic Star, Nuuk Rental, Nuna Advokater, Inuk Travel, Royal Arctic Line, Nuuk Marine Center, Wrap Skilte Service aamma Raw Arctic tapiissuteqarput.
– Ukioq manna taamaatitsiinnartariaqarnerput uggornaqaaq. Timersuut nutaarluinnaagami aningaasaliisartunit, kajumissutsiminnik sulisunit isiginnaartunillu tapersersorneqarluaraluarpoq. Sullarissunik kiisalu akisussaaffimmik tigusillutik ingerlatatsinnut nukissamik atuiumasunik kajumissutsiminnik ikiuuttartoqarpugut, Larseeraq Egede oqarpoq nangillunilu:
- Aappaagu sukataarnerulluta ingerlatseqqiinnarumaarpugut.
