11. marts 2025-mi Inatsisartunut qinersisoqarmat, Amerikamiut præsidentiata soqutiginninnera pissutigalugu nunarsuarmit tamarmit Kalaallit Nunaat isiginiarneqarpoq. Maannalu qinersinissap tungaanut internetikkut oqallinnerit annertuutigut nunarsuarmit avatangiisimit ilusilerneqarnera misissueqqissaarnerup nutaap takutippaa.
Taama Nordic Safe Cities, misissuinermik ingerlatsisoq allappoq.
Taakku piffissami 1. august 2024-mit 31. juli 2025-mut Kalaallit Nunaanni Facebookimi avissaartuunneq sunnerneqarnerlu paasiniaavigaat.
USA, ingammillu præsident Donald Trump Kalaallit Nunaanni qinersinissap tungaanut suut oqaluuserineqarneranik iluatsitsisoq, misissuineq inerniliivoq.
December 2024-p kingorna Amerikamiut ivertitaat amerleriarujussuarput, USA-lu pillugu oqaloqatigiinnerit Kalaallit Nunaanni sammisani annertunerpaanut ilaalerput. Ilaatigut atugarissaarneq inuuniarnermilu aningaasartuutit pillugit sammisat oqallinnermi inissakinnerulerput.
USA-milli samminninneruneq Donald Trumpimut iluaqutsiinnginneranut takussutissaqarpoq.
- Kalaallit innuttaasa USA-p nunatsinnik tigusiniarneranut tunngatillugu isumaqataanerulernissaannik Amerikamiut siunertaqarsimasut eqqarsarutta, taava iluatsitsisimanngillat. Oqaaseqaatinummi taakkununnga qisuariaatit tamaasa qissimikkutsigit, taava taakku USA-mut Trumpimullu kamannermik annertunermik pilersitsipput, Jeppe Albers, Nordic Safe Citiesimik pilersitsisoq pisortarlu tusagassiuutinut nalunaarummini allappoq.
Inuit ataasiakkaat tutsitsiffigineqartut
Kalaallit Nunaata piffissap ilaani namminiilivinnissaata annertuumik isumaqataaffigineqarnerani, kikkut suleqatissatut nutaamik isumaqatigiissuteqarfigineqarnissaat annertuumik isumaqatigiinngissutaavoq.
Taamaammat oqallinnermi kamak avissaartuunerlu annertooq USA-mut tunngatillugu pilersoq, misissuinerup takutippaa.
Inuit soorlu Jørgen Boassen Kuno Fenckerilu, USA-mut pitsaasumik akuersaartut, kamaffigineqarlutik oqallinnermi tutsitsiffigineqarnerat, misissuinermi tikkuarneqarpoq.
Inuit taakku pillugit oqallinneq ima avissaartuutsitsitigaaq, allaat oqallinnertut taaneqarsinnaajunnaapajaarluni.
Kalaallit Nunaat pisiarineqarsinnaanngitsoq innuttaasut isumaqatigiissutigaat, taamaammallu USA-mik annertuumik tapersiisitsinissaq iluatsinngitsoorpoq, akerlianilli ingammik Trump illersortaalu itigartinneqarlutillu kamaffigineqarput. Nalunaarut malillugu pissutsit taamaattorpiaat nunami namminermi avissaartuutsitsinissamut aarlerinartorsiortitsipput.
Aamma Danmark annertuumik kamaataasoq
Tamat oqallinneranni sammisat avissaartuunnermik pilersitsiffiunerpaat, tamatigungajak Kalaallit Nunaata nunarsuup sinneranut attuumassuteqarneranik imaqakkajuttarput.
USA Danmarkilu saqitsaaffiunerpaanerat, nalunaarusiap takutippaa.
Qinersineq sioqqutitsiarlugu DR-p Kalaallit Nunaanni orsugiassiorfik pillugu piviusulersaarusiaa saqqummerpoq. Piviusulersaarut «Grønlands hvide guld» Danmarkimut kamammik annertuumik pilersitsivoq. Nalunaarusiaq malillugu orsugiassiorneq pillugu suliaq ikkussamut ataatsimut uuttorlugu avissaartuunnermik annertunerpaamik pilersitsiffiuvoq.
Kamaallu Danmarkimut sammitinneqarnerunerani, Danmarkimut attuumassuteqarnerup siunissami qanoq passunneqarnissaanut tunngatillugu, Kalaallit Nunaanni innuttaasut akunneranni avissaartuunneq pilerpoq.
Nordic Sagre Citiesimit nalunaarusiaq suliniummi “Digitalt Sammenhold”-mi ilaavoq, taannalu piffissami nunarsuarmi pissaaneqarniunnerup nalaani tatineqarnermik digitalikkullu sunnerneqarnermik Kalaallit Nunaanni tamat oqartussaaqataaneranni akiuussinnaassutsip nukittorsarnissanik siunertaqarpoq.
- Nordic Safe Citiesip Kalaallit Nunaanni tusagassiorfiit, inuiaqatigiit oqartussaasullu ataatsimoornermik illersuinerannik inissisimanerat tapersersorniarlugu nukittorsarniarlugulu kiisalu piffissami toqqissisimanngiffimmi Kalaallit Nunaata toqqissisimanartuunera kiffaanngissuseqartumillu tamat oqartussaaqataanerat – ilisimasatigut, suleqatigiinnikkut ataatsimullu nunani avannarlerni Europamilu suleqatit peqatigalugit aningaasaliinertigut, Jeppe Albers oqarpoq.
