Timmisartumik naggammik mikkatta qiangeerpunga

- Timmisartorsuup minnissaa utaqqillugu aqqusinermi pinnguarusaartarnerput eqqaamavara, timmisartortartup nipaa nikallungarpalulluni højttalerikkut oqarpoq. Timmisartumik suluusalimmik naggammik Narsarsuup mittarfianukartumut ilaavugut.

Mittarfik nunaqarfimmiut ukiuni qulikkuutaanni inuussutissarsiutigaat. Mittarfik Narsarsuup isuaniit isuanut atassusiisutut inissisimavoq, inuiaqatigiinnullu attaviilluni. Qaqortumi mittarfittaap ammarnerata kingorna piffissaq nutaaq aallartippoq - apeqqullu puttallarpoq: Narsarsuup mittarfianut angallassisarunnaartoqarpat Narsarsuaq suli atassava?

Siunissaq nalorninartoq

Claus Pedersen Dash 8-mi saarlermi issialluni kangerluk qimerloorujoorpaa. Narsarsuarmi takornarialerivimmi Blue Ice Explorerimi pisortatut aasani kingullerni 23-ni sulivoq, taanna tassani qullersaqarfeqarpoq. Nunaqarfiup siunissami suli ingerlalluarsinnaanera neriuutigigaluarlugu qularnera alliartorpoq.

- Narsarsuup siunissaa nalorninarpoq. Taanna pillugu amerlasooriarluni innuttaasunik ataatsimiititsisoqartaraluarpoq,  angusaqarfiusumilli paasissutissanik erseqqissunik inerneqarani, oqarpoq.

Mittarfiup matunerata kingorna Blue Ice Explorerip qullersaqarfia Qaqortumut nuussaaq. Narsarsuarmi takornariaqarnermut tamanna kinguneqareersoq Claus Pedersenip takusinnaalereerlugu oqarpoq.

- Aasarumut inniminniisut ikileriarnerat takusinnaalereerparparput, ukioq mannali qanoq ingerlasoqarumaarnersoq takoqqaalaariartigut. 2026 ukiuussaaq misileraavik, naqissusiivoq.

Kujataani ukiorpassuarni isaaviusumasumut timmisartup apparsalernerani oqaasii akisuasutut ipput.

Claus Pedersernip saniani Ellen Frederiksen issialluni timmisartup igalaavaraatigut silammut isiginnaarpoq. Qassiarsuk tasamani takuneqarsinnaavoq - angerlarsimaffia. Qullii uluaasigut kuupput. Taamaannissani ilimagisimanngikkaluarlugu oqarpoq.

Narsarsuup mittarfiata atorunnaarnera tassunga toqqaannaq eqquivoq. Nunaateqarnerami savaateqarnermilu saniatigut unnuisarfiarannguaateqarpoq.

- Timmisartumut akit akisuninngormata inniminniisut annaasalereerpagut. Danmarkimut aqqut atorlugu Europamut toqqaannaq attaveqaasersuuteqarnitta annaanera uggornarpoq. Ilisimatusartunik aasat tamaasa tikittoqartarpunga, taakkuli angalaniarnerat ajornakusoornerulerpoq. Nuukkooqqaarlutimmi Qaqortumiit imaatigut angalaqqaatalertussaapput.

Narsarsuup mittarfiata atorunnaarnera najugaqartunit sakkortuumik isornartorsiorneqartarpoq. Mittarfiup atorunnaarnera Narsarsuarmi katersugaasiviup matunissaanik aamma kinguneqarpoq, aamma Greenland Airportsip 2025-mi oktabarip qaammataani mittarfimmi akunnittarfimmilu sulisut 70-it missaanniittut soraarsippai. Nunaqarfiup innuttaasuisa 139-usut affaat.

Minneq kingulleq

Timmisartoq suluusalik kingulleq Narsarsuarmut mimmat pisarnertut ersaattaattoqarnera nipitunngilaq. Annaasaqartoqalernera malunnarpoq.

Timmisartumut matu ammarmat angalasut nipaarluupput. Narsarsuarmiut sanileriiaallutik mittarfiup oqaluttuarisaanerani suluusalik kingulleq nakkuppaat. Ilaat nipaqaratik. Ilaat eqisimaarput.

Piffissaq tamaanga killeqarpoq. Qaqortumut pissutsit nutaat ammarput, Narsarsuarmiunngitsorli. Suluusallip sarpii suli kaavipput, nipaalli soorlulusooq allatorluinnaq ittut. Anaanaasoq panialu takorniorlutik eqitaarput. Ilaat nikallungallutik ukisipput.

Naja Lund najuuttut ilagaat. Ilaquttani qullililluni eqippaa. Narsarsuarmi peroriartorpoq mittarfimmilu ukiuni arlalinni sulinikuulluni. Matunera tussunngutigalugu oqarpoq.

- Allaanngilaq piviusuunngitsoq. Artornarpoq. Siunissaq pillugu Naalakkersuisuniit iluamik paasissutissiisoqarnikuunngilaq.

Naja Lund siunissaq pillugu aperineqarami amerikamiut soqutiginninnerat pillugu nutaarsiassaq eqqaavaa.

- Taamaattoqassappat (USA Narsarsuarmi sakkutooqarfeqalissappat) najugaqartut peqataatinnagit pissanngilaq. Qallunaat illersornissaqarfiat Narsarsuarmut soqutiginninnissaa kissaatigigaluarpara, USA-ussappalli akueriuminaanneruvoq. Narsarsuarli siunissaqassappat inuillu tamaani najugaqaannarsinnaassappata taamaattariaqassaaq, Naja Lund oqarpoq.

Ulloq alianartoq

Mittarfiup illutaani inuulluaqqusinissamut piareersaasoqarsimavoq. Romkuglit kaagillu sassaalliutigineqarput. Inuit oqalugiarfigineqarnerminnik, ilaatigut borgmesterimit Malene Val Rasmussenimit, pisumit tussunngoqisumik oqalugiarnerminilu arlaleriarluni unitsitsisariaqartumit tusarnaarput. Air Greenlandimi pisortaaneq Jacob Nitter inuusukkallarami mittarfimmi misiginikuusani aamma eqqaamasalersaarutigai.

Oqalugiartut tunuanni Vagn Andersen qeqarpoq. Bussertitsisuuvoq Narsarsuarmullu 1983-imi marsip qaammataani tikilluni.

- Ulloq aliasuffiuvoq. Ernutaqqiuterput inuuissiunngitsuuppat erfalasorput qiteqqussimassagaluarpara, oqarpoq, nangipporlu:

- Narsami illoqaratta iluatsitsivugut. Tassunga nuussinnaavugut, Narsarsuarmillu amerlasuut allami illoqanngillat nuuginnarsinnaanatillu. Inuit naggammik silataani katersuuteqqipput. Narsarsuup mittarfianniit suluusallip kingulliup qangattarnissaa nalliuppoq.

Dash-8 oqimaaqisoq Narsarsuup mittarfianiit immikkuullarissumiit qaqqarsuit tunuliaqutaralugit qangattarpoq.

Inuit aalateripput. Narsarsuup mittarfia suluusalimmit tikinneqaqqissanngilaq, Narsarsuarli inuerunnavianngilaq. Attassuteqaatissamik allamik nassaartoqaannassaaq. Immaqa najugaqartut akornanni. Naja Lundip tamanna neriuutigaa.

- Narsarsuup siunissaa neriuutigingaarpara. Inuit maani najugaqaannartussat apeqqutaapput. Angajoqqaakka taakkua ilagaat. Maani ataqatigiilluassapput, politikerit takuniassavaat Narsarsuaq suli uummaarissoq, naggasiivoq.