Meeqqat atuarfiannik allannguinissamik inatsisissatut siunnersuut Inatsisartut pingasunngorpat oqaluuserisassaat ilisimatusartunit meeqqallu pisinnaatitaaffii pillugit suliaqarfimmiit MIO-mit mianersoqqussutigineqarpoq. Inatsisissatut siunnersuumi allannguutissat pingaarutillit pineqarput.
Meeqqat atuarfianni nukarlerni (1. klassimiit 3. klassimut) nalunaaquttap akunneri ullullu atuartitsiffiusut ikilineqarnissaat inatsissatut siunnersuutigineqarpoq. Tamatumalu kingunerisaanik aamma atuartitsissutit ikilisinneqassapput. Meeqqat atuarfianni nukarlerni kalaallisut atuartitsineq annertusineqassaaq, qallunaatullu tuluttut atuartitsineq aatsaat 4. klassimiit aallartinneqartalissallutik.
MIO-p siunnersuut suliarineqarneralu isornartorsiorpai. Inatsisissatut siunnersuummik suliaqarnermi Ilisimatusarfik, meeqqat ilisimatusarnermut peqataatinneqarlutillu meeqqallu atuarfiannik ilisimasaqarluartoq, qanimut suleqatigineqarsimasaraluartoq MIO-mit tikkuarneqarpoq.
Ukiut atuarfiusup sivikillinera meeqqanut pisariaqartitsinerpaanut eqquissaaq
Meeqqat atuarfianni ukiumi atuarfiusumi ulluni 200-ni atuartitsisarnerup 180-inut ikilisinneqarnissaanut siunnersuut pisinnaatitaaffiit pillugit suliaqarfimmiit isumaqatigineqanngilaq:
- Meeqqanut amerlasuunut atuarfik tassaavoq orniguffik aaqqissuulluagaq, ataatsimoorfiusoq, ilikkariaatsinik ajunngitsunik neqeroortoq inersimasunillu aalajaatsunik sulisulik. Ukioq atuarfiusoq naannerulissappat meeqqanut annertuumik assigiinngitsutigut eqquisussaavoq, tamatumani meeqqat ulluinnarni eqqissimasumik sinaakkutissaqarnissamik atorfissaqartitsinerpaat eqqugaanerpaasussaallutik, MIO Naalakkersuisunut inatsisissatut siunnersuut pillugu allakkani ammasumi allappoq.
MIO-p siunnersuutip ajornartorsiutit tunngaviusut, soorlu ilinniartitsisussaaleqineq atuartitsissutinillu pitsaasunik amigaateqarneq, iliuuseqarfigineqannginnerat aamma aarleqqutigaa:
- Ilisimatusarfimmit nutaanerusumik ilisimatusarnerup takutippaat nunatsinni sumiiffinni arlaanni ilinniartitsisut amigaataanerat kiisalu atuartitsinerup pitsaassusii unammillernartut.Tamanna pissutigerpiarlugu MIO-p maqaasivaa, atuarfimmik aaqqissuuseqqinnermi ajornartorsiutit sorlai sammineqanngimmata: Ilinniartitsisunik pikkorissunik naammattunik pissarsinissarput qanoq qulakkeerneqassava? Atuartitsineq qanoq nukittorsassavarput? Atuarfiit tamarmik qanoq ililluta atuartitsinermut atortussanik pitsaasunik peqarnissaat qulakkiissavarput?, pisinnaatitaaffiit pillugit suliaqarfik aperaaq.
Ilisimatusartut ajornartorsiuterpassuit tikkuarpaat
Ilisimatusartut ukioq manna siusinnerusukkut tusarniaanermi siunnersuut isornartorsiorpaat. Isumaqatiginngissaasa ilaat tusaaniarneqarsimagaluartut suli qularisaqaqalutik Sermitsiamut allakkatigut akissuteqarlutik isummerput.
Ilisimatusartut tassaapput lektori Lars Demant-Poort, adjunkti Louise Pindstrup Scavenius, professori Rikke Ørngreen, instituttimi pisortaq Britta Lohmann, adjunkti Ivalo Mathiassen aamma ph.d.-nngorniartoq Kirsten Føns.
Siunnersuummik allamik nassiussisut
Ilisimatusartut Ilinniartitsinermik Ilisimatusarfiup misissuineri, aamma nunani tamalaani ilisimatuussutsikkut misissuinernit akuerineqartunit ernummatitik aallaaveqartut naqissuserpaat.
Ilisimatusartut politikkerit inatsisit atuutereersut aallaavigalugit meeqqat atuarfianni nukarlerni ullup atuarfiusup pisariillisarneqarsinnaanera aamma siunnersuutigaat. Ilaatigut sammisat immikkoortunut tallimanut katersorneqarsinnaapput, sapaatillu-akunnerata ingerlanerani sammisat amerlanerpaamik marluk atuartitsissutigineqarsinnaallutik.
Siunnersuut Naalakkersuisunut ukioq manna siusinnerusukkut nassiunneqarsimasoq ilisimatusartut paasissutissiissutigaat.
