Ilulissat eqqaani imeqarfiup killeqarfiata nuunneqarnissaa annikillisarnissaalu maanna pilersaarusiorneqarpoq. Sumiiffimmi tassani imeq imerneqarsinnaasussaq illersorneqassaaq, illoqarfimmilu angallatit motoorillit atorneqarnissaannut killilersuisarmat arlaleriarluni oqallisigineqartarsimavoq.
Aaqqiissutissamik isumaqatigiissuteqartoqarsimasoq Naalakkersuisut Avannaata Kommunialu ataatsimut nalunaaruteqarput, tamannalu ilutigalugu qarmarsuup ilaa illoqarfiup ineriartortinneqarnissaanut sammisassaqartitsinernullu, aamma piffissaq ungasinnerusoq eqqarsaatigalugu mittarfimmut aqquserngup nutaap atulernissaa periarfissaalissalluni, atorneqarsinnaalissaaq.
Ilulissat imeqarnera tatsinit mikinerusunit arlalinnit, tamarmik imeqarfiusumik avatangerneqarsimasunik, pilersorneqarpoq.
"Tatsinilli taakkunannga imeq nunami tassani qutsinnerusuminngaanneerpoq. Imermik milluaasup tasermut erngup katersorneqartup annertunerpaartaanut nuunneratigut, illoqarfimmi imeq annikillisinngikkaluarlugu imeqarfimmut killeqarfik annikillisinneqarsinnaavoq", Naalakkersuisut kommunilu allapput.
Tasersuaq imeqarfissaq nutaaq misissorneqassasoq
Kangerluarsuup Qinnguani tatsip nutaap misissorneqarnissaa aammattaaq aallartinneqarpoq. Tassani erngup pitsaassusaa ingerlaarfialu pillugit paasissutissat tunngavigalugit siunissami taseq imermik pilersuinissamut ilanngunneqarsinnaanersoq nalilerneqassaaq.
Borgmesterip Lars Erik Gabrielsenip (S) Naalakkersuisut kommunillu isumaqatigiissuteqarnerat nuannaarutigaa:
- Siunissami periarfissanik nutaanik ammaassivoq aamma illoqarfimmut ineriartortitseqataasussaavoq.
- Tamanna motoorilinnik ingerlaartartunut, qimussertartunut ulluinnarni imeqarfiup killeqarfiinik sunnigaasartunut iluaqutaassaaq tamatumalu saniatigut imeqarfipput illersussavarput, taanna oqarpoq.
Inuussutissarsiornermut, aatsitassanut, nukissiuuteqarnermut, inatsisinik atortitsinermut naligiissitaanermullu naalakkersuisuusimasup Naaja H. Nathanielsenip (IA) tamanna isumaqatigaa:
- Aaqqiissut maanna toqqarneqartoq atorlugu imermik pilersuinermi unammillernartut maannakkut atuuttut anigorsinnaavagut, tamatumalu peqatigisaanik illoqarfiup ineriartortuarnissaanut pitsaanerusumik sinaakkutissaqalissaagut, taanna oqarpoq.
