Qaanaami meeraaqqat immussaat suli utaqqineqartariaqartut

Qaanaap Pilersuisuani nioqqutissanut ilitsiviit maajip aallartinnerani nungukkiartortarnerat takornartaanngilaq. Nioqqutissat assigiinngitsut soorlu igaassat, nillataartut inuulluarniutillu tulleriiaarlutik nunguttarput.

Nioqqutissat pisariaqarluinnartut ilaatigut aamma nunguttarput. Naak allanik nalinginnaasunik pisiassaqaraluartoq meeraaqqat sapigallit immussaat maanna ilanngullutik nungupput, Isabella Nielsen anaanaasoq Sermitsiamut oqaluttuarpoq.

Imermik tiimillu miluffittortitsisoq

Qaanaami sapigalinnut immunnik sanaassanik nunguutsisoqarnera miluffittortuuteqartumut Isabella Nielsenimut ilungersunarpoq

- Nuunuutiga nerisinnaagaluarpoq, immuttornissanili suli pisariaqartittarpaa, massakkullu pisiassaasut timiminut panernarisai kisimik pisiassaapput, Isabella Nielsen oqaluttuarpoq.

Illoqarfiullu pisiniarfiani pisiarineqarsinnaasut nungukkaangata, soorlu meeraaqqat immussaat, ilaquttat, ikinngutit nunaqqatillu naakkinnikkusuttut tunniussassaqanngikkaangata allamik sussaarutivittoqartarpoq.

- Ernera marlunnik ukioqangajalersoq tiimik imiinnarmillu imalimmik miluffittortariaqartarpoq, Isabella Nielsen oqarpoq.

Meeraaqqat immussaannik piaartumik tikisitsinissamik aaqqiisoqarnissaa kissaatigalugu, Isabella Nielsennip oqaatigaa.

Maajip 30-ni nioqqutissanik assartuisoqassaaq

NAN-it meeraaqqat immui salliunneqarlutik Qaanaamut apuunneqarnissaat sulissutigineqarpoq. KNI A/S-ip ilisimatitsissutigaa.

- Taakkua (Meeraaqqanut immuliassat aaqq.) Ilulissani mittarfimmut tunniunneqareerput, Juliane Henningsen Heilmann KNI A/S-imi attaveqaqatigiinnermut pisortaq allakkatigut ilisimatitsivoq.

Qaanaami Pilersuisumi nioqqutissaarukkiartornera pissutigalugu KNI A/S timmisartumik attartortariaqalersimavoq.

- Nioqqutissanik timmisartumik assartuinissaq siunertaralugu Air Greenland attartornissamik isumaqatigiissuteqarfigaarput. Paasivara maajip 30-ni pilersaarutaasoq Qaanaamut nioqqutissanik timmisartukkut assartuinissaq, Juliane Henningsen Heilmann ilisimatitsivoq.

Nioqqutissat umiarsuakkut maajip 23-ani Ilulissiaanneqassapput, kingusinnerusukkullu Qaanaamut ingerlateqqinneqarnissaat pilersaarutaavoq.

Nioqqutissallu assigiinngitsut arlaqartut tikisinniarneqarput.

- Meeraaqqat atorfissaqartitaat kiisalu nerisassat, nillataartut, qallersuutissat, qerisut amigaatigineqartullu allat, soorlu quliutit, kigutinut qaqorsaatit nioqqutissallu allat pineqarput, Juliane Henningsen Heilmann allappoq.