Kommune Kujallermi kommunaldirektøri Randi Vestergaard Evaldseni sapaatip akunnerani uani namminersorlutik oqartussanik sakkortuumik isornartorsiuivoq.
Naalakkersuisut novembarimi 2024-mi meeqqanut, inuusuttunut kiisalu inunnut innarluutilinnut immikkoortumik Kommune Kujallermi tigusiniarlutik suliami aalajangernerminni taakku sumiginnaasut, taanna isumaqarpoq.
Kommunaldirektøri naapertorlugu Namminersorlutik Oqartussanik sulianik passussineq “aaqqissugaanngitsumik, uppernarsaatitaqanngitsumik naammanngitsumillu ataqatigiissaarinermik” ingerlatsiffiuvoq, tamannalu kommunip innuttaasuini toqqissisimannginnermik naammagittaannermillu pilersitsivoq.
Olsen: Tusagassiuutitigut isornartorsiuineq naleqqutinngilaq
Naalakkersuisoq Nivi Olsen manna tusagassiuutinut nalunaarutikkut qisuariarpoq, tassanilu ilaatigut kommunaldirektørip tamanut ammasumik isornartorsiuinera isumaqatiginagu oqaaseqarpoq:
”Atorunnaarsitsinermik isornartorsiuinerup tusagassiuutitigut ingerlanneqarnera naleqqutinngilaq. Piviusunik toqqammavilimmik, ilisimasanik tigussaasunik suleriaqqinnissamilu ataatsimoorluni sulinissaq pillugu siunnerfilimmik oqaloqatigiinnissaq taarsiullugu kissaatigaara”, Nivi Olsen, Meeqqanut, Inuusuttunut, Ilaqutariinnut Nunamullu namminermut Naalakkersuisoq oqarpoq.
Nivi Olsen naapertorlugu taassuma naalakkersuisoqarfia kukkunersiuisunik BDO-mik suleqateqarluni nalunaarusiamik qanoq immikkoortup patajaatsumik toqqammaveqarluni kommunimut utertinneqarsinnaanissaanut kaammattuutinik imaqartussamik suliaqarpoq.
Aaqqissuussisoqarlunilu saliisoqarpoq
Naalakkersuisoqarfiup atorfilittaasa suliami inernerit immikkoortullu atorunnaarsinneqarnerani suliap ingerlasimanera kommunimik misissueqatigiissutigisinnaagai, borgmesteri neqeroorfigineqarpoq. Tamanna sulinermut suliallu killiffianut pitsaasumik paasissutissiisuussaaq.
Nivi Olsenip immikkoortumi atorunnaarsinneqarsimasumi sulisut suliaqarsimasut qutsavigai, aaqqissuussisoqarlunilu saliisoqarsimasoq taanna oqarpoq:
"Ataatsimoorlusi aaqqissuussisimavusi, sulianik saliillusi, suleqatinillu nutaanik atorfinitsitsillusilu meeqqanut, inuusuttunut inunnullu innarluutilinnut suliniarnermik tamakkiisumik nukittorsaasimallusi”, Nivi Olsen oqarpoq.
