Naatsorsuutit angusaqarfiulluartut tulluusimaarutigaakka

- Angusarput nuannerluinnarpoq. Tamannalu sulisut sinnerlugit tulluusimaarutigaara. Uangami kisima angusarinagi suleqatigiilluta angusaraarput, Allan Kristoffersen Sermitsiamut oqarpoq.

Kalaallit Nunaani Brugsenip pisortaanera 50-inik ukiulik nuannaarpoq. Niuertarfeqarfiup ukiuni pingasuni siuliini amigartooruteqartareerluni 2025-mi millionilikkaanik sinneqartoorlunilu kaaviiaartitai qaffariarsimasut qungujunnissamut pissutissaqarluarnerulerpoq.

COOP-imi pisortaasimasoq Allan Kristoffersen ukiup ataatsip matuma siorna Brugsenimi pisortaanertut atorfinitsinneqarpoq.

Brugsenip 2025-mut naatsorsuutit saqqummiuteqqammerpai. Ukiuni pingasuni amigartooruteqangaareerluni aningaasartuuteqangaatsiareerlunilu, 2025 Brugsenimut allannguiffiuvoq.

Ingerlatseqatigiiffik ukiup siuliani 14 millionit koruuninik amigartooruteqareerluni akileraarutit ilanngaatigereerlugit 7 millionit koruuninik sinneqartooruteqarpoq.

Kaaviiaartitat 1,1 milliard koruunit missaannik amerlassuseqarlutik malunnaatilimmik qaffariarsimasut 2025-mut naatsorsuutit takutippaat.

Kalaallit Nunaanni niuertarfeqarfimmi taanna siuttoralugu niuertarfiup aningaasatigut ajornartorsiortup aaqqissuuteqqinnissaanut suliassaq imaannaanngitsoq maanna kinguneqarlualerpasippoq.

Allan Kristoffersenip Susanne Christensen ukiup ataatsip matuma siorna Brugsenimi, 600-nik sulisulimmi, pisortaanertut taarserpaa.

Qarasaasiatigut atortorissaarut nutaaq

Brugsenip kaaviiaartitat annertuumik qaffariarnerisa ukiunilu sisamani siullerpaamik sinneqartoornerup saniatigut 2025-mi unamminiarnartut angisuut, minnerunngitsumik qarasaasiatigut atortorissaarummik nutaamik atuilerneq, ingerlappai.

Qarasaasiatigut atortorissaarut nutaaliaasoq, ERP-systemimik taaneqartartoq, qallunaat pisiniarfeqarfissuanni COOP-imi aamma Brugsenimi ineriartortinneqarsimasoq atorneqarpoq.

Brugseni COOP-imik, pilersuisuni annerpaamik, isumaqatigiissuteqarsimavoq.

ERP-systemi atorlugu Kalaallit Nunaanni Brugsenip pisiniarfiillu aningaasaqarnerannit nioqqutissanik inniminniinernut quersuarnullu tamanut aqutsisoqarpoq.

- Oqaluuserissallugu pikkunaassinnaavoq. Qarasaasiatigulli atortorissaarut SAP-mik taaneqartartoq atorlugu nioqqutissat nunguttarneri naatsorsuiffiilu aqussinnaavagut.

- Tamakku tamaasa aaqqereerutsigit suliagut pitsaanerulersinnaallutillu siorna kaaviiaartitagut amerleriarujussuarsinnaapput, pisortaaneq oqarpoq.

Siulersuisuni siulittaasoq: - Brugseni ajornartorsiutinit aniguivoq

Ulluinnarni aqutsisut, siulersuisut sulisullu ataatsimoorlutik iliuuseqarluarnerat pissutigalugu Brugseni 2025-mi naatsorsuutit iluatsilluarsimasut siulersuisuni siulittaasup Avijâja Rosing-Olsenip erseqqissarpaa:

- Suliniuteqarluarnikkut ataatsimoornikkullu Brugsenip ajornartorsiornermit aniguisitsisimanera tulluusimaarutigeqaara. Suli suliniuteqarpugut, maannali suliniuterpassuit Brugsenimi sumi tamaani suliarineqartut kinguneri takusinnaavagut.

- Ataatsimoorluta eqqortumik isariaqartumillu siuariartorpugut, taamaalillutalu aningaasatigut ullumikkut aalajaannerujartuinnarpugut. Siunissami anguniakkanik nutaanik annertuunik siulersuisuni aalajangiussinissarput qilanaaraarput, taanna naatsorsuutit pitsaasut pillugit oqarpoq.

Takornariat aningaasarsiutaasut

Suliffeqarfiup aqutsisui naapertorlugit aasaanerani niuernerup annertusisimanera, pingaartumik Nuummi Ilulissanilu takornariat amerlanerujartornerisigut kiisalu pisiniarfissuup nutaarluinnaap, Brugseni Nataliep, Nuussuarmi atoqqaartinneqarnera kaaviiaartitat amerliartornerinut ilaatigut pissutaapput.

Aammattaaq pisiniarfinni tamani pisiniarfinnilu ataasiakkaani neqerooruteqarnerunissaq siunertaralugu nittarsaassineq, pisisartunit ilaasortanillu soqutigineqarluartoq, sulissutigineqarpoq.

Brugseni suleqatigiilluni ingerlatseqatigiiffiusoq 32.000-ingajannik ilaasortaqarpoq, taakkualu pisiniarfinni niuertarput.

Allan Kristoffersen, pisortaaneq, Sermitsiamut oqarpoq:

- Pisinianik pingaartitsinerulernerput 2025-mi iluatsipparput. Pisiniartut pitsaanerusumik neqeroorfigisinnaavagut, nioqqutissat amerlanerusut pisiniarfinniittussaapput nioqqutissallu nungullugit tunisat ikilissapput.

- Brugsenimi ilaasortatsinnut tunniussaqarumalluta niuernermilu atugassarititanut naleqqussarniarluta aallussilluarpugut. Tamanna 2025-mi iluatseqqipparput.

- Aningaasartuutigut nittarsaassinerlu aqukkuminarnerusinnaalerpagut, taamaalillutalu ilaasortanut aaqqissuussinikkut inuiaqatigiinnut aamma Divi Plussimi ilaasortatsinnut 26 million koruuningajannik utertitsisimavugut.

Sulisunik tunniusimasunik pissarsinissaq qullersat suliassaasa pingaarnerpaartarigaat pisortaanerup isertuutinngilaa.

- Sulisut 600-t amerlanerusut peqataatinnerulerutsigit Brugsenimi aningaasaqarnikkut angusaqarluarnerulissaagut, Allan Kristoffersen oqarpoq.

Brugsenimi sulisut 500-t missaat Kalaallit Nunaanneersuupput, 80-it missaat Indonesiamit aamma Thailandimeersuullutillu 20-t missaanniittut Danmarkiminngaaneerput.

- Suliffeqarfipput kalaallinit pigineqarpoq, ingerlatsinermilu kalaallit sulisorinissaat pingaartingaarparput, taanna oqarpoq.