Ulloq unnuarlu kingulleq ilaatigut aalakoortunik, inunnik kissaatiginngisanik anisitsinernik, angerlarsimaffinni eqqissiviilliornernik imminullu toqunnissamik siorasaarnernik nalaatsiviusoq, Kalaallit Nunaanni Politiini pigaartut pisortaata Aputsiaq Hansenip ilisimatitsissutigaa.
Nalunaarutiginninnerit Nuummi sineriammilu siaruarsimasuneerput.
Nuummi nalunaarutiginninneq, inuk inerisimasoq ukiukitsunik 15-t inorlugit ukiulinnik hashimik pujortariarnissamik qaaqqusisimasutut nalunaarutigineqartoq, pigaartut pisortaata maluginiarpaa.
- Naak nalunaarutiginninnerit aamaattut akulikitsumik pineq ajoraluartut, taamaattoq pisarput. Pisuni taamaattuni inunnik isumaginniffik angajoqqaallu suleqatigisarpagut, pigaartut pisortaat oqarpoq, taannalu angajoqqaanut ima kaammattuivoq:
- Meeqqat taamaattunut qaaqquneqarpata, angajoqqaat meeqqaminnik oqaloqatiginninnissaat pingaaruteqarpoq, taamaalillutik taakku naaggaarsinnaaqqullugit, taamaalillutillu peqatigisaminnik sunnertinnatik.
Arnaq persuttarneqartoq
Arfininngornermi nal. 14.10 angut arnamik silami nalasumik persuttaasimaneranik – inuit amerlasuut takusimasaannik – Sisimiunit politiinut nalunaarutiginnittoqarpoq.
Politiit ornigupput, nal. 14.25-lu angut pasineqartoq tigusarineqarpoq. Persuttaasimaneq pillugu suliamik allartitsisoqarpoq, misissuinerlu suli ingerlavoq.
Angut pasineqartoq suliap suliarineqareernerani iperagaavoq.
