Folketingimut qineqqusaarneq maannakkut ingerlanneqartoq nunanit allanit sunnerniarneqarniarsinnaavoq.
Tamanna Danmarkimi Politiit isertortumik paasiniaasartuinit (PET), Illersornissaqarfiup paasiniaasartuinit (FE) aamma Inuiaqatigiinni isumannaallisaanermut aqutsisoqarfiup (SAMSIK) aarlerinartorsiortitsinermik nalilersuineranni erserpoq.
Naliliineq naapertorlugu Danmarkip Ukrainemi sorsunnermut akuliunnera pissutigalugu Ruslandimit sunnerniarneqarnissaq aarlerinarpoq, aammattaarli naalagaaffinnit allanit sunniiniartoqarsinnaavoq.
- Sunniiniutit avissaartuutsitsinissamik, tamanut ammasumik oqallinnermik sunniinissamik imaluunniit qineqqusaartunik, partiinik politikkikkulluunniit anguniagassanik aalajangersimasunik sunniinissamik siunertaqarsinnaapput, PET allappoq.
USA Kalaallit Nunaallu eqqaaneqartut
USA-p Kalaallit Nunaannik tiguaaniarluni oqariartuutaa pissutigalugu Kunngeqarfik Danmark pillugu eqqunngitsumik paasissutissiisarneq Folketingimut qinersinissamut atatillugu nalorninermik pilersitsisinnaasoq aarlerinartoqarneranik nalilersuinermi aalajangersimasumik eqqaaneqarpoq:
- USA-p Naalagaaffimmik soqutiginninnera nunat tamalaat akornanni naalagaaffinnit allanit, soorlu Ruslandimit Kinamillu, sunniiniarnermi atornerlunneqarsinnaasunik aammattaaq akerleriissuteqalersitsivoq, nalunaarusiami nangilluni allassimavoq.
Sunniineq MAGA-kkormiuneersinnaasoq
USA Europami politikkikkut ineriartornermut allatut isiginnittaaseqarusuttoq naliliinermi erseqqissarneqarpoq, tamannalu Amerikamiut oqartussaasuisa iliuusiinit Danmarkimi oqallinnermut sunniuteqarsinnaasunit takuneqarsinnaassaaq:
- Amerikamiut Europami oqallinnermut sunniiniarsarinerat assigiinngitsorpassuarnit, ilaatigut inunnit ataasiakkaanit MAGA-mullu attuumassuteqartunit, USA-llu naalakkersuisuinut atassuteqarpallaanngitsunit, aallaaveqarsinnaavoq, oqartussat allapput.
Ruslandimit sunnerniarneqaratarsinnaasut
Aarlerinartunik naliliineq naapertorlugu Danmark russit sunniiniarnerinut pingaarnertut, ilaatigut paasissutissanik eqqunngitsunik siaruarterinermut, tassa oqariartuutinik eqqunngitsunik imaluunniit mumingasunik piaaralutik siammarterinermut, internetikkut saassussinissanut annikinnerusunut, soorlu serverinik artukkiilluni saassussinissanut, kiisalu internetikkut ilungersunartumik saassussinissamik sioorasaarinermi sammineqassasoq ilimanarluinnarpoq.
Kalaallit Nunaanni nittartakkat arlallit februaarip 20-ani internetikkut saassunneqarsimapput. Tassani DDoS-imik taaneqartartumik saassussisoqarsimasoq, russillu qarasaasianik atortorissaaruteqartut saassussineq akisussaaffigigaat oqartussat nalunaarput.
Kalaallit Nunaanni qinersisoqarnerani pissutsit pillugit oqaaseqaqqissinnaanersoq Sermitsiap PET aperaa, PET-lli naliliineq nassiunneqarsimasoq innersuussutigaa.
