Nuummi aqqusinerni qulliit 3.000-t missaanniipput, ukiullu tamaasa qullersuit 150-it missaanniittut aserorneqartarput – amerlanertigut aporneqarnermikkut. Nuuk nunatsinni biileqarnersaammat tassani qullersuarnik apuisarnerit ukiumut amerlanersaasarput, Nukissiorfiit nittartakkaminni ilisimatitsipput.
Qullersuaq aporneqaraangat iluarsartuussineq 30.000 koruunit angullugit akeqarsinnaasarpoq. Ajoqusiisoq paasineqarsimanngikkaangat, Nukissiorfiit kommunilu iluarsartuussinermut akiliisarput – tassa Inuiaqatigiit tamatta.
Ajoqusernerit ilaat ukiuunerani iluarsartuunneqarsinnaasanngimmata napparummi ataatsimi ajoqut peqqutaalluni aqqusinermi qullersuit ataatsimoortut qaminngasariaqarsinnaasarput, tamannalu pissusissamisuunngilaq.
Biilertut qullersuarnik apuisarneri asuuliinnaq pisarsorinngilagut, paasivarpulli piaarinatik apuinerminnik nalunaarutiginnittartut ikittuinnaasut. Taamaammat neriuppugut, tamanna ataatsimoorluta allanngortissinnaassagipput.
Nukissiorfiit erseqqissaapput qaqutiguinnaq piaaraluni aportittoqartartoq, innuttaasulli kajumissaarneqarput napasuliamut aporsimagaluarlutik nalunaarutigissagaat.
Apuisumik takuguit, taava politiinut uppernarsaasutut nalunaaqutaq, piffissaq, sumiiffik aamma ajoqusiisoq pillugu paasissutissanik assersuutigalugu nummerplade imaluunniit suliffeqarfiup aqqa allallugit nalunaaruteqarit.
Allagartarsuit qineqqusaarutit aalajangersimasunik piumasaqaateqarluni nivinngarneqarsinnaasut
Qinersinermut atatillugu allagartarsuarnik innaallagissamut napparutinut aqqusinermilu qullersuarnut nivinngaanissaq akuerineqarsinnaasoq – kisiannili aalajangersimasunik piumasaqaateqartoq Nukissiorfiit ilanngullugu eqqaasitsissutigaat. Allagartarsuit stripsinik, allunaasanik qassusiutinik assigisaannillu nivinngarneqartussaapput, saviminermillu allunaasiat atorneqassanngillat. Aamma angallannermi akornutaasumik inissinneqassanngillat.
Allagartarsuit isumannaallisaanermut tunngasut pissutigalugit innaallagissamut ledninginit minnerpaamik meterinik 1,5-inik ungasitsigisumiitinneqartariaqarput. Tamatuma saniatigut allagartarsuarnik Nukissiorfiit illuutaannut soorlu illuaqqanut innaallagiaqarfinnut, imertartarfinnut teknikkeqarnermullu illuutinut allanut nivinngaasoqaqqusaanngilaq.
Allagartarsuit tamarmik qinersinerup kingorna ullut pingasut qaangiutsinnagit peerneqassapput, napparutinilu qilertanik, allunaasarsuarnik allanillu amiakkuusunik qimatsisoqassanngilaq. Allagartarsuit qinersinerup kingorna ullut arfineq-pingasut qaangiuppata suli peerneqarsimanngippata Nukissiorfiit piiaallutillu akiligassamik partiimut akisussaasuusumut nassiussissapput.
Taamaammat Nukissiorfiit aqqusinermi angallattut aamma partiit illoqarfimmi akisussaassuseqarnissaannik kajumissaarpaat. Mianersortumik biilernikkut, ajoqusernerit nalunaarutiginerisigut allagartarsuarnillu nivinngaanermut malittarisassanik malinninnikkut illoqarfiit nunaqarfiillu toqqissisimanartuunissaat qaammaqquteqarluartuarnissaallu innuttaasut qulakkeersinnaavaat.
