USA-p præsidentianut Donald Trumpimut toqutseriarsimasutut pasineqartoq unnerluutigineqartunut tamanut pisuunnginnerarpoq. Reuters allappoq.
Toqutseriiartutut pasineqartoq 31-nik ukiulik Cole Tomas Allen, Washington D.C.-mi tusagassiortut apriilip 25-ani nereqatigineqarnerani saassussisimasutut pasineqarpoq.
Illersuisua ataasinngornermi taanna sinnerlugu oqaaseqarmat oqaaseqanngilaq. Præsidentimut toqutseriarsimasutut, naalagaaffiup atorfilitaanik saassussisimasutut sakkunullu tunngatillugu inatsisinik unioqqutitsisimasutut unnerluutigineqarpoq.
Pinerluttuliornernut katillugit sisamanut unnerluutigineqarpoq, taakkunannga ajornerpaaq tassaavoq Donald Trumpimut toqutseriaraluarneq.
USA-p illoqarfiisa pingaarnersaanni Washington Hilton Hotelimi ukiumoortumik tusagassiortut nerersuarneranni Trumpimik toqutseriarsimasutut pisuutinneqaruni inuunini naallugu parnaarussaasinnaavoq.
Unnerluussisut naapertorlugit nerisarfiup silataani, isumannaallisaanikkut nakkutilliisunut immikkoortortatut assersorsimasumi, pisoq pivoq.
Tassani Allen akunnittarfiup nakkutilliisuinit misissorneqareerluni iserluni allaammik eqqarpoq.
Nakkutilliisut akillutik Allenip tungaanut eqqarput, taannali eqqorneqarani.
Secret Servicemi sulisoq eqqorneqarpoq, aqerlumilli pitarneqarsinnaanngitsumik atornini pissutigalugu annerusumik ajoquserneqarani.
Melania Trump præsidentillu tullia J.D. Vance peqataapput, ingerlaannarli qimarngunneqarlutik.
Ukiumoortumik nerersuaqatigiinnermi 2600-t peqataapput. Trumpip siornatigut peqataaffigineq ajorsimavai, ukioq mannali peqataaniarluni aalajangerpoq.
Præsidenti saassussinermi ajoqusinngilaq, nereqatigiinnerlu ullormi allami kingusinnerusumi pissasoq kingorna kaammattuutigalugu.
Ataasinngornermi eqqartuussinermi aamma suliamut atatillugu inatsisitigut akerleriinnerit annertuut tulliat aallartittoq, Reuters allappoq.
Allenip inatsisit atuutsinneqarnerannut ministeriugallartoq Todd Blanche unnerluussisussaatitaasorlu Jeanine Pirro suliamit peersinniarsarai. Taakku marluullutik nereqatigiinnermi najuupput, aallanissaalu siunertarisimasinnaallugit, nalunaarummi allassimavoq.
- Pisumi saassunneqartutut ilaasimasinnaasut suliami uani namminneq unnerluussisussaatitaasutut atuussinnaanerat naleqqutiginngilaq, Allenip illersuisua Eugene Ohm oqartoq Reuters allappoq.
Pirrop "saassussisoqarnerani sumiiffimmiinnera suliami uani suliaqarnissannut piginnaasannut attuumassuteqanngitsoq" CNN-imut siusinnerusukkut oqaatiginikuuaa.
Allenip 31-nik ukiullip saassussinissani sioqqullugu suna pissutiginerlugu taamaaliornerluni ilaquttaminut allataa amerikami tusagassiorfiit arlallit pisup kingorna saqqummiuppaat.
Nutaarsiassaqartitsivik Associated Press naapertorlugu Trumpip aqutsinera isornartorsiorpaa imminullu "naalagaaffimmi qoqassiilluni inuartutut inussiarnersutut" taalluni.
/ritzau/
