Malugiuk: Kalaallit Nunaannut immikkut aallartitaq Jeff Landry sapaatiuppat tikissasoq, sinniisorlu Ken Howery Nuummut ataasinngorpat tikissasoq Nuummi sinniisoqarfiup Sermitsiamut paasissutissiissutigaa.
Sinniisoq Ken Howery aamma Kalaallit Nunaannut immikkut aallartitaq Jeff Landry ataatsimeersuarnermut Future Greenlandimut peqataajartorlutik, Nuummilu sinniisoqarfik nutaaq ammariartorlugu maajip 18-ianiit 21-anut Kalaallit Nunaanniissasut USA-p Danmarkimi sinniisoqarfiata uppernarsarpaa.
Taakku kalaallit amerlasuut naapissavaat ataatsimeersuarnermilu aningaasaqarnikkut periarfissanik annertusaaneq pillugu tusarnaaqataallutik, inunnik attaveqarnerulerlutik USA-llu Kalaallit Nunaatalu attaveqatigiinnerat pillugu ilisimasaqarnerulernissartik siunertarigaat, sinniisoqarfiup tusagassiuutinut nalunaarutigaa.
Periarfissat amerlanerusut
"Kalaallit Nunaannut tikeraaqqinnissara qilanaareqaara, pingaartumik sinniisoqarfissatta nutaap ammarnissaanut. Nuummi sinniisoqarfitta 2020-mi ammaqqinneraniilli Kalaallit Nunaanni naalakkersuisunut, kommuninut innuttaasunullu attaveqarnerput annertusivarput aamma inuussutissarsiortut, ilisimatusarfiit susassaqarfiillu assigiinngitsut akimorlugit, sinniisoq Howery oqarpoq, nangillunilu:
"Amerikamiunut kalaallinullu periarfissanik amerlanerusunik neqerooruteqarnissarput, sinniisoqarfillu nutaaq USA-p Kalaallit Nunaatalu akornanni attaveqarnermik suleqatigiinnermillu pilersitsinissamut atornissaa qilanaaralutigu."
Pititsineq kissaatigineqanngitsoq
Amerikamiut Kalaallit Nunaannut tikeraarnerat Danmarkimi suli naalakkersuisunngortitsisoqanngitsoq pissaaq, taamaattumillu qallunaat naalakkersuisuiniit sinniisunik ataatsimeersuarnermi peqataasoqassanani.
Immikkut ilisimasallip Jeffip tikeraarnera"pititsinertut kissaatigineqanngitsutut" taavaa, nunanullu allanut sillimaniarnermullu ataatsimiititaliami siulittaasup IA-meersup Pipaluk Lyngep "siunertai eqqumaffigineqartariaqartut" oqaatigalugu.
Naalakkersuisut siulittaasuat Jens-Frederik Nielsen (D) Danmarkimi ataatsimeersuarnermi Landry naapinnissanersoq suli nalullugu, ataatsimeeqatigissaguniullu “oqaluuserisassat ersarissumik saqqummiunneqartariaqartut” qanittut oqaatigaa.
