Uumasut nakorsaattut ilinnialissagaanni uumasunik nuannarisaqartariaqarpoq. Taamaappallu ilinniagaq nuannerluinnartuussaaq Aviaaja Petersen oqarpoq, taassuma ilinniakkani naammassillugu allagartani januaari aallartilaartoq tiguaa, maannalu imminut uumasut nakorsaatut Københavns Universitetimi ilinniagalittut taasinnaalerpoq. Ivalu Kleemann allagartartaaqqammersoq peqatigalugu Københavns Univeritetimi Kalaallini siulliit ilaanniillutik ukiut tallimat affarlu ilinniagaq ingerlassimalerlugu uumasut nakorsaattut naammassipput.
Aviaaja Petersen Nuummi uumasut nakorsaqarfiani uumasunik mikisunik suliaqarniarluni takorluugaqarpoq, aallaqqaammulli Danmarkimi misilittakkaminik katerseqqaarnissani kissaatigaa.
Danmark-imut nuunneq
Uumasut nakorsaattut ilinniarneq imaannaanngitsuuvoq.
– Uumassusililerisutut ilinniagaqarnissara eqqarsaatigisimavara. Ilisimatusarfimmilu uumassusililerisunngorniarfiup aallartinnissaa utaqqigaluarpara, naatsorsuutigisanniillu utaqqinera sivisunerummat Nuummi peqqissaasunngorniarlunga aallartippunga. Inunnik passussinermiit uumasunik passussinissara orniginerullugu tamassuma ingerlanerani paasivara, taamaalillungalu uumasunut nakorsanngorniassallunga Danmarkimut nuuppunga, Aviaaja Petersen oqaluttuarpoq.
– Alloriarneq annertoqaaq. Naak affarmik qallunaajugaluarlunga Københavnimi inuppassuaqarfiusumi kikkullu tamarmik nipitoorsuarmik oqaluttartut akornanni najugaqalerneq allaanerulluinnarpoq. Ukiumi siullermi Nuummikkama ikinngutimma ilaanni najugaqarpunga, tamannalu nuanneqaaq, Danmarkimimi najuqalerninniit ukiup ataatsip missaani tunniarsarivunga.
Ilinniagaq sakkortooq
Aviaaja Petersenip ilinniakkani 24-nik ukioqarluni aallartippaa, amerlasuut ilinniarnertuunngorniarfimmit toqqaannartumik aallartimmata angajullersanut ilaavoq. Tamannali iluaqutaaginnartoq isumaqarpoq.
– Atuaqatikka allat ilinniarnertuunngorniarfimmiit naammassiniariarlutik ilinnialersut ilinniarnertuunngorniarfimmiit naammassininniit ukiut tallimat qaangiummata aatsaat ilinnialerpunga. Angajullersaanerali uannut pitsaaquteqarpoq. Eqqissisimallungalu inunnut allanut attaveqarneq pillugu aalajangersinnaavunga. Ikinngutiginerpaasakka Danmarkimi aamma ilinniagaqartut kisiisa peqatigisarpakka. Atuaqatikka aamma ullut tamaasa atuarfimmi naapittarpakka. Piumasunulli ilinniartut allat peqatigalugit sammisaqatigiinnissamut periarfissarpassuaqarpoq.
Uumasut nakorsaattut ilinniagaqarnermi atuartitaanerpassuit ingerlanneqartarput, ingammillu bacheloritut ilinniarnermi atuagassarpassuaqartarluni. Tamanna piareersimaffigineqassaaq, Aviaaja Petersen oqarpoq.
– Soqutiginnittuugaannili tamanna ajornanngilaq, kandidatinngorniaraannilu sulinertaqartorujussuummat aallaqqaammut bamsit uumasullu toqungasut sungiusaatigalugit aallartittarpugut, naggataatigullu uumasunik passussisarpugut. Tamanna pissaganarluinnarpoq.
Kalaallit Nunaanni praktikkerneq sulinerlu
Aviaaja Petersen Ivalu Kleemannilu Nuummi Donnas Dyreklinikimi suliffimmik misiliipput, Københavnillu Universitetiani Qimmeq Healthimik suliniummi suleqataagamik qimmit qimuttut peqqissuunissaat pitsaanerulernissaallu uumasut nakorsaasa suliniutaanni ilaatigut nunaqarfinni illoqarfinnilu qimminut nakorsiartarfiugallartunik pilersitsinikkut anguniarneqarpoq.
Aviaaja Petersenip uumasut mikinerit soqutigineruai. Taamaammat uumasunut nakorsanngorniarnini nerisassanut oqartussani sulinermik tapertalersinnaallugu takorloorpaa. Inuusuttut amerlanerusut uumasunut nakorsaatut ilinniagaqarnissartik eqqarsaatigilissagaat neriuutigaa.
– Uumasut nakorsaattut ulluinnarni suliffiusartut pikkunaatsuunngitsut isumaqarpunga. Periarfissat amerlaqaat, assaallu atorlugit sulineq, suliassanik suliaqarneq uumasullu peqqissuunissaannut ikiuutaanissaq nuannarigaanni suliffik pitsaalluinnarpoq, Aviaaja Petersen oqarpoq.
