Australiamiut aatsitassarsiortitseqatigiiffiat Energy Transition Minerals, ingerlatseqatigiiffiutini Greenland Minerals aqqutigalugu Kuannersuarni misissueqqissaarnissamut akuersissutaateqartoq, Inatsisartuni ilaasortanut toqqaannartumik maanna saaffiginnippoq.
Ingerlatseqatigiiffiup Namminersorlutik Oqartussanik eqqartuussivimmut suliassanngortitsisimasup, tassa isumaqaramik Kuannersuarni piiaanissamut akuersissutaatertik atorlugu suliamik ingerlatitseqqissinnaatitaallutik aamma aatsitassanut Naalakkersuisoqarfiup inassuteqaataanut Naalakkersuisut malinnissappata, misissueqqissaarnissamut akuersissutaatiminnik annaasaqarsinnaallutik, taamaalillutillu akuersissutaateqarfimminni sulinerminnik ingerlatsiinnarsinnaajunnaassallutik.
1 milliardit koruuningajannik aningaasaliissuteqarsimasut
Allakkani pisortamit Daniel Mamadou-mit atsiorneqarsimasuni oqaatigineqarpoq, Naalakkersuisut Kalaallit Nunaanni aatsitassarsiornermik suliaqartunit tamanit tatigineqarnerat minnerulersinneqarpoq, taamaattumillu Inatsisartunut ilaasortat kajumissaarneqarlutik tatiginninneq pilerseqqinniarlugu iliuuseqaqqullugit, "aatsitassarsiornikkut inuiaqatigiinnut kalaallinut iluaqutaasumik periarfissanik tamakkiisumik atuisoqarsinnaaniassammat".
ETM ukiuni qulini kingullerni Kuannersuarni suliniummut 1 milliardit koruuningajannik aningaasaliisimasoq, allakkani allassimavoq, aamma „inatsisit piumasaqaatillu attuumassuteqartut tamaasa tamakkiisumik naammassineqarsimasut”.
Pisortap erseqqissarpaa, ingerlatseqatigiiffiup "Narsami innuttaasut peqataatinnissaat pingaartissimagaa, ilaatigut sulisunik atorfinitsitsisarnikkut, piginnaasanik ineriartortitsinikkut aamma illoqarfimmi aningaasanik tapiisarnikkut. Suleqatigiiffiusinnaasunik, najukkami inuiaqatigiinnut erseqqissunik sivisuumillu atuussinnaasunik pilersitseqataanissanut piareersimavugut, tamatumani Narsaq ilanngullugu aamma Kalaallit Nunaat tamaat ataatsimut isigalugu."
Eqqartuussivimmut suliassanngortitsineq
Namminersorlutik Oqartussat eqqartuussivimmut suliassanngortinneqarnissaat pillugu ingerlatseqatigiiffik allappoq tamanna aqqutigisimanngikkaluarlugu, „ukiorpassuarnili suliniummi peqataasimanerput illersorniarlugu pisariaqalersimasoq. Isumaqarpugut inatsisitigut tunngavissaqarluarluta, aalajangiusimalluinnarparpullu. Aammattaaq sivisuumik akisumillu eqqartuussivimmi suliaqarneq kikkunnulluunniit iluaqutaanngilaq, ineriartornartuullunilu oqimaaqatigiissaarisumik aaqqiissutissamik nassaarnissatsinnut ammajuaannarpugut“.
Eqqartuussivimmut suliassanngortitsineq
Namminersorlutik Oqartussat eqqartuussivimmut suliassanngortinneqarnissaat pillugu ingerlatseqatigiiffik allappoq, tamanna aqqutissamittut toqqarsimanngikkaluaritsik, ”suliniummulli ukiorpassuarni peqataasimanerput illersorniarlugu pisariaqalersimavoq. Isumaqarpugut inatsisitigut tunngavissaqarluarluta, inissisimaffippullu aalajangiusimalluinnarparput. Tamatuma peqatigisaanik sivisuumik akisuumillu eqqartuussivimmut suliassanngortitsineq kikkunnulluunniit iluaqutaanavianngilaq, sulilu ineriartorfiusinnaasumik oqimaaqatigiissaakkamillu aaqqiissutissamik nassaarnissatsinnut ammajuaannarpugut“.
Ingerlatseqatigiiffik nangilluni allappoq, “najukkami avatangiisitigut unammillernartut nunani tamalaani aatsitassarsiornermi akisussaassusilimmik avatangiisinik illersuisarnernut periaatsit qaffasinnerpaat naapertorlugit iliuuseqarnissartik aalajangiusimalluinnaritsik”.
Taarsiisussanngorsinnaanermut nalunaarusiaq
Daniel Mamadou Inatsisartunut ilaasortanut kaammattuilluni naggataatigut allappoq, Kuannersuarni suliniummut atatillugu uranimut inatsisip kingunerisinnaasai pillugit nalunaarusiamik Naalakkersuisut saqqummiussinissaannik piumasaqaqqullugit, ilaatigut taarsiisussanngorsinnaanermut tunngasut pillugit nalunaarusiamik saqqummiussisinnaaniassammata.
“Naak Naalakkersuisut paasissutissanik isertuussisoqarsimannginneraallutillu 2024-mi upernaakkut nalunaarusiamik saqqummiussinissamik neriorsuigaluarlutik, nalunaarusiaq taamaattoq suli tamanut saqqummiunneqanngilaq. Taamaattumik ETM-ip Inatsisartunut ilaasortanut kaammattuutigaa, Naalakkersuisut qinnuigineqassasut nalunaarusiamik taama ittumik piaartumik naammassinneqqullugit, kinguarsaqqinneqanngitsumillu tamanut saqqummiussinissaannik piumaffiginneqqullugit, Inatsisartut aallaqqaammut ammasuunissamik piumasaqaataat naapertorlugu,” Daniel Mamadou allappoq.
Nalinginnaalluinnartoq
Sermitsiap Inatsisartunut ilaasortat ilaat allakkat pillugit oqaaseqartinniarsarigaluarpai, Demokraatineersorli Justus Hansen kisimi qisuariaateqarpoq. Taanna naatsumik allappoq, eqqartuussivitsigut suliamut ingerlasumut akuliussinnaanani akuliukkusunnanilu".
Sermitsiap aamma aatsitassanut Naalakkersuisoqarfik aperaa, uranimut inatsisip kingunerisinnaasai pillugit, Inatsisartunut ilaasortanut isertuussisoqarsimanersoq tamatumunnga ilanngullugu taarsiisussanngortitaasinnaanermut tunngasoq pillugu.
”Kingullermik qinersinissaq nalunaarutigineqarmat urani pillugu inatsit tamatumalu kingunerisassai pillugit Naalakkersuisut paasissutissiinissaat unitsinneqarallarpoq, tassa Inatsisartut allamik kissaateqarnissaasa tungaanut unitsinneqarallarluni. Tamanna nalinginnaalluinnarpoq. Taamanikkut Inatsisartut kukkunersiuinermut ataatsimiititaliaata misissuisoqarnissaa piumasaraa.“ aatsitassanut Naalakkersuisoqarfik Sermitsiamut taama allappoq.
