Amerikamiut uumassusillit atorlugit teknologiilerinermik suliffeqarfiutaata Klotho Neurosciencesip, aatsitassarsiornermik ingerlatseqatigiiffik pilersinneqaqqammersoq Greenland Mines Corp. pisiaraa. Taanna Skaergaard Mining Greenland aqqutigalugu Tunup avannaani Mikip Kangertivata Kangerlussuullu akornanni misissuinissamut akuersissutinik pingasunik pigisaqarpoq. Klotho Neurosciences kingorna Greenland Mines Corpimik taaguuteqalerpoq.
Tamanna Greenland Mines Corp.-ip børsimi nalunaarsorneqarnerani takuneqarsinnaavoq.
Qaqqaq immikkuullarissoq
Sumiiffik Tasiilap Ittoqqortoormiillu akornanniittoq, Skaergaardimik aamma taaneqartartoq, imikkuullarissuuvoq. Qaqqaq innermik anitsisartumeersumik qaleriiartumik iluseqarpoq, nunallu qaavaniit kilometerinik arlalinnik naqinneqarsimariarluni kusugaasannguussimavoq, tassaniipporlu ujaqqat ilaat gabbro, saviminermik, kuultimik palladiumimmillu akoqartoq.
Suliffeqarfippassuit assigiinngitsut sumiiffimmi akuersissutaateqarnikuupput, ilaatigut tassaapput Eastern Zinc Corporation, Gryphon Metals Corporation, Platinova Resources, Galahad Resources, Platina Resources kingullerlu canadamiut suliffeqarfiutaat Major Precious Metals 2024-mi pinngitsaaliissumik matuneqartoq. Arlaannaalluunniit piiaveqalernissaq iluatsinnikuunngilaa.
Maannalu Greenland Mining Corp. amerikamiup Joseph Sinkulep pisortaaffigisaa aamma qallunaap Bo Møller Stensgaardip Hans Jensenillu siuttuffigisaata niuerutiginissaa iluatsinniartussanngorlugu. Bo Møller Stensgaard Hans Jensenilu aatsitassarsiorfinnik Kalaallit Nunaanni akuersissutaatilinnik misilittagaqarput, kingullertullu Bluejay Mining Dundas Titaniumilu suleqataaffiginikuullugit.
Uumassusillit atorlugit teknologiilerineq piiaaveqarnerlu
Kloth Neuroscience piaaffilerinermik misilittagaqanngilaq, sananeqaatilli genillu atorlugit nappaatinut ALS-imut Alzheimersimullu akiuussutissanik pingaarnertut suliaqartuullutik. Joseph Sinkule suliassaqarfimmik nutaamik aallussilerneq pillugu tusagassiuutitigut nalunaarummi ima oqarpoq:
"Uumassusillit atorlugit teknologiimik suliaqarnerput aatsitassarsirnermut akuliullugu suliffeqarfimmik assigiinngitsunik suliaqarfimmik qaqutigoortumik pilersitsivugut. Aningaasaliisartut uumassusillit atorlugit ilisimatusarnermi nutaaliorfiusumi, pinngortitallu pisuussutai atorlugit siunnerfilimmik suliaqarnermi aningaasaliinissaannik periarfissillugit. Aatsitassat qaqutigoortut kitaani pissarsiarineqarsinnaanerisa qulakkeernissaannut periarfissatsialattut isigaarput.".
Ujarassiuut siunnersuutaat
Greenland Mines Corp. suliffeqarfik SLR Consulting, ujarassiuutut, teknikkimut tunngatillugu suliniutinillu ineriartortitsinermi assigiinngitsorpassuarnik suliaqartussaq, suleqatiginiarlugu isumaqatigiissuteqarfigisimallugu nalunaarpoq.
Ilaatigut qillerinermi misileraanermilu pilersaarusiorneq, suliniummi paasissutissanik toqqorsivimmik ineriartortitsineq, aatsitassarsiorfiup ingerlanneqarneranut ineriartortitsinermullu pilersaarutit suliarineqarnerat aamma aatsitassarsiornermik periutsit, aatsitassarsiorfimmut pilersaarusiorneq, saffiugassanik piiaaneq, sulianik ingerlatseriaatsinik allattuineq kiisalu aatsitassarsiornerup teknikkikkut misissorneqarnera, siunissami teknikkikkut angusaqarluarnissamut suliniummut iluaqutaasumik.
Ukioq manna oqaluussineq
SLR pillugu immikkut ilisimasallit 2026-mi aggustip naanerani septembarillu aallartinnerani ingerlatseqatigiiffiup pilersaarutaasumik aasakkut misissuisarneranut atatillugu tikeraartarnissaat isumaqatigiissutip ilagaa.
Greenland Minesip SLR Consultingimi siunnersuisartut suliniummi peqataareersut allat, soorlu finlandimiut GTK Mintec aamma canadamiut ingeniørit WSP, qanimut suleqatiginissaat aamma naatsorsuutigaa.
