Greenland Resourcesip pisortaanera Ruben Shiffman aatsitassarsiornermik ingerlatseqatigiiffiit 30-t akornanni siullersaalluni PDAC-imi Torontomi ataasinngornermi ataatsimeersuarnermi Canadap nukissiornermut pinngortitamilu pisuussutinut ministeria Tim Hodgson atsioqatiginiarlugu oqaluttarfimmiippoq.
Isumaqatigiissut, Canadap Tunumi Malmbjergetimi aatsitassarsiornissamut 7 millionit dollarsinik (33 millionit koruunit missaanniittunik) tapiissuteqarnissaanik imaqarpoq.
Canadap Kalaallit Nunaatalu suleqatigiinnissamut isumaqatigiissutaat
Inuussutissarsiornermut, aatsitassanut, nukissiuuteqarnermut, inatsisinut naligiissitaanermullu naalakkersuisup Naaja H. Nathanielsenip Tim Hodgson suleqatigiinneq pillugu isumaqatigiissummik atsioqatigaa.
Isumaqatigiissummi ilaatigut Canadap Kalaallit Nunaannut teknologii pillugu ilisimasanik pingaarutilinnik, aningaasaliinissamut periarfissanik aamma suliffissuaqarnermut attaveqaatinik immikkorluinnaq ittunik ineriartortinneqarluartunik neqerooruteqarpoq, tamannalu Kalaallit Nunaata aatsitassarsiornissamik anguniagaqarneranik siuarsaasinnaavoq.
Nunattalu Canada ilisimasaqarnermik misilittakkanillu avinngarusimasuni attaveqaatitigut attavilerneqarsimanngitsuni nukissiornermut, namminerli innaallagissamik pilersuisunik ineriartortitsinissamut pilersorsinnaavaa.
Suleqatigiinnissamut isumaqatigiissut isumaqatigiissummut pisussaaffilersuummut ataatsimut anguniagaqarfiusumut suliniutinillu aalajangersimasunik imalimmut siulliuvoq, qanittukkullu isumaqatiginninniutigineqarlunilu atsiorneqassasoq naalakkersuisoqarfik ilisimatitsivoq.
Akuersineq pingaarutilik
Canadamit aningaasaliissutit pingaaruteqartut suliniummut aningaasaliisussanik allanik kajungilersitsisinnaasut Ruben Shiffman atsioqatigiinnerup kingorna Sermitsiamut oqarpoq.
– Tamanna uagutsinnut pingaaruteqarluinnarlunilu suliniutitsinnut akuersineruvoq. Nammineq aningaasaatigut annertusarnmiarpagut, tamannalu aningaasaliisussanik allanik kajungilersitsisinnaavoq. EU-Kommissionimik, Tysklandimik maannakkullu Canadamik suleqateqarluarnerput ingerlatiinnassavarput. Tamatuma saniatigut pisisussatsinnik aamma aningaaserivimmik peqarpugut, taamaammat tamanna pitsaalluinnarpoq.
Angorusutaqarnermit iliuuseqarnermut
Canadami naalakkersuisut pilersuinermik ataavartumik pilersitsiniarlutik aatsitassanik pingaarutilinnik piiaanissamut aappassaanik aningaasaliissuteqarput.
Canadap „aatsitassarsiorfinni aningaasanik piviusunik aningaasaliilluni angorusutaqarnermiit iliuuseqarnermut ingerlasoq“ Tim Hodgson tusagassiutitigut nalunaarummi oqarpoq.
„Suliniutit nutaat taakku atorlugit aatsitassanik nunarsuup pisariaqartitaanik Canadamiullu pisinnaatitaaffigisaannik, pigissaarnermik toqqissisimanermillu pilersitsivugut.“
