Nunatsinni imigassartorsimalluni biilernermut tunngatillugu malittarisassat ersarilluinnarput, ikiaroorlunili biilernermut tunngatillugu inatsisit ersarlupput. Taannalu aqqusinikkut angallannikkut isumannaallisaanermut ajornartorsiut annertuujuvoq, taamatullu politiit tigusarinnissinnaanerannut.
Inuit Ataqatigiit sinnerlugit Folketingimut ilaasortaanikoq Aaja Chemnitz, taannalu Kalaallit Nunaanni aqqusinermi angallannermi, ikiaroornartut immikkut killilersorneqarsinnaaneri anguneqarsinnaalernissaat anguniarlugu, qisermik misissueqqissaarnissamut tunngavissaqartitsisoqassasoq, ikiaroornartunillu uuttuutinik pisisoqarsinnaalissasoq allanillu pisariaqartunik aqqusinermi angallannermi inatsisip allanngortinneqarnissaanik, januaarimi Folketingimi aalajangiiffigisassatut inatsimmik allannguinissamik siunnersuuteqarpoq.
Inatsit atortullu amigaataasut
Ikiaroortoqarnersoq paasiniarlugu misissuisoqartalernissaanik kissaateqarneq nutaajunngilaq.
Politiit inatsisinik atortunillu – ikiaroornartumik uuttuutinik taaneqartartunik – amigaateqarneq suliaminnik naammassinnissinnaannginnerminnut pissutaasutut ukiorpassuarni tikkuartarpaat.
Politiit naalakkersuisullu isumakuluutaat danskit naalakkersuisuinit pimoorunneqarnissaat anguniarlugu Naalakkersuisut aamma Ineqarnermut, Attaveqaqatigiinnermut Nunallu Immikkoortuinut Naalakkersuisoqarfik arlaleriarlutik angallannermut ministereqarfimmut saaffiginnittarsimagaluartut Aaja Chemnitz oqarpoq.
Folketingimi ilaasortat tamarmik tapersiisut
Immaqali maannakkut pisoqalerpoq. Folketingimi partiinit tamanit aamma angallannermut ministerimit Thomas Danielsenimit (V) siunnersuut januaarimi oqaluuserineqarmat taperserneqarpoq, tamannalu folketingimut qinersisoqareerpat, angallannermut ministerimik nutaamik ivertitsinerup kingorna, tapersersorneqarnissaa ilimanaateqarpoq.
Thomas Danielsenip oqallinnermi Attaveqaqatigiinnermut Naalakkersuisoq Aqqaluaq B. Egede aamma siunnersuummut tapersersuisoq oqaatigaa, tamannalu Namminersorlutik Oqartussani inatsisip qanoq aaqqissuunneqarnissaa pillugu oqaloqatigiinneq aallartissasoq isumaqarpoq.
Apeqqutit nutaat takkussuutilerput
"Assersuutigalugu Kalaallit Nunaanni ikiaroornartunik unioqqutitsisimasut ukiuni pingasuni piumasaqaateqanngitsumik biilersinnaanermut allagartamik arsaarinnittoqartalissava? Pinerluuteqaqqikkuni paarnaarussaassava? Nunatsinni Imigassaq-Atornerluineq-Angallannerlu pillugit pikkorissartitsisoqassava? ATV-nik ingerlatsinermut inatsisit qanoq aaqqissuutissallugit kissaatigineqarpa? Qamuteralannik ingerlatsinermut inatsit qanoq aaqqissuunneqarnissaa kissaatigineqarpa, tassa pineqartut piumasaqaateqanngitsumik biilersinnaanermut allagartamik arsaarneqarsimappata? Apeqquterpassuit tamakku soorunami Namminersorlutik Oqartussanik oqaloqatiginnissutigisariaqarpavut, Thomas Danielsen oqarpoq, taassumalu erseqqissarpaa suliassat ilaat Inatsisinik atuutsitsinermut ministereqarfimmut attuumassuteqartut, allat Angallannermut ministeriarfimmut attuumassuteqartut, sumullu attuumassuteqaraluaraangamilluunniit pingaaruteqarpoq suliap politikkikkut qullersanit kivinneqarnissaa.
