Katuamut ullumi iserluni susoqarpallaanngilaq. Café inersuarlu inussivissaavallaanngillat. Cafémi issiavoq Sulisitsisut pisortaat Christian Keldsen, inersuarlu isiginnaarujoorpaa.
- Soorunami pissanganartuaannarpoq. Aaqqissuussaq taama angitigisoq pissanngatiginngikkaanni aamma eqqumiissagaluarpoq, Christian Keldsen oqarpoq illariarlunilu.
Future Greenlandimut isissutissat januaarip 29-ani tuniniarneqarlutik aallartimmata sapaatit-akunneri marluk qaangiutiinnartut nungupput.
- Isissutissat nunguttuaannarput, kisianni ullut 14-it ingerlanerinnaaniunngitsoq, Christian Keldsen oqarpoq.
Tusagassiorfiit aatsaat taama amerlatigisut peqataassapput
Nunatta avataanit soqutigineqarnerujussua ataatsimeersuarnermilu peqataasussat peqqutigalugit tusagassiorfippassuit aamma najuutissapput. Donald Trumpip nunatsinnut immikkut ittumik aallartitaa Jeff Landry aamma USA-p Danmarkimi aallartitaa Ken Howery peqataasussanut ilaallutik.
Ataatsimeersuarneq tusagassiorfinnit aatsaat taama amerlatigisunik peqataasoqassaaq.
Nunatsinni Danmarkimilu tusagassiorfiit saniatigut tusagassiorfiit nunanit tamalaaneersut soorlu The Wall Street Journal, BBC aamma Bloomberg News Nuummukassapput.
Ataatsimeersuartoqartillugu tusagassiorfiit tallimat missaanniittut nalinginnaasumik peqataasarput. Ukioq manna tusagassiorfiit 30-t peqataassapput, sulilu utaqqisunut allatsissimasoqarluni.
Peqataasussat ilaasa paarsisutik nassarlugit tikissapput
VIP-nik amerlanernik peqataasoqartussaanera sillimaniarnerup annertuneruneranik aamma kinguneqarpoq.
Taamaattumik isumannaallisaanermik suliaqartut ataatsimeersuarfimmi eqqaanilu marlunngorpat pingasunngorpallu takussaassasut qularnanngilaq. Peqataasussallu ilaasa sillimaniarnermi paarsisutik nassarlugit tikissapput.
- Takkuttussat ilaat paarsisoqariissapput. Uani qaaqqusat qaaqqusaanngitsullu pineqarlutik, aammali pilersaarutitsinni ilaareersut. Aallartitaqarfiit peqataanissaat siunertaralugu ukiuni kingullerni ornittarnikuuagut.
- Aallartitallu illersorneqartussaapput. Taakkua tikeraartitsisut, matumani Danmarkip Kalaallit Nunaatalu isumagisussaavaat, Christian Keldsen oqarpoq.
Tamatuma saniatigut oqartussat isumannaallisaanermik suliaqaqataassapput. Sillimaniarneq eqqarsaatigalugu pilersaarutit Christian Keldsenip itisilerlugit oqaaseqarfigerusunngilai. Isumannaallisaanerli ukioq manna piffissartorfiginerusimallugu uppernarsarpaa.
- Isumannaallisaanermut tunngatillugu aarlerinartoqannginnera erseqqissaatigissavara. Susoqaratarsinnaanerali sillimaffiginiarlugu pilersaaruteqartariaqarpugut. Taamaaliorpugullu. Taamaammat isumannaallisaaneq qaffasinnerpaaffissaminiippoq, Christian Keldsen oqarpoq.
