Assit atolugit atuagaq taalliarpalaartoq issittumiit nunarsuup sinneranut isiginnittaatsimik erseqqissumik saqqummiussisoq, Nunat avannarliit siunnersuisoqatigiivisa meeqqanut inuusuttunullu atuakkiortunut 2026-mi nersornaammut innersuunneqarneranut tunngavilersuut taama allartippoq.
- Naja arferlu taalliarpalaartumik takusassaqaluartumik oqaluttuaavoq alutornartoq, Kalaallit Nunaanniit issittumi meeqqanut atuakkiani takussutaavoq – nunani avannarlerni atuakkiornermut ilanngulluni. Piffissami Issittumi soqutigisat periusissiallu nunarsuarmi pissaaneqarnermut tunngatillugu eqqartorneqarfiani atuagaq tunngaverpiaanik eqqaasitsivoq. Tassa Issittoq nunatut uumassuseqartuusoq. Sumiiffiuvoq inuit, uumasut pinngortitallu imminnut ataqatigiilluarfiat, tassanilu oqaluttuat nunarsuup sinneranut isiginnittaaseq pillugu paasisaqarfiullutik.
Meeqqanut atuakkiaa siulleq
Karline Nathansenip meeqqanut atuakkiaa siulleq siorna saqqummertoq nersornaasiinermut ataatsimiititaliamit nuannarineqarluarpoq. Taanna 1979-imi inunngorpoq Paamiuneersuuvoq qatanngutinilu sisamat peqatigalugit pinngortitamut qanittumi peroriartornikuullutik. Timersornermik aaqqissuussinernillu aqutsinermik ilinniagaqarpoq aamma peqqinnissaqarfimmi oqalutsitut allagartaqarluni.
Randersimi maanna najugaqarpoq, tassanilu kalaallinut nutserisutut aamma Randers Kunstmuseumip saaffiginnittarfiani sulilluni.
Atuakkap assilialiortua Pernille Kreutzmann-Larsen "atuakkap eqqumiitsuliornikkut ilusilersungaaneranut pingaarutilimmik" inissisimavoq, siunnersuisoqatigiit allapput.
- Qaamaneq, qalipaatit aalanerlu atorlugit assinik sinnattutullusooq isikkulunnik pilersitsivoq. Immap itissusia, pinngortitarsuaq issuttumiittoq meeqqallu uumasullu naapinnerat assini annikitsualuttortaqarluartunik atuartullu takorluugaanut ammasunik takutinneqarput, atuakkap innersuunneqarnerani allassimavoq.
Nuannarisaqartuartoq
Pernille Kreutzmann-Larsen, Sisimiuni 1987-imi inunngortoq, meeraallunili erinarsornermik, titartaasnemrik, qalipaanermik, oqaluttualiornermik, taalliornermik assassornermillu suliaqarneq nuannarai. Perngaammillu nersornaaserneqarnissamut ineersuunneqarani.
- Oqaluttuarisaanermik soqutigisaqarneq inuunerani pingaaruteqartuaannarsimavoq, aammami kulturip inuiaqatigiillu oqaluttuarisaanerannut ilinniarsimasuuvoq. Nipilersortartut akornanni erinarsortartutut nipilersukkanik taalliortuullunilu TIU-mi ilisimaneqarpoq. Pernille Kreutzmann-Larsen atuakkanut arlalinnut 2017-imiilli assilialiortarpoq, ilaatigut Camilla Sommerip atuakkiaa Tuttuarannguaq, taannalu Nunat Avannarliit Siunnersuisoqatigiivisa meeqqanut inuusuttunullu atuakkianut nersornaasiuttagaanut 2019-imi innersuunneqarpoq. Ullumikkut eqqumiitsuliornermik nipilersornermillu namminersortutut suliaqarpoq, tamatuma saniatigut atuagassianik saqqummersitsisarfimmik Masaatsiamik ingerlatsilluni, ilisimatitsissutigineqarpoq
Karlinep Pernillelllu oqaatsinik assinillu ataqatigiissaarinerat Nunat Avannarliit Siunnersuisoqatigiiffiannit nuannaarutigineqarpoq, "atuakkami assiliartat imminnut ataqatigiipput, assilissat oqaatsillu imminnut tapertariillutik eqqumiitsuliornermik ersersitsinermik pilersitsimmata".
Oqaluttuaq pillugu
Atuakkami Naja aananilu qanittuunerat pillugu oqaluttuaq Nunat avannarliit siunnersuisoqatigiivisa ima saqqummiuppaa:
- Taakkua peqatigiinneranni takorluukkat piviusullu imminnut attuumassuteqarput. Najap arfermik naapitsinerani immallu silarsuaani sinnattutut angalatinneqarnermini atuartartoq silarsuarmut pinngortitamut tunuliaqutaannaanngitsumut, uumassuseqartumilli peqataaffigineqartumut iserpoq. Imaq, uumasut nunalu imminnut ataqatigiilerput, tassani inuit pinngortitamit avissaaqqanatik atassuteqarnerat ersersinneqarluni.
- Taamatut silarsuarmut isiginnittaaseqarneq issittumi nunallu inoqqaavisa ilisimasaannut attuumassuteqarluinnarpoq, tassanimi nuna, imaq inuunerlu imminnut ataqatigiilluinnartutut isigineqarput. Naja arferlu meeqqap isiginnittaasaaniit qaqutigoortumik ajornanngitsumillu saqqummiunneqarpoq. Najap arfermik naapitsinera taamaalilluni misigisassarsiornerinnaanani takorluugaannaanngilaq, taalliortorpalaartumilli avatangiisinut tunngatillugu misigisaavoq – nunarsuarmi pinngortitap qanilaarnera nallernissaqannginneralu takutinneqarluni.
Nersornaasiinissa
Taakku marluk nersornaammut innersuunneqarnertik nuannaarutigisinnaavaat, kisianni nersornaasiinissaq utaqqisariaqarluni. Taannami Nunat avannarliit siunnersuisoqatigiivisa Helsingforsimi oktobarip 27-anni aatsaat pissaaq.
Nersornaaserneqartoq “Arctic Light”-imik 300.000 koruuninik aningaasartalinnik tunineqassaaq.
Karline Pernillelu aqqaneq-marlunnut allanut Sverigemeersunut, Norgemeersunut, saminut Islandimeersunut, Savalimmiuneersunut, Finlandimeersunut Danmarkiminngaanneersunullu unammipput.
