Josef Tarrak-Petrussen, rappertartoq, Danmarkimi nipilersornermik festivalertitsinermi nuannarineqarluartumi Roskilde Festivalimi aappassaannik tusarnaartitsissaaq.
Tamanna nammineq Instagramimi quppernermini saqqummiuppaa, festivalimi ukioq manna appisimaartussat saqqummiunneqarnerannut atatillugu.
Ukioq manna festivalimi juunip 27-annit juulip sisamaannut pisussami nipilersortartut 177-it tusarnaartitsisussat ilagaat Tarrak.
- Tarrak Kalaallit Nunaanni rap-imik nipilersortartut nuimanerpaat ilagiinnanngilaat, aammali kinguaariit pineqartut sinnerlugit nipituumik oqaluttunngorsimavoq, inuttut misigisani politikilu pillugit killitsinnartunik taalliortartoq, nipilersortartoq pillugu Roskilde Festivalimi nittartakkaminni taama allapput.
Rappertartoq festivalimi siullerpaamik 2023-mi tusarnaartitsivoq, qallunaat rap-imik nipilersoqatigiit Suspekt peqatigalugit.
- Maani nipilersorneq uppernanngingajappoq. Attortisimasorujussuuvunga, taamani tusarnaartitsinerup kingorna oqarpoq.
Tarrak sisamanngornermi juulip aappaanni nalunaaqutaq 14.00 Laguna-mi tusarnaartitsissaaq. Tusarnaartitsineq "angisuujullunilu immikkuullarissumik takutitsiffiussaaq", festivalimit allapput, ilaatigut Aka Niviana aamma Peter Lyberth qaaqqusatut tusarnaartitseqataassapput.
- Tusarnaartitsinermi aamma nutaanik Tarraap tusartissimanngisaannik tusarnaartitsisoqassaaq, taamaammat rappertartup tusaamasap naapinneqarnera immikkuullarissuussaaq, allapput.
