Ukioq manna Arctic Soundsimi Yoik, kukkilattariaq oqaatsillu assigiinngitsut arfineq-marlunnit arfineq-pingasunut

- Kalaallisut, islandimiusut…

- Norskisut, tuluttut, qallunaatut, svenskisut, Samit oqaasii marluk, Nunavik, aamma – Nunavummiuuppat?

Sisimiuni nipilersornermut ilinniarfiup iniutaani Arctic Sounds Festivalimik aaqqissuisut oqaatsit qanoq amerlatigisut atorlugit ukioq manna  erinarsortoqarnissaanut kisitsillutik aallartipput.

Sermitsiap festivalimi pisortaq Jacob Froberg suleqataalu Maria Kristensen attaveqaatikkut oqaloqatigai. Tassanilu assiliissutit isigisaata avataani Laura Lennert Jensen, festivalimik aaqqissueqataasoq aamma kisitseqataavoq.

- Oqaatsit arfineq-marluk arfineq-pingasullu akornanniissapput, Jacob Froberg, festivalimik taamanikkut aallarniisoq inerniliivoq.

Erinarsortartut, taalliortut nipilersortartullu nunanit avannarlerneersut, issittumeersut nunanilu allaneersut ukioq manna aqqaneq-marlussaanik Sisimiuni nammineq nipilersuusiaminnik appisimaassapput.

Arctic Sounds siullermeertumik 2014-imi ingerlanneqarpoq.

- Arctic Sounds aallaqqaammulli taalliornermik sammisaqartumik festivaliuvoq. Inuillu namminneq oqaatsitik atorlugit erinarsortarnerat nuannareqaarput, Jacob Froberg oqarpoq.

Piffissaq sivisunngitsoq qaangiuppat Sisimiormiut Sisimiunullu tikeraat nipilersornerpassuarnik, talksinik workshopinillu illoqarfik tamakkerlugu qaqqamilu, Arctic Sounds Festival poorskip ulluini apriilip aappaannit arfernannut misigisaqarsinnaassapput.

Samit tallimanngorneq ingerlatissavaat

Jacob Frobergip Maria Kristiansenillu ukioq manna ilungersuutaasa ilaat tassaavoq tallimanngornermi ingerlanneqartussat, tamannalu ukioq manna Saminut ingerlatassanngortinneqarpoq.

Taakkumi Samit nipilersortartut amerlanerusut tusarnaartitsinerni appisimaartittarnissaat misilittarsimavaat, Norgellu avannaani Samillu nipilersornermik festivaliat Riddu Riđđu suleqatigalugu kiisami tamanna iluatsinneqarpoq.

- Riddu Riđđu tallimanngorneq tamaat ingerlatissavaa tassanilu Samit nipilersugaat, Samit nerisassiaat saqqummiunneqassapput, workshopillu assigiinngitsut ingerlanneqarlutik, Jacob Froberg oqaluttuarpoq.

Ilaatigut yoiki sungiusaqqinneqarsinnaavoq (Samit erniarsortaasitoqaat, aaqqiss) assassoriaatsinilluunniit assigiinngitsunik ilisimasaqarnerulerluni.

Samit eqqumiitsuliortut ilaat tallimanngornermi tusarnaarneqarsinnaasut tassaapput elektronikimik appisimaartartut Hildá Länsman & Tuomas Norvio kiisalu nipilersortartut Gabba, Aatsitassarsiornermut ilinniarfimmi appisimaartussat.

Tamatuma saniatigut Jacob Frobergip festivalimi ataatsimeersuarnissamut pilersaarut erseqqissaatigaa, taannalu festivalerpiaap avataatigut ingerlanneqartussaq, ukioq manna Issittoq Nunallu Avannarliit akimorlugit nipilersornikkut kulturikkullu attaveqaatinik nukittorsaanermik samminniffiussaaq.

Anersaarlu tamanna pigalugu nipilersortartut Kalaallit Nunaanneersut, Savalimmiuneersut, Islandimeersut Danmarkimeersullu nipilersukkamik sanaqatigiipput, tamannalu aamma festivalimi nipilersornermi saqqummiunneqassaaq, tassanilu Sisimiuni erinarsoqatigiit suleqatigineqassapput.

Pilersaarut pikkunartoq – sila apeqqutaalluni

Tallimanngornermi Samit aaqqissuinissaasa assigiinngitsunillu suleqatigiissitsinissaasa saniatigut tusarnaartitsinerit aaqqissuisut namminneerlutik isiginnaassallugit qilanaarisaat ingerlanneqassapput.

- Angående Mig, Laura Lennert Jensen Sermitsiaq aperimmat oqarpallappoq.

Angående Mig – imaluunniit Laura, tassa atia – danskiuvoq nipilersornikkut eqqumiitsuliortoq aamma festivalini angisuuni soorlu Roskilde Festivalimi Smukfestimilu appisimaarsimasoq.

Maria Kristiansenip Amerikamiut nipilersortartut, Küf Knotz & Christine Elise qilanaarai:

- Taakku kukkilattariarsorlutik rappertarput. Pikkunaqaat!

- Angu Motzfeldtilu, Laura Lennert Jensen ilannguppoq.

- Aap, kingullermik Aalborgimi 90-ikkunni nuusiami aappanik saqqummersitsimmat takuara. Tusarnaartitsinera pikkunaqaaq, Jacob Froberg oqarpoq.

Nipilersortartoq siornatigut tusarnaartitsisimanngisaannartoq, festivalimilu pernartussaq tassaavoq nipilersortartoq rappertartorlu Ole-Kristian Lyberth, eqqumiitsuliortutut OK-tut ilisarisimaneqartoq.

- Suut appissanerai pissangngaara, Maria Kristiansen oqarpoq.

Festivalimut pilersaarut tamanut saqqummiunneqareerpoq, festivalillu nittartakkakkut qupperneratigut ingerlaavartumik nutarterneqartassaaq. Tassani sila angallassinerlu pissutigalugit allannguisinnaanerit sillimmartaarfigineqarput.

- Inuit timmisartukkut tikereeraangata aatsaat pilersaarummut aalajangersimasumut ikkuttarusuppagut, Maria Kristiansen oqarpoq.

Issittumimiuna festivalimik aaqqissuisugut.

Tamannalumi patsisigalugu ukioq manna festivalernermi tusarnaartitsinernut inuit qassit takkunnissaat pillugu akissuteqarnissartik ajornakusoortippaat. Taamaattoq eqqumiitsuliortut, attaveqaatinit tikeraat, nammineq piumassutsiminnik suleqataasut piffimmilu aningasaliisut ilanngullugit inuit 600 missaanniinnissaat naatsorsuutigaat.

- Billetit 250-t 300-llu akornanni amerlatigisut tunisinnaasarpagut, Jacob Froberg oqarpoq.

- Billetinilli tuniniaaneq nalinginnaasumik aallartiffissap qallinera tikivillugu pisarpoq, Maria Kristiansen oqarpoq.