Paarnannguaq Mathiassenip, Avannaata Kommuniani Kulturimut, Atuarfimmut Meeqqerivinnullu ataatsimiititaliami siulittaasup, kommunip Kalaallit Arsaattartut Kattuffiannik (KAK) ukiuni pingasuni suleqatigiinnissamut isumaqatigiissummik nutaamik akuersisimanera nuannaarutigaa.
Isumaqatigiissutip kommunimi arsaattartut futsalertartullu peqatigiiffii nukittorsarniarpai, aammalu meeqqat inuusuttullu patajaatsumik ineriartornartumillu atugassaqartinneqarnissaat siunertaralugu peqatigiiffinni sullissineq najukkamilu sungiusaasunik ilinniartitsineq sammineqassapput. KAK tusagassiutitigut nalunaarummi taama ilisimatitsivoq.
Suleqatigiinnermi timersorneq aqqutigalugu peqqissumik ataatsimoornermik siuarsaanissaq pingaarnertut siunertarineqarpoq. Illuatungeriit naapertorlugit arsaattarneq futsalernerlu meeqqat inuusuttullu akornanni atugarissaarnermut, peqqinnermut inooqatigiinnermullu iluaqutaassallunilu taamaalilluni najukkami pinaveersaartitsinertut sunniuteqassaaq.
Avannaata Kommunia timersoqatigiiffinni sullissineranut ukiuni pingasuni tulliuttuni aningaasatigut tapiissuteqartarnissaa isumaqatigiissutip ilaanut ilaavoq. Tamatuma saniatigut KAK-mi sungiusaasunik ilinniartitsisoqaraangat sungiusaasut angalanerat najugaqarnerallu kommunip akilertassavai. Suliniuteqarnikkut sumiiffinni timersoqatigiiffinni avatangiisit pitsaanerusut toqqissisimanarnerusullu qulakkeerneqassapput.
Paarnannguaq Mathiassen, Kulturimut, Atuarfimmut Meeqqerivinnullu Ataatsimiititami siulittaasoq, isumaqatigiissutip pingaaruteqassusia pillugu ima oqarpoq:
- Peqatigiiffiit nukittuut meerartatsinnut inuusuttortatsinnullu tunniussinnaasatta pitsaanerpaat ilagaat. Isumaqatigiissut taanna aqqutigalugu ataatsimoorfiit nukittorsarniarpagut, taakkulu atugarliornerup pinngitsoortinnissaanut ineriartornermullu pitsaasumik sinaakkuteqalernissamut iluaqutaapput, taanna oqarpoq.
KAK-miit isumaqatigiissut tamanna timersoqatigiiffinni ulluinnarni sulinermut kajumissutsimillu sulisunut kommuni tamakkerlugu sulinersnnut nukittorsaataasutut pingaarutilittut isigineqarpoq.
- Timersoqatigiiffiit aaqqissuulluagaanerulerpata sungiusaasullu ilinniarluartinneqarpata meeqqat inuusuttullu toqqissisimanartumik ineriartornartumillu avatangiiseqartissavagut. Avannaata Kommunianik suleqateqarnikkut siunissaq ungasinnerusoq siunertaqarlutalu sulinissatsinnut periarfissaqalerpugut, KAK-mi siulittaasoq Kenneth Kleist oqarpoq.
Isumaqatigiissut ukiuni pingasuni atuutissaaq, tassanilu kommunimi arsaattartut futsalertartullu klubbiinut sullissineq, aaqqissuussaanikkut tapersersuineq sungiusaasunillu ilinniartitsineq pineqarput.
