Danmarkimi naalakkersuisunik ivertitsinissamik isumaqatigiininniarnerit sivitsorput, tamannalu Kalaallit Nunaannut ajornartorsiutaavoq.
Naalakkersuisut siulittaasuat Jens-Frederik Nielsen naapertorlugu Kalaallit Nunaat annertuumik tatineqarpoq, Danmarkillu naalakkersuisoqarnissaa pingaaruteqarluni.
- Danskit naalakkersuisoqalernissaat piffissami qaninnermi kissaatigaara. Tamanna Kalaallit Nunaannut iluassaqaaq, nunanut allanut politikki illersornissaqarnerlu eqqartoraangatsigit Kunngeqarfik Danmark pineqartarpoq, tassa Kalaallit Nunaat Danmarkilu ataatsimut isigalugit, Jens-Frederik Nielsen isumasioqatigiinnermi Democracy Summitimi apersorneqarnermini oqarpoq.
Naalakkersuisut siulittaasuat marlunngornermi Københavnimiippoq. Tassani nunat tamalaat ataatsimeersuarneranni ilaatigut ministeriunerugallartoq Mette Frederiksen (S) aamma Amerikamiunut siusinnerusukkut sillimaniarnermut tunngasunut siunnersortitigimasaa John Bolton peqatigalugit.
Landry Nuummukassaaq
Nuummi ataatsimeersuarneq "Future Greenland“ sapaatip-akunnerata tulliani ingerlanneqassaaq. Ilaatigut USA-p præsidentiata Donald Trumpip Kalaallit Nunaannut immikkut aallartitaa Jeff Landry peqataassaaq.
Danmarkimi naalakkersuisuugallartunit ataatsimeersuarnermut aallartitaqanngillat.
Jens-Frederik Nielsenip ataatsimeersuarnermut atatillugu Jeff Landry naapissinnaanerlugu maannamut akissutissaqartinngilaa.
- Suli naluara. Naapikkumappanga ataatsimeeqatiginerani suna oqaluuserineqassanersoq ersarissumik siullertut paaserusuppara. Nunatsinni qanoq iliornerat ilisimalluinnarparput. Qaammatini 15-ini 16-inilu taamatut tatineqarpugut, naalakkersuisut siulittaasuat oqarpoq.
Kalaallit Nunaat ataqqineqartariaqarnissaanik piumasaqartoq
Kalaallit Nunaata inissisimaffianik ataqqinninnissaq piumasaraa. Kalaallit Nunaat tuniniarneqanngilaq, tiguneqarnissamik sioorasaarinerit Kalaallit Nunaata akuerinavianngilaa.
- Takorlooruk naalakkersuisut siulittaasuattut innuttaasunut oqaruit arlaannik mattussivissorsinnaangitsugut. Najuunnitta takutissavaa qanoq pimoorussitiginersugut, oqarpoq.
Jens-Frederik Nielsenip erseqqissarpaa Kalaallit Nunaat nunatut ataqqineqarpat Amerikamiut isumaqatiginninniarfiginissaanut ataatsimeeqatiginissaanullu piareersimalluni, ilaatigut inuussutissarsiornikkut suleqatigiinneq, nunap pisuussutaanik ineriartortitsineq isumannaallisaanerlu pillugit.
- Iliuuseqarnerunissatsinnut piareersimavugut. Nunat tamalaat isumannaatsuunissaat eqqarsaatigalugu Nato-mi akisussaaffeqarnerulernissamut, niuernikkut suleqatigiinnerup annertusinissaanut pitsaanerusumillu suleqateqarnissamut piareersimavugut, Jens-Frederik Nielsen oqarpoq.
Donald Trumpip ukiuni kingullerni arlaleriarluni oqareernerata kingorna Kalaallit Nunaat tigujumaarlugu., USA-p, Kalaallit Nunaata Danmarkillu akornanni isumaqatigiinniarnerit suli ingerlasut sukumiisumik eqqartunngilaa.
- Isumaqatiginninniarpugut, isumaqatigiissuteqanngilagulli, Jens-Frederik Nielsen oqarpoq.
