Nuummi innuttaasup Facebookimi allaaserisaa aallaavigalugu angut tuluttut oqaluttoq, Kalaallit Nunaata USA-mut ilanngunnissaa pillugu atsiugassaq atsiorpassuk, 200.000 dollarinik akissarsisoqarnissaa neqeroorutigaa.
Amerikamiu Clifford Stanley, atsiornernik katersuiartorluni USA-llu Kalaallit Nunaannik tiguaanissaanut tapersersuisut misissorniarlugit Nuummiittoq, piffissap sivikitsup iluani paasinarsivoq.
Suliniut taanna Danmarkimi politiit isertortumik paasiniaasartuinit (PET) Amerikamiup tikeraarnissaa sioqqullugu ilisimaneqartoq, KNR allappoq.
Arctic Printsip pisortaa Klaus Karlshøj Poulsen tusagassiutinit attaveqarfigineqarpoq, taanna Clifford Stanleymit innuttaasunut taasisitsinissamut nammineq sanaanik naqiterititsiumalluni februarimi saaffigineqarpoq
- Nunamut ajoqutaasussamik suliaqartoq
KNR naapertorlugu pisortap Amerikamiup piumasaa itigartippaa.
- Allaffigaara nunamut ajoqutaasumik suliaqarnerarlugu, oqartussaasunullu nalunaarutiginiarlugu, Klaus Karlshøj Poulsen KNR-imut oqarpoq.
Klaus Karlshøj Poulsenip pisup nalunaarutiginerata kingorna PET-imit pulaarneqarpoq, taassumalu oqarneratut PET-imit oqaatigineqarpoq pisoq pimoorullugu suliassatut tiguneqartoq.
Inunnik ikiuiniarluni, Clifford Stanley Sermitsiami apersorneqarnermini oqarpoq.
- Kalaallit periarfissamik tuniniarsaraakka. Inuit namminneq aalajangertussaavaat. Uanga aalajangissanngilara, taakkua aalajangiisuussapput, 86-inik ukiulik Clifford Stanley Sermitsiamut oqarpoq.
Nuummi takussaalernerata kingorna atsiornernik katersuiniarnera aamma oqartussanut nalunaarutigineqarpoq.
Suliaq pillugu nalunaarummik tigusaqarsimallutik, tamannalu politikkikkut pissutsinut maanna atuuttunut attuumassuteqarsinnaasoq, Kalaallit Nunaanni Politiivinit uppernarsarneqarpoq.
